Эъломияи умумии ҳуқуқи инсон 70-сола мешавад!

IMG_0220Тибқи муқаррароти Қонуни Ҷумҳурии Тоҷикистон «Дар бораи рӯзҳои ид» ҳамасола санаи 10-уми декабр ҳамчун Рӯзи ҳуқуқи инсон ҷашн гирифта мешавад. Вобаста ба ин сана дар Тоҷикистон дар доираи Ҳафтаи ҳуқуқи инсон чорабиниҳои мухталиф гузаронида мешаванд.

Соли ҷорӣ мақомоти Ваколатдор оид ба ҳуқуқи инсон дар Ҷумҳурии Тоҷикистон дар доираи таҷлили Рӯзи ҳуқуқи инсон баргузории як қатор чорабиниҳоро ба нақша гирифтааст.

Ҳафтаи ҳуқуқи инсон аз рӯзи 4-уми декабр оѓоз ёфта дар ин рӯз дар мавзӯи «Фаъолияти Ваколатдор оид ба ҳуқуқи кӯдак дар Ҷумҳурии Тоҷикистон дар соли 2017: натиҷаи вохӯриҳо, қабули шаҳрвандон ва мониторинги фаъолияти мактаб-интернатҳо» мизи мудаввар гузаронида шуд.

Соли 2017 дар Рӯзи ҳуқуқи инсон маъракаи яксола ба муносибати 70-умин солгарди қабули Эъломияи умумии ҳуқуқи инсон – ҳуҷҷати муҳими асри ХХ, ки дар он ҳуқуқҳои ҷудонопазири хоси ҳар як инсон эълон шудааст, оѓоз мегардад.

Бахшида ба ин санаи муҳим, санаи 5-уми декабр дар мақомоти Ваколатдор оид ба ҳуқуқи инсон бо иштироки намояндагони мақомоти давлатӣ, созмонҳои байналмилалӣ, ҷомеаи шаҳрвандӣ ва ВАО мизи мудаввар баргузор гардид.

Дар мизи мудаввар масъалаҳо оид ба таърихи таҳия ва қабули Эъломияи умумии ҳуқуқи инсон, дастовардҳои Тоҷикистон дар самти эътироф, риоя ва ҳифзи ҳуқуқи инсон, рушди фарҳанги ҳуқуқи инсон ва фаъолияти мақомоти Ваколатдор оид ба ҳуқуқи инсон дар ин самт мавриди баррасӣ қарор гирифтанд.

Эъломия тавонист, ки сарфи назар аз сохти давлатдорӣ, мафкураву эътиқоди динӣ ва одату анъанаҳои халқҳои ҷаҳон дар худ ҳуқуқу озодиҳои асосии инсонро ѓунҷонад. Санади мазкур агарчи хусусияти эъломиявӣ дошта бошад ҳам эътибори волои ҳуқуқӣ дорад. Дар асоси Эъломияи мазкур чандин санадҳои дигари байналмилалӣ қабул гардида, муқаррароти қонунҳои миллӣ мутобиқ карда шудаанд.

Дар доираи Ҳафтаи ҳуқуқи инсон дар хиёбонҳои асосии шаҳри Душанбе ҷиҳати ташвиқу тарѓиби дастовардҳои Ҷумҳурии Тоҷикистон дар самти эътироф, риоя ва ҳифзи ҳуқуқи инсон навиштаҷот дар баннер ва видеороликҳо дар билбордҳо гузошта шуданд.

Ҳамчунин дар ин самт чорабиниҳои мухталиф дар вазорату идораҳо, мақомоти иҷроияи маҳалии ҳокимияти давлатӣ ва муассисаҳои илмӣ ва таълимии ҷумҳурӣ ташкил ва гузаронида мешаванд.

Хадамоти матбуотии ВҲИ

Фаъолияти Ваколатдор оид ба ҳуқуқи кӯдак дар Ҷумҳурии Тоҷикистон дар соли 2017: Натиҷаҳои вохӯриҳо, қабули шаҳрвандон ва мониторинги фаъолияти мактаб-интернатҳо

IMG_0207Рӯзи 4 декабри соли 2017 дар мақомоти Ваколатдор оид ба ҳуқуқи инсон дар Ҷумҳурии Тоҷикистон Мизи мудаввари Ваколатдор оид ба ҳуқуқи кӯдак дар мавзӯи «Фаъолияти Ваколатдор оид ба ҳуқуқи кӯдак дар Ҷумҳурии Тоҷикистон дар соли 2017: Натиҷаҳои вохӯриҳо, қабули шаҳрвандон ва мониторинги фаъолияти мактаб-интернатҳо» баргузор гардид.

