Муҳокимаи масъалаҳои сиёсати зиддикоррупсионии Ҷумҳурии Тоҷикистон дар доираи уҳдадориҳои байналмилалии Ҷумҳурии Тоҷикистон

*Санаи 25 майи соли 2018 дар шаҳри Бохтари вилояти Хатлон бо иштироки Ваколатдор оид ба ҳуқуқи инсон дар Ҷумҳурии Тоҷикистон Зариф Ализода мизи мудаввар дар мавзӯи “Муҳокимаи масъалаҳои сиёсати зиддикоррупсионии Ҷумҳурии Тоҷикистон дар доираи уҳдадориҳои байналмилалии Ҷумҳурии Тоҷикистон» баргузор гардид.

Дар кори мизи мудаввар ҳамчунин намояндагони Суди Олии Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва намояндагони ҷомеаи шаҳрвандӣ иштирок намуданд.

Сарравал Зариф Ализода — Ваколатдор оид ба ҳуқуқи инсон дар Ҷумҳурии Тоҷикистон ва Муқимӣ Нигора — сардори раёсати муносибатҳои байналмилалӣ, робита бо ҷомеаи Сарраёсати пешгирии коррупсияи Агентии назорати давлатии молиявӣ ва мубориза бо коррупсияи ҶТ бо сухани ифтитоҳӣ баромад намуда оид ба масъалаҳои сиёсати зиддикоррупсионии Ҷумҳурии Тоҷикистон дар доираи уҳдадориҳои байналмилалии Ҷумҳурии Тоҷикистон» маълумот доданд.

*Сипас маърузачиён Маҷидӣ Абдукарим, сарнозири Сарраёсати пешгирии коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар мавзӯи «Муқовимат ба коррупсия дар ҶТ», Муқимӣ Нигора — сардори раёсати муносибатҳои байналмилалӣ, робита бо ҷомеаи Сарраёсати пешгирии коррупсияи Агентии назорати давлатии молиявӣ ва мубориза бо коррупсияи ҶТ дар мавзӯи «Нақшаи амалиёти Истамбулии мубориза бо коррупсия барои давлатҳои Аврупои Шарқӣ ва Осиёи Марказӣ ва рафти иҷрои он дар ҶТ», Аланазарзода Шароф, Судяи Суди Олии ҶТ дар мавзӯи «Чорабиниҳои Судҳои Ҷумҳурии Тоҷикистон вобаста ба амалигардонии Стратегияи муқовимат ба коррупсия бо мақсади аз байн бурдани хавфҳои коррупсионӣ» ва Бобоҷонов Музаффар, аъзои шабакаи Волоияти қонун ва дастрасӣ ба адолати судӣ дар мавзӯи  «Ҳамкории мақомотҳои ваколатдори давлатӣ ва ташкилотҳои ҷомеаи шаҳрвандӣ оиди масъалаҳои паст намудани хавфҳои коррупсионӣ дар мисоли вилояти Суғд» баромад намуданд.

Дар охир саволу љавоб ва муњокимаронї оид ба натиљаи кори мизи мудаввар баргузор гардида, иштирокчиён тавсияҳои худро пешниҳод намуданд.

Хадамоти матбуотии ВҲИ

Ҷавонон нерӯи пешбарандаи ҷомеа

IMG_3757Дар асоси Барномаи амали мақомоти Ваколатдор оид ба ҳуқуқи инсон барои соли 2018 ва Нақшаи чорабиниҳои фарҳангӣ-фароғатӣ, илмиву маърифатӣ, оммавию варзишӣ ва солимгардонӣ бахшида ба таҷлили «Рӯзи ҷавонони Тоҷикистон 23 май», таҳти унвони «Ҷавонон – пайрави Пешвои миллат», ки зери сарпарастии Президенти Федератсияи футболи Тоҷикистон, муҳтарам Рустами Эмомалӣ гузаронида мешавад, санаи 23 май дар мақомоти Ваколатдор оид ба ҳуқуқи инсон бо иштироки роҳбарият ва кормандони мақомот мизи мудаввар дар мавзӯи «Ҷавонон нерӯи пешбарандаи ҷомеа» баргузор гардид.

З.Ализода – Ваколатдор оид ба ҳуқуқи инсон дар Ҷумҳурии Тоҷикистон чорабиниро ифтитоҳ намуда, ҳайати кормандон ва махсусан ҷавононро ба ин рӯз табрик намуданд. Зимни суханронӣ қайд карданд, ки «Ҷавонон нерӯи бузург ва пуриқтидор мебошанд. Ин нерӯ бояд мақсаднок истифода бурда шавад. Давлат ва Ҳукумати Ҷумҳурии Тоҷикистон баҳри дар амал татбиқ намудани сиёсати давлатии ҷавонон тамоми чораҳои заруриро андешида истодааст. Имрӯз барои ҷавонон имкониятҳои фаровон мавҷуданд, ки бояд аз он оқилона истифода намоянд».

