Мониторинги навгониҳои қонунгузории муҳоҷирати кишварҳои қабулкунанда

Тибқи Барномаи амали мақомоти Ваколатдор оид ба ҳуқуқи инсон дар Ҷумҳурии Тоҷикситон барои соли 2018 мониторинги навгониҳои қонунгузории муҳоҷирати кишварҳои қабулкунандаи муҳоҷирони меҳнатӣ дар соли 2018 гузаронида шуд.

Дар соли 2018 андозаи пешпардохт барои патент дар аксари минтақаҳои ФР ба тарафи зиёдшавӣ тағйир дода шуд. Масалан, андозаи пардохт барои патент дар шаҳри Москва аз 4200 рубл ба 4500 рубл, вилояти Москва аз 4000 рубл ба 4300 рубл, дар шаҳри Санкт-Петербург аз 3000 рубл ба 3500 рубл зиёд карда шуд.

Шурӯъ аз 2 феврали соли 2018 Хадамоти консулии Сафорати Ҷумҳурии Тоҷикистон дар Федератсияи Россия хизматрасонии навро доир ба иваз намудани шаҳодатномаҳои ронандагии нусхаи кӯҳна ба шаҳодатномаҳои ронандагии нусхаи нави биометрӣ ба роҳ монд.

Ба шаҳрвандони Ҷумҳурии Тоҷикистон, ки дар ҳудуди Федератсияи Россия қарор доранд, имконият фароҳам оварда шуд, то дар қаламрави Федератсияи Россия шаҳодатномаи ронандагии намунаи нави биометрӣ дастрас намоянд.

Аз натиҷаи сафари расмии Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қазоқистон 14-15 марти соли 2018 Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон оид ба реадмиссия, Протоколи иҷроияи тартиби татбиқи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон оид ба реадмиссия ва Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон оид ба тартиби будубоши шаҳрвандони Ҷумҳурии Тоҷикистон дар ҳудуди Ҷумҳурии Қазоқистон ва шаҳрвандони Ҷумҳурии Қазоқистон дар ҳудуди Ҷумҳурии Тоҷикистон ба имзо расонида шуданд.

Мутобиқи Созишнома дар бораи реадмиссия ва Протоколи иҷрои он мақомоти ваколатдори Тарафҳо тибқи тартиб ва шартҳои муайяншуда супоридан ва қабули шаҳрвандони хориҷӣ ва шахсони бешаҳрвандро, ки дар қаламрави давлатҳои якдигар ба қонунвайронкуниҳои миллӣ оид ба масъалаҳои ворид шудан, баромада рафтан ва буду бош роҳ додаанд, ба амал мебароранд.

Дар асоси Созишнома дар бораи тартиби будубоши шаҳрвандони Ҷумҳурии Тоҷикистон дар ҳудуди Ҷумҳурии Қазоқистон ва шаҳрвандони Ҷумҳурии Қазоқистон дар ҳудуди Ҷумҳурии Тоҷикистон шаҳрвандони давлатҳои Тарафҳо ҳангоми ворид гардидан ба қаламрави давлатҳои якдигар метавонанд то 30 рӯз бе бақайдгирӣ дар ҳудуди онҳо будубош намоянд, муҳлати будубоши онҳо аз рӯзи убури сарҳади давлатӣ то 90 рӯзи тақвимӣ муайян карда шудааст. Қаблан муҳлати бақайдгузорӣ барои шаҳрвандони кишвари мо дар ин давлат 5 рӯз ва муҳлати умумии будубош 1 моҳ муқаррар гардида буд.

Тибқи Созишнома оид ба ҳамкорӣ дар соҳаи муҳоҷират мақомоти ваколатдори Тарафҳо ҳуқуқ пайдо менамоянд, ки мубодилаи иттилоотро доир ба масъалаҳои муҳоҷират, бахусус оид ба теъдоди шаҳрвандони Тарафҳо, ки муваққатан дар ҳудуди давлатҳои якдигар будубош ва фаъолияти меҳнатӣ доранд, ба роҳ монанд.