Чорабинии мазкур дар доираи таҷлили Рӯзи ҳуқуқи инсон, ки бо Қарори Ассамблеяи генералии СММ ҳамасола 10 декабр ҷашн гирифта мешавад, баргузор гардид.

Раҷабмо Ҳабибулозода — Ваколатдор оид ба ҳуқуқи кӯдак дар Ҷумҳурии Тоҷикистон зимни сухани ифтитоҳӣ аз ҷумла қайд намуданд, ки ҷиҳати ҳифз ва пешбурди ҳуқуқи кӯдак Ваколатдор оид ба ҳуқуқи кӯдак ҳамкориҳои судмандро бо мақомоти давлатӣ, ҷомеаи шаҳрвандӣ ва созмонҳои байналмилалӣ роҳандозӣ намуда, дар ин раванд соли 2017 як қатор корҳоро ба анҷом расонид. Аз ҷумла:

— Стратегияи фаъолияти Ваколатдор оид ба ҳуқуқи кӯдак дар Ҷумҳурии Тоҷикистон барои солҳои 2018-2020 пас аз машваратҳои васеъ бо мақомоти давлатӣ ва сохторҳои ҷомеаи шаҳрвандӣ таҳия ва тасдиқ карда шуд.

— Рамзи (логотипи) Ваколатдор оид ба ҳуқуқи кӯдак дар Ҷумҳурии Тоҷикистон таҳия ва тасдиқ карда шуд.

— Сомонаи ВҲК ҶТ дар шабакаи Интернет таҳия ва фаъол гардонида шуд.

— Аз ҷониби Ваколатдор оид ба ҳуқуқи кӯдак дар 4 минтақаи ҷумҳурӣ қабули шаҳрвандон (38 нафар) анҷом дода шуд. Қаблан дар муддати як ҳафта оид ба сана ва суроғаи қабули шаҳрвандон тавассути васоити ахбори оммаи маҳаллӣ эълон пахш шуд.

— Бо мақсади аз наздик муаррифӣ намудани Ваколатдор оид ба ҳуқуқи кӯдак ба ҷомеа, салоҳият ва вазифаҳои ӯ, инчунин таҳким бахшидани ҳамкориҳои мақомоти иҷроияи маҳаллии ҳокимияти давлатӣ ва сохторҳои ҷомеаи шаҳрвандӣ бо мақомоти ВҲИ ҶТ дар 4 минтақаи ҷумҳурӣ вохӯриҳои Ваколатдор оид ба ҳуқуқи кӯдак баргузор гардиданд.

— Бо мақсади санҷиши раванди амалишавии ҳуқуқҳои кӯдакон дар муассисаҳои кӯдакона тибқи Барномаи амали мақомоти ВҲИ ҶТ аз ҷониби гурӯҳи кории мақомоти ВҲИ ҶТ мониторинги фаъолияти 8 мактаб-интернат гузаронида шуд.

Намояндаи Хазинаи кӯдакони СММ (ЮНИСЕФ) дар ҶТ Фарида Нуриддин ҳамагонро бо Рӯзи ҳуқуқи инсон муборакбод намуда, иброз доштанд, ки фаъолияти аз ҷониби Ваколаддор оид ба ҳуқуқи кӯдак анҷомдодашуда қадамҳои наве мебошанд дар самти пешбурди ҳуқуқ ва озодиҳои кӯдак дар Ҷумҳурии Тоҷикистон.

Дар Мизи мудаввар натиҷаҳои ҷамъбастии қабули шаҳрвандон, вохӯриҳои ВҲК ҶТ ва мониторинги фаъолияти муассисаҳои будубоши доимии кӯдакон бо иштироки директорони ҳамин муассисаҳо, котибони комиссияҳои маҳаллии ҳуқуқи кӯдак, мудирони бахшҳои вилоятии ҳифзи ҳуқуқҳои кӯдак, намояндагони Вазорати маориф ва илми ҶТ ва Вазорати тандурустӣ ва ҳифзи иҷтимоии аҳолии ҶТ, созмонҳои байналмилалӣ, сохторҳои ҷомеаи шаҳрвандӣ ва рӯзноманигорони ватанӣ мавриди баррасӣ ва муҳокима қарор дода шуданд ва тасмим гирифта шуд, ки тавсияҳои Мизи мудаввар ба вазорату идораҳои дахлдор пешниҳод карда мешаванд.

Сардори шуъбаи Ҳифзи давлатии
ҳуқуқҳои кӯдаки Дастгоҳи ВҲИ ҶТ
Содиқов А.