Сипас Р.Ҳабибулозода – Ваколатдор оид ба ҳуқуқи кӯдак низ сухан ронда, ҳозиринро бо ин сана табрик намуданд. Ҳамчунин қайд намуданд, ки «Он имкониятҳое, ки имрӯз барои ҷавонон вуҷуд дорад дар даврони ҷавонии мо мавҷуд набуд. Барои ҷавонон имрӯз ҳамаи шароиту имкониятҳои таълиму таҳсил гирифтан, илм омӯхтан, кору фаъолият намудан фароҳам оварда шудааст».

Қисмати дигари мизи мудаввар ба шунидани маърӯзаҳо, муҳокима ва саволу ҷавоб бахшида шуда буд. Дар назди ҳозирин кормандони ҷавонони мақомот — Солиев А. ва Лоиқов Ш. оид ба паҳлуҳои асосии масъалаҳои ҷавонон, аз ҷумла вазъи ҳуқуқии ҷавонон дар Ҷумҳурии Тоҷикистон маърӯза намуданд.

20170521_075406Ҷавонони мақомот Ваколатдор оид ба ҳуқуқ инсон дар тамоми ҷабҳаҳои ҳаёти ҷумҳурӣ фаъолона ширкат меварзанд. Аз ҷумла санаи 20 майи соли ҷорӣ онҳо дар чорабини умумиҷумҳуриявии «Дави миллӣ» иштирок намуданд.

Хадамоти матбуотӣ

 

АМИТ «Ховар» 15 май — Рӯзи байналмилалии оила

Ҳамасола 15 май дар тамоми ҷаҳон Рӯзи байналмилалии оила, ки соли 1993 бо қарори Ассамблеяи Генералии СММ эълон гардидааст,   таҷлил карда мешавад.

Мақсад аз таҷлили ин ҷашн — ҷалби диққати давлату ҷомеа ба мушкилоти мавҷудаи оила мебошад. Оила дар фарҳанги мардуми куҳанбунёди тоҷик ҳамчун ниҳоди муқаддас эътироф шудааст, зеро беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмиву таҳаммулгароӣ маҳз дар оила ташаккул меёбанд.  Ҳамаи инро ба назар гирифта, Пешвои миллат муҳтарам Эмомалӣ Раҳмон   соли 2015-ро Соли оила эълон намуда буданд.

Оила дар ҳама давру замон ҳамчун арзиши олии ҷомеа ҳисобида шуда, ҳифзи байналмилалӣ-ҳуқуқии оила, модару кӯдак дар санадҳои байналмилалӣ ба мисли Эъломияи умумии ҳуқуқи башар, Паймони байналмилалӣ дар бораи ҳуқуқҳои сиёсӣ ва шаҳрвандӣ, Паймони байналмилалӣ дар бораи ҳуқуқҳои иқтисодӣ, иҷтимоӣ ва фарҳангӣ ва дигар санадҳои байналмилалӣ танзим шудаанд.

Бо мақсади таъмини ҳуқуқҳо ва кафолати баробарии воқеии мардону занон, пешгирии зуроварӣ дар оила дар Ҷумҳурии Тоҷикистон як зумра санадҳои меъёрии ҳуқуқӣ ба мисли Қонуни Ҷумҳурии Тоҷикистон «Дар бораи кафолатҳои давлатии баробарҳуқуқии мардону занон ва имкониятҳои баробари амалигардонии онҳо», «Дар бораи пешгирии зўроварӣ дар оила» ва дигарҳо қабул шудаанд. Қабули Қонуни Ҷумҳурии Тоҷикистон «Дар бораи пешгирии зўроварӣ дар оила», ки ба пешгирии ҳуқуқвайронкуниҳо дар самти муносибатҳои оилавӣ равона шудааст, саривақтӣ буда, самаранок амалӣ гардида истодааст.

Тавре ба мухбири АМИТ «Ховар» аз Кумитаи кор бо занон ва оилаи назди Ҳукумати Ҷумҳурии Тоҷикистон иттилоъ доданд,  Кумита ҷиҳати дастгирии занон ва пешгирии зӯроварӣ дар хонаводаҳо дар асоси Қонуни Ҷумҳурии Тоҷикистон «Дар бораи пешгирии зӯроварӣ дар оила» корҳои зиёдеро ба сомон мерасонад.

Инчунин Кумитаи кор бо занон ҷиҳати иҷроиши Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» як зумра чорабниҳоро  гузаронида итодааст. Аз ҷумла, семинару машваратҳо пайваста дар байни донишҷӯён ва толибилмони мактабҳои миёна баргузор карда мешаванд.

Бояд гуфт, ки имсол бахшида ба Рӯзи оила  Кумитаи кор бо занон ва оилаи назди Ҳукумати Ҷумҳурии Тоҷикистон  баргузории як силсила барномаҳоро ба нақша гирифтааст.

Ба муносибати ин рӯз  ҳамчунин Кумита дар тамоми шаҳру ноҳияҳои ҷумҳурӣ вохӯрию чорабиниҳои фарҳангӣ баргузор намуда, озмуни ҷумҳуриявии фарҳангӣ-маърифатӣ таҳти унвони «Беҳтарин оилаи ҳунарманд»-ро миёни оилаҳои ҳунарманди кишвар эълон кардааст.