Мувофиқи Ёддошти тафоҳуми ҳамкорӣ байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати меҳнат ва ҳифзи иҷтимоии аҳолии Ҷумҳурии Қазоқистон дар соҳаи меҳнат ва шуғли аҳолӣ мақомоти ваколатдори Тарафҳо ҷиҳати амалӣ кардани таҷрибаи пешрафта дар самти меҳнат ва шуғли аҳолӣ, мубодилаи маълумот оид ба талаботи бозори меҳнати якдигар ба қувваҳои коргарӣ, омодасозӣ ва сафарбарсозии муташаккилонаи шаҳрвандони Тарафҳо ҷиҳати бокортаъминсозӣ ва татбиқи дигар лоиҳаҳои муштараки соҳавӣ ҳамкорӣ ба роҳ мемонанд.

19 марти соли 2018 Маҷлиси намояндагони Маҷлиси Олии Ҷумҳурии Тоҷикистон Созишномаи ҳукумати Тоҷикистон ва Узбекистонро дар бораи мусофирати мутақобилаи шаҳрвандонро тасдиқ намуд. Тибқи созишномаи мазкур шаҳрвандони Тоҷикистон ва Узбекистон метавонанд бе гирифтани иҷозат ба муҳлати то 30 рӯз дар қаламрави тарафҳо буду бош намоянд.

Аз натиҷаи ҷаласаи Комиссияи байниҳукуматии Россия ва Тоҷикистон, ки 20 апрели соли 2018 баргузор гардид, ноиби сарвазири ФР И.Шувалов хабар дод, ки Ҳукумати ФР имконияти нарм намудани қоидаҳои муҳоҷиратиро барои шаҳрвандони Тоҷикистон мавриди баррасӣ қарор хоҳад дод. Аз ҷониби Сарвазири Тоҷикистон Қ. Расулзода пешниҳод карда шуд, ки муҳоҷирони меҳнатӣ аз Тоҷикистон, ки ба ФР ба муддати то 180 рӯз дар як сол барои кор меоянд, дар давоми 30 рӯзи аввал аз бақайдгирӣ озод карда шаванд. Инчунин аз ҷониби Тоҷикистон баррасии масъалаҳои вазъи оилавии муҳоҷирон ва инчунин таъминоти нафақавии онҳо пешниҳод карда шуд.

Дар суҳбат бо хабарнигори АМИТ “Ховар” ба муносибати Рӯзи якдилии меҳнаткашон муовини раиси Федератсияи иттифоқҳои касабаи мустақили Тоҷикистон И. Файзиев иброз намуд, ки барои танзим кардани муносибатҳои меҳнатии муҳоҷирони меҳнатӣ — аъзои иттифоқҳои касабаи мустақили Тоҷикистон бо ҷумҳуриҳои қабулкунандаи муҳоҷирати меҳнатӣ, аз ҷумла Россия, Озарбойҷон, Қазоқистон ва Беларус ёддоштҳои тафоҳум ба имзо расониданд. Тибқи ин тафоҳумномаҳо минбаъд муҳоҷирони меҳнатӣ — аъзои иттифоқҳои касабаи мустақили Тоҷикистон аз ҷониби иттифоқҳои касабаи давлати қабулкунанда ба қайд гирифта шуда, пас аз оғози фаъолияти меҳнатӣ таҳти ҳимояи онҳо қарор дода мешаванд.

Тибқи Фармони Президенти ФР В.Путин аз 12 майи соли 2018 «Дар бораи хусусиятҳои хоси истифодаи чораҳои пурзӯркунии бехатарӣ дар давраи гузаронидани Ҷоми ҷаҳон оид ба футбол дар ФР» муҳлати аз қайди муҳоҷиратӣ гузаштани шаҳрвандони хориҷӣ дар давоми ду моҳ — аз 25 май то 25 июли соли 2018 дар шаҳрҳои Москва, Қазон, Санкт-Петербург, Екатеринбург, Калининград, Нижний Новгород, Волгоград, Ростови лаби Дон, Саранск, Сочи ва Самараи Федератсияи Россия 3 рӯзи тақвимӣ муқаррар карда шуд.