 Ибодат ДАВЛАТЗОДА,

АМИТ «Ховар»

Вохӯрии гуруҳи кории назди Ваколатдор оид ба ҳуқуқи инсон дар Ҷумҳурии Тоҷикистон

Рӯзи 11 майи соли 2017 дар маҷлисгоҳи мақомоти ВҲИ  бо иштироки Ваколатдор оид ба ҳуқуқи инсон дар Ҷумҳурии Тоҷикистон, муҳтарам Зариф Ализода вохурии аъзоёни гурӯҳи кории назди Ваколатдор оид ба ҳуқуқи инсон дар Ҷумҳурии Тоҷикистон баргузор гардид.

Дар чорабинии мазкур аъзоёни гурӯҳи корӣ, намояндагони Дастгоҳи иҷроияи Президенти Ҷумҳурии Тоҷикистон,  Вазорати адлия, Прокуратураи генералӣ, Суди Олӣ  ва аъзоёни гурӯҳи мониторингии назди Ваколатдор оид ба ҳуқуқи инсон дар Ҷумҳурии Тоҷикистон иштирок намуданд.

Дар вохӯрӣ натиҷаи мониторингҳои дар соли 2018 гузаронидашуда, аз ҷумла мониторинги муассисаҳои давлатии “Беморхонаи равонии вилояти Суғд ва Хона — интернати бемориҳои рӯҳии ноҳияи Ҷ . Расулов”, Тавқифгоҳи нигоҳдошти муваққатии ноҳияҳои Спитамен, Панҷ, Мӯъминобод ва Ховалинг, муассисаи ислоҳии ЯС 3/9-и СРИҶҶ Вазорати адлия дар ноҳияи Дустӣ ва муассисаи давлатии “Литсеи касбӣ-техникии махсуси шаҳри Душанбе” мавриди муҳокима ва арзёбӣ қарор дода шуданд.

Зимни вохӯрӣ аъзоёни гуруҳи мониторингӣ ба саволҳои иштирокчиён ҷавобҳои мушаххас доданд. Ҳамчунин дар чорабинии мазкур масъалаи рафъи камбудиҳои ҷойдошта, мушкилоти муассисаҳои болозикр ва роҳҳои ҳалли онҳо муҳокима гардиданд.

 Хадамоти матбуотии ВҲИ

 

Механизми амалишавӣ ва назорати қабул ва баррасии муроҷиатҳои шахсони воқеӣ ва ҳуқуқӣ

20180510_105924Дар асоси Барномаи амали мақомоти ВҲИ барои соли 2018 ва татбиқи Лоиҳаи «Ҳамкории наздисарҳадӣ ба хотири сулҳ ва рушди устувор» санаи 10-уми май дар шаҳри Исфараи вилояти Суѓд дар мавзӯи «Қабул ва баррасии муроҷиатҳои шахсони воқеӣ ва ҳуқуқӣ: механизми амалишавӣ ва назорат» мизи мудаввар гузаронида шуд.

Дар мизи мудаввар намояндагони мақомоти иҷроияи маҳаллии ҳокимияти давлатӣ, мақомоти суд, пракуратура, корҳои дохилӣ, амният мақомоти худидоракунии шаҳраку деҳоти шаҳри Исфара иштирок намуданд.

Зимни баргузории мизи мудаввар масъалаҳои қабул ва баррасии муроҷиатҳои шахсони воқеӣ ва ҳуқуқӣ вобаста ба масъалаҳои наздисарҳадӣ, ки аз ҷониби сокинони ҷамоатҳои Ворух, Чоркуҳ, Лаккон ва Сурхи шаҳри Исфара баррасӣ шуданд.

Дар мизи мудаввар Қодирӣ С.А. – сардори шуъбаи ташкилӣ, иттилоотӣ ва таҳлилии Дастгоҳи Ваколатдор оид ба ҳуқуқи инсон дар Ҷумҳурии Тоҷикистон вобаста ба асосҳои ҳуқуқӣ ва амалияи қабул ва баррасии муроҷиатҳои шахсони воқеӣ, талаботи Конститутсия ва қонунгузорӣ, пешравӣ ва мушкилоти мавҷуда дар ин самт ва нақши мақомоти Ваколатдор оид ба ҳуқуқи инсон дар амалисозии Лоиҳаи мазкур маърӯза намуд.

Қайд карда шуд, ки муроҷиат намудан ба мақомоти давлатӣ ҳуқуқи конститутсионии шаҳрванд ба ҳисоб рафта, масъалаи мазкур яке аз самтҳои меҳварии сиёсати Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон мебошад.

Дар ин робита дар ҷумҳурӣ санадҳои меъёрӣ ва ҳуқуқӣ қабул карда шудаанд, ки механизми қабул ва баррасии муроҷиатҳои шахсони воқеӣ ва ҳуқуқиро муқаррар намудааст.

Қабул ва баррасии саривақтии муроҷиатҳои шахсони воқеӣ ва ҳуқуқӣ, ки дар минтақаҳои наздисарҳадии баҳснок истиқомат ва фаъолият менамоянд, метавонад мушкилоти эҳтимолиро пешгирӣ намояд.

Зимни баррасии маърӯза масъалаи ҳамкории мақомоти Ваколатдор оид ба ҳуқуқи инсон бо мақомоту идораҳои дахлдор ҷиҳати баланд бардоштани маърифати ҳуқуқии аҳолии минтақаҳои баҳсноки наздисарҳадӣ махсусан таъкид карда шуд.

Ҳамчунин дар мизи мудаввар М.Ашуров – сардори шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангӣ дар мавзӯи «Ҳуқуқҳои муҳоҷирони меҳнатӣ ва аъзои оилаи онҳо» маърӯза намуд. Дар маърӯза оид ба паҳлуҳои мухталифи раванди муҳоҷират, мушкилот ва дастовардҳо дар ин самт, навгониҳои қонунгузорӣ ва дигар масъалаҳо муҳокимарониҳо сурат гирифт. Таъкид гардид, ки масъулони мақомоти маҳаллӣ бояд дар омодасозии муҳоҷирони меҳнатӣ ва фаҳмонидани талаботи қонунгузории соҳа ба муҳоҷирон фаъолона иштирок намоянд.

Дар рафти мизи мудаввар намояндагони мақомоти иҷроияи маҳаллии ҳокимияти давлатӣ, мақомоти ҳифзи ҳуқуқ ва худидоракунии шаҳраку деҳот оид ба қабул ва баррасии муроҷиатҳои сокинони минтақаҳои баҳсноки наздисарҳадӣ ибрози назар намуданд.  Қайд карда шуд, ки бинобар хусусияти давомнок ва ё мавсимӣ доштани мушкилот сокинони минтақаҳои баҳсноки наздисарҳадӣ оид ба ин ё он масъала муроҷиатҳои такрорӣ мекунанд, ки ҳалли онҳо пеш аз ҳама аз аниқ муайян шудани марз вобастагӣ дорад.

Мақомоти ҳифзи ҳуқуқ ва махсусан ҷузъу томҳои Қушунҳои сарҳадӣ дар минтақаҳои баҳсноки наздисарҳадӣ фаъолияти самаранок ва мунтазам дошта, пайваста бо сокинон вохӯриву мулоқотҳо баргузор менамоянд.

Ба иштирокчиёни мизҳои мудаввар тавсия дода шуд, ки қабул ва баррасии муроҷиатҳоро тибқи муқаррароти Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» ва Тартиби бақайдгирии омории муроҷиатҳои шахсони воқеӣ ва ҳуқуқӣ ба роҳ монда, чорабиниҳои иттилоотиву маърифатиро дар байни аҳолӣ бештар намоянд.

Дар анҷоми мизи мудаввар иштирокчиён барои идома додани ҳамкорӣ дар ин самт изҳори омодагӣ намуданд.

Мақомоти Ваколатдор оид ба ҳуқуқи инсон фаъолияти худро ҷиҳати баланд бардоштани маърифати ҳуқуқии сокинони минтақаҳои баҳсноки наздисарҳадӣ равона намуда, барои ҳифзи ҳуқуқу манфиатҳои онҳо дар ҳамкори бо мақомоту идораҳои дахлдор чораандешӣ менамояд.

Хадамоти матбуотии ВҲИ

Мулоқот бо намояндагони ҷомеаи кишвар

42055839271_a645da4a8b_z12 майи соли 2018 дар Кохи Борбад Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар арафаи моҳи шарифи Рамазон бо масъулини мақомоти марказӣ ва маҳаллии ҳокимияти давлатӣ, намояндагони фаъоли соҳаҳои иҷтимоӣ, олимон, зиёиёни эҷодкор ва ходимони дин мулоқот карданд.

Нахуст Сарвари давлат ҳамаи иштирокчиёни мулоқот ва кулли мардуми кишварро бо фарорасиии айёми раҳмату мағфират шодбош гуфта, дар бораи фазилатҳои накуи моҳи шарифи Рамазон андешаронӣ карданд. Таъкид гардид, ки моҳи Рамазон ба сифати яке аз рукнҳои дини мубини ислом имтиҳони нафсу ҷисми саркаши инсонӣ буда, одамонро ба сабру таҳаммул, эҳтироми якдигар, раҳму шафқат ва кумак намудан ба эҳтиёҷмандону камбизоатон ҳидоят месозад.

Дар ҷараёни мулоқот Президенти мамлакат муҳтарам Эмомалӣ Раҳмон диққати иштирокчиёнро ба вазъи зудтағйирёбандаи ҷомеаи ҷаҳонӣ, вазъи мураккаби сиёсӣ дар баъзе кишварҳои олам, ҳолати дастрасии аҳолии сайёра ба неъматҳои моддию сарватҳои табиӣ, таъсири тағйирёбии иқлим ва низоъҳои солҳои охир ба ташаккули дунёи маънавии инсоният, инчунин дигар масъалаҳои мубрами рӯз ҷалб карданд.