27 июни соли 2018 аз ҷониби Президенти ФР В.Путин Қонуни Федералӣ «Дар бораи ворид намудани тағйиру иловаҳо ба Қонуни Федералӣ «Дар бораи баҳисобгирии муҳоҷиратии шаҳрвандони хориҷӣ ва бешаҳрванд дар ФР» ба имзо расонида шуд. Тибқи тағйиру иловаҳои мазкур мафҳуми «баҳисобгирии муҳоҷиратӣ дар ҷойи буду бош», «ҷойи буду боши шаҳрвандони хориҷӣ», «тарафи қабулкунанда», инчунин асосҳо барои ба ҳисоб гирифтани шаҳрвандони хориҷӣ тавзеҳ дода шуданд. Тибқи қонуни мазкур минбаъд корфармоёни шаҳрвандони хориҷӣ наметавонанд муҳоҷирони меҳнатиро дар ҷойи буду бош дар суроғаи ташкилоти худ ба қайди муҳоҷиратӣ монанд, агар шаҳрвандони хориҷӣ воқеан дар ин суроға зиндагӣ накунанд.

Тибқи тағйироту иловаҳо ба Қонуни Федералӣ «Дар бораи вазъи Ҳуқуқии шаҳрвандони хориҷӣ дар ФР» муҳлати буду боши донишҷӯёни хориҷӣ дар ФР то тамом намудани таҳсили онҳо дароз карда шуд.

Сардори шуъбаи ҳифзи давлатиии ҳуқуқҳои
иқтисодӣ, иҷтимоӣ ва фарҳангии мақомоти
Ваколатдор оид ба ҳуқуқи инсон дар Ҷумҳурии Тоҷикситон
М.Ашӯров

Натиҷагирӣ аз фаъолияти мақомоти Ваколатдор оид ба ҳуқуқи инсон дар нимсолаи якуми соли 2018

Копия (2) 20180719_111339Санаи 19-уми июли соли 2018 дар Маркази матбуотии АМИТ «Ховар» нишасти матбуотӣ оид ба натиҷаҳои фаъолияти мақомоти Ваколатдор оид ба ҳуқуқи инсон дар нимсолаи якуми соли 2018 баргузор гардид.

Бо мақсади ҷалб намудани доираи васеи рӯзноманигорони ватаниву хориҷӣ пеш аз баргузории нишасти матбуотӣ оид ба сана ва макони баргузории нишасти матбуотӣ дар воситаҳои ахбори оммаи электронӣ, аз ҷумла дар сомонаи АМИТ «Ховар», Сомонаи ВҲИ ҶТ (www.ombudsman.tj) эълон ҷой дода шуда, тариқи алоқаи телефонӣ хабардор карда шуданд.

Дар нишасти матбуотӣ Ваколатдор оид ба ҳуқуқи инсон З.Ализода, муовини Сардори Раёсати кафолатҳои ҳуқуқи инсони Дастгоҳи иҷроияи Президенти Ҷумҳурии Тоҷикистон Ш.Каримзода, кормандони масъули мақомоти Ваколатдор оид ба ҳуқуқи инсон ва намояндагони воситаҳои ахбори омма иштирок намуданд.

Барои иштирокчиёни нишасти матбуотӣ шумораи нави «Ахбори ВҲИ», Маърӯзаҳои Ваколатдор оид ба ҳуқуқи инсон ва  Ваколатдор оид ба ҳуқуқи кӯдак ва варақаи иттилоотӣ бо забони давлатӣ ва русӣ омода ва дастрас карда шуд.

Нахуст Ваколатдор оид ба ҳуқуқи инсон дар Ҷумҳурии Тоҷикистон З.Ализода меҳмонон ва ҳозиринро хайрамақдам намуда, сипас оид ба натиҷаҳои фаъолияти мақомоти Ваколатдор оид ба ҳуқуқи инсон дар нимсолаи дуюми соли 2018 маълумоти мухтасар пешниҳод намуданд.

Зимни баромади худ З.Ализода аз дастовардҳои Ҷумҳурии Тоҷикистон дар самти риоя, эҳтиром ва ҳифзи ҳуқуқи инсон сухан ронда, қайд намуданд, ки мақомоти Ваколатдор оид ба ҳуқуқи инсон фаъолияти худро дар асоси Қонуни Ҷумҳурии Тоҷикистон «Дар бораи Ваколатдор оид ба ҳуқуқи инсон дар Ҷумҳурии Тоҷикистон» ба роҳ монда, дар нимсолаи якуми соли 2018 вобаста ба самтҳои асосии фаъолият барои ҳифз ва пешрафти ҳамаҷонибаи ҳуқуқу озодиҳои инсон корҳои мушаххасро ба анҷом расонид.

Ваколатдор оид ба ҳуқуқи инсон зимни суханронии худ оид ба самтҳои афзалиятноки фаъолияти мақомот, рушди ҳамкориҳо бо мақомоти давлатӣ, созмонҳои байналмилалӣ ва сохторҳои ҷомеаи шаҳрвандӣ ба намояндагони воситаҳои ахбори омма маълумот дода, оид ба нақшаҳои ояндаи мақомот фикру андешаҳои худро баён намуданд.

Дар қисмати дуюми нишасти матбуотӣ намояндагони воситаҳои ахбори омма вобаста ба масъалаҳои зерин саволҳо доданд:

  • Оё кам гардидани шумораи муроҷиатҳои шахсони воқеӣ ва ҳуқуқӣ натиҷаи нобоварии мардум ба мақомот нест? (Саиди Ҳайдар «Фараж»);
  • Барои чӣ мақомоти Ваколатдор оид ба ҳуқуқи инсон ба сокини шаҳри Ҳисор Буриев Н. мусоидат накард? (Саиди Ҳайдар «Фараж»);
  • Аз мушкилоти тавассути нақлиёти мусофиркаши заминӣ бурдани муҳоҷирони меҳнатӣ ба Федератсияи Россия хабар доред ва дар ин самт чи корҳоро ба сомон расонидед? (Саиди Ҳайдар «Фараж»);
  • Оё бо ниҳодҳои ҳифзи ҳуқуқи инсони дигар давлатҳо дар масъалаи ҳифзи ҳуқуқҳои муҳоҷирони меҳнатӣ ҳамкорӣ доред? (Саиди Ҳайдар «Фараж»);
  • Оё аз вазъи зиндониёни сиёсӣ дар муассисаҳои ислоҳи ҷазо хабар доред ва дар ин давра чанд вохӯрӣ бо онҳо доштед? (Искандари Фирӯз «Озодӣ»);
  • Оё пас аз пардохт намудани ҷуброни зарари иқтисодӣ ҳукми Хайрулло Мирсаидов бозбинӣ карда мешавад? (Одили Нозир «Тоҷикистон»);
  • Кумита оид ба ҳуқуқи инсони СММ хостааст, ки Зайд Саидов озод карда шавад, дар ин масъала чӣ гуфта метавонед? (Одили Нозир «Тоҷикистон»);
  • Солҳои охир ҳукмҳои иқтисодӣ сангин шудаанд, сабабашро дар чӣ мебинед? (Искандари Фирӯз «Озодӣ»);
  • Оид ба мушкилоти хариду фурӯши кӯдакон ва оқибатҳои ҳуқуқии он маълумот медодед. Дар ин самт кадом корҳо ба сомон расонида мешавад (Шаҳлои Садриддин «Ховар»);
  • Мушкилоти худкӯшии занон ва тақдири минбаъдаи кӯдакони онҳо нигаронкунанда аст, мақомоти Ваколатдор оид ба ҳуқуқи инсон дар ин самт чӣ кор мекунад? (Шаҳлои Абдуллоҳ «Озодӣ»);
  • Дар вақти таътили тобистона оё ноболиғон метавонанд кор кунанд? (Шаҳлои Абдуллоҳ «Озодӣ»);
  • Оё метавонем мужда диҳем, ки қонунгузории ҷиноятӣ гуманизатсия мешавад ва ҷазоҳои алтернативӣ пешниҳод карда мешаванд? (Искандари Фирӯз «Озодӣ»);
  • Аз қабули Қонуни ҶТ «Дар бораи зӯроварӣ дар оила» 5 сол пур мешавад, дар ин самт то ҳол кадом мушкилот ҷой дорад? (Нигинаи Давронзод «Садои Душанбе»).