Аз ҷумла, оид ба талошҳову тадбирҳои Ҷумҳурии Тоҷикистон дар арсаи байналмилалӣ дар самти ҳалли мушкилоти оби ошомиданӣ сухан ронда, Сарвари давлат муҳтарам Эмомалӣ Раҳмон таъкид доштанд, ки “ҳар сол танҳо бо сабаби норасоии оби тозаи ошомиданӣ як миллиону 400 ҳазор кӯдак азият кашида, ҳар дақиқа як кӯдаки навзод аз бемориҳои сироятии вобаста ба норасоии оби тоза ва муҳити пок ба ҳалокат мерасад. Ҳамасола аз шумораи умумии аҳолии сайёра бо сабаби норасоии об 3 миллиону 400 ҳазор нафар вафот карда, 31 фоизи муассисаҳои таҳсилоти умумии ҷаҳон ба оби тоза дастрасӣ надоранд. Ғайр аз ин, қариб 800 миллион нафар аҳолии сайёра аз норасоии ғизо азият кашида, як миллиард нафар кӯдакон дар шароити қашшоқӣ зиндагӣ мекунанд ва бо ҳамин иллат ҳар сол 22 ҳазор нафар кӯдак вафот мекунад.

Вобаста ба вазъи ноороми сиёсӣ дар кишварҳои ҷангзадаи олам Сарвари давлат муҳтарам Эмомалӣ Раҳмон таъкид доштанд, ки вазъияти ниҳоят ҳассосу ноороми ҷаҳон мову шуморо водор мекунад, ки нисбат ба ҳар вақти дигар зираку ҳушёр бошем, дар ғафлат намонем, манфиату зарари худро дар гуфтору амали хеш дуруст дарк кунем, ба қадри бузургтарин неъмату дастовардҳои зиндагиамон — истиқлолияту озодӣ, соҳибватаниву соҳибдавлатӣ, сулҳу оромӣ ва ваҳдати миллӣ расем.

Дар ҷамъомади имрӯза бо масъулини мақомоти марказӣ ва маҳаллии ҳокимияти давлатӣ, намояндагони фаъоли соҳаҳои иҷтимоӣ, олимон, зиёиёни эҷодкор ва ходимони дин Пешвои миллат бори дигар оид ба зарурати қабули қонунҳои Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” ва “Дар бораи танзими анъана ва ҷашну маросимҳо дар Ҷумҳурии Тоҷикистон” андешаронӣ карда, аз аҳли ҷомеаи кишвар риояи муқаррароти қонунҳоро талаб намуданд.

Баъди суханронии пурмуҳтавои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Прокурори генералии Ҷумҳурии Тоҷикистон Раҳмон Юсуф оид ба таъмини волоияти қонун, Вазири корҳои дохилӣ Раҳимзода Рамазон дар бораи вазъи пешгирии ҷинояту ҷинояткорӣ, Раиси Кумитаи давлатии амнияти миллӣ Саймумин Ятимов оид ба таъмини амнияти давлату миллат, Вазири тандурустӣ ва ҳифзи иҷтимоии аҳолии Ҷумҳурии Тоҷикистон Олимзода Насим оид ба ҳифзи солимии ҷомеа гузориш доданд.

Сарвари давлат ба Ҳукумати Ҷумҳурии Тоҷикистон, Дастгоҳи иҷроияи Президенти Ҷумҳурии Тоҷикистон, Прокуратураи генералӣ, Вазорати корҳои дохилӣ, Кумитаи давлатии амнияти миллӣ ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дастур доданд, ки барои иҷрои супоришҳои дар мулоқот зикргардида, баҳри таъмини волоияти қонун, пешгирии ҳамагуна ҷинояткорию қонуншиканиҳо, ҳифзи муқаддасоти миллӣ, боло гузоштани манфиати давлат, дуруст ба роҳ мондани ташхису табобат, таъмиру тармим ва бунёди муассисаҳои тандурустӣ, махсусан марказҳои саломатӣ, бунгоҳҳои тиббӣ, дар байни аҳолӣ корҳои тарғиботию ташвиқотӣ баранд ва тадбирҳои мушаххасу саривақтӣ андешанд.

Супоришҳои дигар ба масъулини мақомоти марказӣ ва маҳаллии ҳокимияти давлатӣ оид ба таълиму тарбияи насли наврас дар роҳи хештаншиносию ватанпарастӣ, бунёди муассисаҳои муосири таълимӣ, китобхонаву ҳаммомҳо бо сартарошхонаву кошонаи ҳусн, боғу гулгаштҳо ва ҷойҳои сайру истироҳати оммавӣ, корхонаҳои истеҳсолӣ, аз ҷумла коргоҳҳои дӯзандагӣ, истеҳсоли маснуоти ҳунарҳои мардумӣ дар ҳар як ҷамоату деҳоти кишвар, бо оби босифати ошомиданӣ таъмин намудани аҳолии деҳаҳо, таъмири роҳи байни деҳаҳо, риояи қонунҳои Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” ва “Дар бораи танзими анъана ва ҷашну маросимҳо дар Ҷумҳурии Тоҷикистон”, дода шуданд.