Ба саволҳо аз тарафи Ваколатдор оид ба ҳуқуқи инсон ҷавобҳои муфассал ва қонеъкунанда дода шуданд.

Дар интиҳои нишасти матбуотӣ изҳори боварӣ карда шуд, ки минбаъд низ ҳамкориҳои судманди мақомот бо воситаҳои ахбори омма идома ва тавсеа меёбанд.

Хадамоти матбуотии ВҲИ ҶТ
19.07.2018

Варақаи иттилоотӣ оид ба фаъолияти Ваколатдор оид ба ҳуқуқи инсон ва Ваколатдор оид ба ҳуқуқи кӯдак дар нимсолаи якуми соли 2018

Фаъолияти намояндагиҳо ва қабулгоҳҳои ҷамъиятии ВҲИ

Айни замон дар ҷумҳурӣ 3 Намояндагӣ ва 5 Қабулгоҳи ҷамъиятии ВҲИ фаъолият менамоянд, ки дар онҳо 9 нафар мутахассисон кор мекунанд.

Ба намояндагиҳо ва қабулгоҳҳои ҷамъиятии ВҲИ асосан доир ба ҳуқуқ ба манзил (35 адад), ҳуқуқ ба таъминоти иҷтимоӣ (алимент, нафақа, кӯмакпулӣ)(140 адад), ҳуқуқи муҳоҷирони меҳнатӣ (40 адад), ҳуқуқ ба муҳокимаи одилонаи судӣ (40 адад) ва амсоли инҳо муроҷиат кардаанд.

Дар нимсолаи аввали соли 2018 намояндагиҳо ва қабулгоҳҳои ҷамъиятӣ 127 (с.2017 – 169) машваратҳои сайёри ҳуқуқӣ гузаронидаанд, ки дар онҳо зиёда аз 4100 нафар иштирок намуданд.

Баргузории конференсия, семинару мизҳои мудаввар ва иштирок дар онҳо

Дар нимсолаи аввали соли 2018 бо ибтикори мақомоти ВҲИ ва дар ҳамшарикӣ бо дигарон 25 (с.2017 — 18) мизи мудаввар гузаронида шуда, иштироки кормандони ВҲИ дар 140 (с.2017 — 100) чорабиниҳо оид ба ҷанбаҳои гуногуни ҳуқуқ ва озодиҳои инсон таъмин карда шуд.

Иттилоотонӣ ва баланд бардоштани маърифати ҳуқуқии шаҳрвандон

Дар ин давра аз ҷониби кормандони Дастгоҳи марказии ВҲИ 90 (с.2017 — 90)  ва аз ҷониби намояндагиҳо ва қабулгоҳҳои ВҲИ 57 (с.2017 — 24), ҷамъ 147 (с.2017 — 114) баромад дар воситаҳои ахбори омма таъмин карда шудааст.