Дар мулоқот ҳамчунин чанд тан аз олимон, зиёиён, ходимони дин, соҳибкорон аз Вилояти Мухтори Куҳистони Бадахшон, вилоятҳои Хатлону Суғд, шаҳри Дашанбе ва  ноҳияи Рашт, аз ҷумла Усмоналӣ Нуров — Сархатиби масҷиди ҷомеи марказии шаҳри Бохтари вилояти Хатлон, Ҳоҷиҳусайн Мусозода — Сархатиби масҷиди ҷомеи марказии шаҳри Хуҷанди вилояти Суғд, Садрӣ Файзиев — соҳибкор аз ноҳияи Деваштиҷ, Сурайё Уроқова — Директори Ҷамъияти дорои масъулияти маҳдуди “Гурӯҳи самимии сохтмон”, Наргис Шерматова — Директори Ҷамъияти дорои масъулияти маҳдуди “Шерматова Наргис”, Абдусамад Саидов — соҳибкор аз шаҳри Истаравшан, Абдулаҳад Муминов — роҳбари Ҷамъияти дорои масъулияти маҳдуди “Элегант”-и шаҳри Бӯстон, Шафоат Ватаншоева — соҳибкор аз шаҳри Хоруғ, Бахтиёр Ибодуллозода — директори  Ҷамъияти дорои масъулияти маҳдуди “Шаҳри зебои ман”-и шаҳри Душанбе ва дигарон баромад карда, нисбат ба ҳадафҳои арзишманди Роҳбарияти давлату ҳукумати кишвар, ташаббусҳои ҷаҳонии Пешвои миллат дар сатҳи байналмилалӣ оид ба ҳалли мушкилоти оби ошомиданӣ, дастгирии ҳукумати кишвар оид ба рушди соҳибкорӣ дар мамлакат, иҷрои ҳатмии қонуну қарорҳои давлатӣ, инчунин дигар масъалаҳои мубрами ҷомеа андешаронӣ карданд.

Зимни баромади худ соҳибкорони ватандӯсти ҷумҳурӣ асосан ташаббус пеш гирифтанд, ки бо ҷонибдорӣ аз сиёсати неку ояндадори роҳбарияти давлату ҳукумат дар корҳои созандагию бунёдкорӣ тавассути таъмиру тармим ва сохтмони роҳҳо, мактабҳо, марказҳои тандурустӣ, бунгоҳҳои тиббӣ ва дигар иншооти зарурӣ, фаъолона иштирок мекунанд.

Баъди муҳокимаи пурраи масъалаҳои мулоқот Сарвари давлат муҳтарам Эмомалӣ Раҳмон аз аҳли ҷомеаи кишвар даъват ба амал оварданд, ки бо риояи анъанаҳои накуи аҷдодӣ ба масъалаи анҷоми тадбирҳои созандагию бунёдкорӣ, дуруст ташкил ва ба роҳ мондани маросими адои ҳаҷ, иҷрои тадбирҳои хайру савоб, дароз кардани дасти сахо ба эҳтиёҷмандон, ятимону камбизоатон, ғамхорӣ нисбат ба падару модар, хоҳару бародарони хеш, таваҷҷуҳи махсус диҳанд.

Дар охир Президенти мамлакат муҳтарам Эмомалӣ Раҳмон бо итминон иброз доштанд, ки ҳар фарди бонангу номуси миллат минбаъд низ ба хотири ободиву пешрафти Ватани азизамон, ҳаёти осоиштаи мардум, таҳкими сулҳу субот, ваҳдати миллӣ ва истиқболи арзандаи ҷашни сисолагии истиқлолияти давлатии Тоҷикистони маҳбубамон саъю талош хоҳад кард.

president.tj

Имрӯз — Рӯзи байналмилалии мубориза барои ҳуқуқи маюбон. Дар Тоҷикистон барои шахсони маъюб дар тамоми соҳаҳо имконияти баробари кору зиндагӣ фароҳам оварда шудааст

ДУШАНБЕ, 05.05.2017 /АМИТ «Ховар»/.  Ҷиҳати ҷалби таваҷҷуҳи ҷомеа ба мушкилоти ҳифзи ҳуқуқҳои шахсони имконияташон маҳдуд ҳамасола 5 май дар ҷаҳон ҳамчун Рӯзи байналмилалии мубориза барои ҳуқуқи маъюбон таҷлил мегардад.

Бино ба иттилои Ташкилоти умумиҷаҳонии тандурустӣ, дар ҷаҳон беш аз 1 миллиард одамон яке аз навъҳои маъюбиро дороянд, ки ин шумора 15 фоизи аҳолии курраи заминро ташкил медиҳад. Бояд гуфт, ки  дар Тоҷикистон барои ҳамаи шахсони маъюб дар тамоми соҳаҳо имконияти баробари кору зиндагӣ фароҳам оварда шудааст ва рӯз аз рӯз шароитҳо барои онҳо  хубтар шуда истодаанд.

Тавре дар суҳбат ба мухбири АМИТ «Ховар» муовини Сардори шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангии Дастгоҳи  Ваколатдор оид ба ҳуқуқи инсон дар Ҷумҳурии Тоҷикистон Саидалӣ  Бобохонов зикр намуд, «Ҷумҳурии Тоҷикистон ҳамчун иштирокчии санадҳои асосии байналмилалӣ дар самти ҳуқуқу озодиҳои инсон ҷиҳати таъмини шароит барои шахсони маъюбиятдошта саъю талош менамояд. Дар доираи чорабинии сатҳи баланд ба муносибати оғози «Даҳсолаи байналмилалии амал «Об барои рушди устувор», барои солҳои 2018-2028» Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 22 марти соли 2018 дар қароргоҳи Созмони Милали Муттаҳид Конвенсия дар бораи ҳуқуқи маъюбонро ба имзо расониданд, ки ғамхории Пешвои миллатамонро нисбати шахсони маъюб ифода менамояд».

Чуноне ки ҳамсуҳбати мо зикр кард, ба имзорасонии Конвенсия дар бораи ҳуқуқи маъюбон ба давлатҳои иштирокчӣ имкон медиҳад, ки асосҳои ҳуқуқӣ ва сиёсати миллиро вобаста ба масъалаҳои шахсони маъюб қавӣ намоянд ва барои беҳтар гардонии ҳаёти онҳо мусоидат намоянд.

«Дар кишвари мо  ба маъюбон дар муассисаҳои давлатии тиббию иҷтимоӣ ба таври ройгон ё имтиёзнок бо тартиби муқаррарнамудаи қонунгузории Ҷумҳурии Тоҷикистон ёрии тиббӣ расонида мешавад. Кӯдакони маъюб дар муассисаҳои таҳсилоти миёнаи умумӣ ҳангоми зарурат бо воситаҳои махсуси техникӣ таъмин мешаванд. Инчунин дар муассисаҳои махсуси таълимӣ тибқи қонунгузории Ҷумҳурии Тоҷикистон, кӯдакони имконияташон маҳдуд бо таҳсилоти умумӣ фаро гирифта мешаванд», — зикр кард С. Бобохонов.

Ба гуфтаи мавсуф, ба оилаҳое, ки ду ва зиёда маъюб доранд, инчунин ба падар ё модари танҳои маъюб, ки кӯдаки маъюбро тарбия мекунанд, бо тартиби муайяннамудаи Ҳукумати Ҷумҳурии Тоҷикистон ёрии иловагии иҷтимоӣ расонида мешавад. Маъюбон ҳуқуқ доранд аз нақлиёти ҷамъиятӣ ба тариқи ройгон истифода баранд. Ҳамчунин маъюбон ҳуқуқи истифодаи имтиёзноки нақлиёти роҳи оҳан ва ҳавоиро низ доранд.

Ҳамчунин ҳамсуҳбат афзуд, ки маъюбони гурӯҳҳои I ва II ҳуқуқи пардохти имтиёзноки ҳаққи манзили истиқоматӣ, хизматрасонии коммуналӣ (ба ғайр аз қувваи барқ, гази табиӣ) ва телефон, инчунин имтиёзи ба моликияти шахсӣ харидани хонаи давлатии истиқоматиашонро дар ҳаҷми 50 фоиз ва ҳуқуқи бе навбат ва ройгон ба хонаҳояшон гузаронидани хатти телефон, барқ, газ ва оби нӯшокиро доранд. «Маъюбон дар асоси хулосаи ташхиси тиббию иҷтимоӣ ба табобати ройгон ва ё имтиёзноки санаторию курортӣ, бе навбат гирифтани роҳхат ва рафтуомади ройгон ба маҳалли табобат бо тартиби муқаррарнамудаи Ҳукумати Ҷумҳурии Тоҷикистон ҳуқуқ доранд»,-гуфт Саидалӣ Бобохонов.

Бояд зикр кард, ки имрӯз тамоми биноҳои муосир, роҳравҳо ва гузаргоҳҳои зеризаминӣ барои шахсони маъюб мутобиқ гардонда шуда истодаанд.

«Маъюбон бояд ҳангоми истифодаи биноҳо ва инфрасохторҳо ба ягон мушкилӣ дучор нагарданд. Мақомоти Ваколатдор оид ба ҳуқуқи инсон дар шаҳру ноҳияҳои ҷумҳурӣ санҷиши дастрасиро дар биноҳои сохти кӯҳна гузаронд. Тавре маълум гашт, дастрасии маъюбон дар чунин биноҳо ба инобат гирифта нашудааст. Дар асоси тавсияҳои мақомоти ваколатдор шахсони масъул ба бартараф намудани ин камбудиҳо шурӯъ намуданд. Яъне, имрӯз дар даромадгоҳи ҳамаи биноҳои сохти кӯҳна пандус ва дастқапакҳо сохта мешаванд. Аз ҷумла, лифтҳои дарҳояшон хурд ба калон иваз мегарданд»,- илова намуд С.Бобохонов.
Тибқи иттилои Раёсати ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, имрӯз дар ҷумҳурӣ 146 ҳазору 397 нафар шахсони имконияташон маҳдуд ба қайд гирифта шудаанд, ки аз ин шумора 26 ҳазору 197 нафарашонро кӯдакони маъюби то синни 18 сола ташкил медиҳанд.

Ибодат ДАВЛАТЗОДА,

АМИТ «Ховар»

5 май Рӯзи байналмилалии мубориза барои ҳуқуқи маюбон

5 май дар ҷаҳон Рӯзи байналмилалии мубориза барои ҳуқуқи маюбон таҷлил мегардад. Мақсад аз таҷлили ин рӯз ҷалби таваҷҷуҳи ҷомеа ба мушкилоти ҳифзи ҳуқуқҳои маъюбон мебошад. Бино ба иттилои Ташкилоти умумиҷаҳонии тандурустӣ, дар ҷаҳон беш аз 1 миллиард одамон ягон навъи маъюбиро дороянд, ки ин шумора 15 фоизи аҳолии курраи заминро ташкил медиҳад. Беш аз 100 миллион нафар маъюбон кӯдакон мебошанд. Ҳамасола бо сабабҳои гуногун беш аз 700 ҳазор нафар маъюб мегарданд.

Дар Тоҷикистон барои шахсони маъюб дар тамоми соҳаҳо имконияти баробари кору зиндагӣ фароҳам оварда шуда истодаст. Ба маъюбон дар муассисаҳои давлатии тиббию иҷтимоӣ ба таври ройгон ё имтиёзнок бо тартиби муқаррарнамудаи қонунгузории Ҷумҳурии Тоҷикистон ёрии тиббӣ расонида мешавад. Барои таҳсилоти кӯдакони маъюбиятдошта дар муассисаҳои миёнаи таҳсилоти умумӣ тадриҷан шароит муҳайё карда мешаванд. Инчунин дар муассисаҳои махсуси таълимӣ тибқи қонунгузории Ҷумҳурии Тоҷикистон кӯдакони маъюб бо таҳсилоти умумӣ фаро гирифта мешаванд. Дар асоси Қонуни Ҷумҳурии Тоҷикистон «Дар бораи ҳифзи иҷтимоии маъюбон» маъюбони гурӯҳҳои I ва II ҳуқуқи пардохти имтиёзноки ҳаққи манзили истиқоматӣ, хизматрасонии коммуналӣ (ба ғайр аз қувваи барқ, гази табиӣ) ва телефон, инчунин имтиёзи ба моликияти шахсӣ харидани хонаи давлатии истиқоматиашонро дар ҳаҷми 50 фоиз ва ҳуқуқи бе навбат ва ройгон ба хонаҳояшон гузаронидани хатти телефон, барқ, газ ва оби нӯшокиро доранд. Маъюбон дар асоси хулосаи ташхиси тиббию иҷтимоӣ ба табобати ройгон ва ё имтиёзноки санаторию курортӣ, бе навбат гирифтани роҳхат ва рафтуомади ройгон ба маҳалли табобат бо тартиби муқаррарнамудаи Ҳукумати Ҷумҳурии Тоҷикистон ҳуқуқ доранд.

Ҷумҳурии Тоҷикистон ҳамчун иштирокчии санадҳои асосии байналмилалӣ дар самти ҳуқуқу озодиҳои инсон ҷиҳати таъмини шароит барои шахсони маъюбиятдошта саъю талош менамояд.

Дар доираи чорабинии сатҳи баланд ба муносибати оғози Даҳсолаи байналмилалии амал «Об барои рушди устувор, барои солҳои 2018-2028» Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон санаи 22 марти соли 2018 дар қароргоҳи Созмони Милали Муттаҳид Конвенсия дар бораи ҳуқуқи маъюбонро ба имзо расонид, ки ғамхории Пешвои миллатамонро нисбати шахсони маъюб ифода менамояд.

Баимзорасонии Конвенсия дар бораи ҳуқуқи маъюбон ба давлатҳои иштирокчӣ имкон медиҳад, ки асосҳои ҳуқуқӣ ва сиёсати миллиро вобаста ба масъалаҳои шахсони маъюб қавӣ намоянд ва барои беҳтаргардонии ҳаёти онҳо мусоидат намоянд.

Қобили зикр аст, ки Конвенсия дар бораи ҳуқуқи маъюбон ва Протоколи иловагї ба он аз ҷониби Ассамблеяи генералии Созмони Милали Муттањид 13 декабри соли 2006 қабул гардида, барои баимзорасонӣ, ҳамроҳшавӣ ва ба тасвибрасонӣ ба давлатҳои иштирокчӣ пешниҳод карда шудааст.

Дар моддаи 1-и Конвенсия омадааст, ки мақсади асосии Конвенсия аз ҳавасмандкунӣ, ҳимоя ва таъмини татбиқи пурра ва баробари тамоми ҳуқуқҳои инсон аз ҷониби ҳамаи маъюбон, инчунин ҳавасмандкунӣ, эҳтироми шаъну шарафи ба онҳо хос иборат аст.

Бобохонов С. С.
Муовини Сардори шуъбаи
ҳифзи давлатии ҳуқуқҳои иқтисодӣ,
иҷтимоӣ ва фарҳангии Дастгоҳи
Ваколатдор оид ба ҳуқуқи инсон
дар Ҷумҳурии Тоҷикистон