Соли 2018 Маърӯзаи Ваколатдор оид ба ҳуқуқи инсон ва Ваколатдор оид ба ҳуқуқи кӯдак барои соли 2017 таҳия, ба мақомоти давлатии дар қонун пешбинигардида ирсол, бо забонҳои русӣ ва англисӣ тарҷума ва бо теъдоди 600 нусха чоп карда шуд.

Ҳамчунин бо мусоидат ҲЕЛВЕТАС Маҷмӯи санадҳои меъёрии ҳуқуқӣ дар бораи Ваколатдор оид ба ҳуқуқи инсон бо теъдоди 200 нусха нашр карда шуд.

Таҳкими ҳамкориҳои мақомоти ВҲИ

Ҳамкории ВҲИ бо мақомоти давлатии ҶТ, шарикони хориҷӣ Ваколатдорони ҳуқуқи инсони ФР ва Қазоқистон; Ваколатдорони Москва, Санкт-Петербург, Тотористон, Свердловск; Омбудсменҳои Полша, Финляндия, Норвегия, Қирғизистон, созмону ташкилотҳои байналмилалӣ ва миллӣ Барномаи Рушди СММ, ЮНИСЕФ, Созмони байналмилалии муҳоҷират, САҲА, Иттиҳоди Аврупо, “ҲЕЛВЕТАС” ва дигарон идома дода шуд.

Дар доираи ҳамкории мақомоти ВҲИ бо Донишгоҳи миллии Тоҷикистон моҳҳои январ-марти соли ҷорӣ 17 нафар донишҷӯёни соли 5-уми таҳсили ихтисоси ҳуқуқи инсони факултаи ҳуқуқшиносии ДМТ дар мақомот аз таҷрибаомӯзии пешаздипломӣ гузаштанд.

Ҳамчунин аз 25 июни соли ҷорӣ донишҷӯёни курси 4 ихтисоси ҳуқуқшиносии факултаи ҳуқуқшиносии ДМТ барои гузаштани таҷрибаомӯзии истеҳсолӣ ба мақомот омаданд.

Муроҷиатҳои шаҳрвандон

Дар нимсолаи якуми соли 2018 дар мақомоти Ваколатдор оид ба ҳуқуқи инсон 1691 (с.2017 — 2262)  муроҷиат ба қайд гирифта шудааст, ки аз онҳо 441 (с.2017 — 429) адад хаттӣ ва 1250 (с.2017 – 1833)  адад шифоҳӣ мебошанд.

Дар Дастгоҳи марказии ВҲИ 227 адад (с.2017 — 273 адад), ки аз онҳо 112 ададаш хаттӣ (с.2017 — 130) ва 115 (с.2017 — 143) адади дигараш муроҷиатҳои шифоҳӣ мебошанд.

Дар намояндагиҳо ва қабулгоҳҳои ҷамъиятии ВҲИ 1464 адад (с.2017 — 1989 адад) муроҷиат ба қайд гирифта шудааст, ки аз онҳо муроҷиатҳои хаттӣ 329 адад (с.2017 — 299 адад) ва муроҷиатҳои шифоҳӣ 1135 адад (с.2017 — 1690 адад)-ро ташкил медиҳанд.

Аз муроҷиатҳои дар Дастгоҳи марказии ВҲИ баррасишуда 23 адад (18 муроҷиати хаттӣ ва 5 муроҷиати шифоҳӣ) ё 10,1% (с.2017 — 37 адад) муроҷиатҳои шахсони воқеӣ ва ҳуқуқӣ мусбат ҳал гардидаанд.

Таснифи муроҷиатҳо

Аз 112 адад муроҷиатҳои хаттӣ, ки ба Дастгоҳи ВҲИ ворид гардидаанд, бештар ба масъалаҳои зерин мансубанд:

  • ҳуқуқ ба муҳокимаи одилонаи судӣ – 17 адад (с.2017 — 22) (норозигӣ нисбати санадҳои судӣ; кашолкорӣ дар баррасии парвандаҳо; мусоидат барои баррасии одилонаи парванда ва ғайра.)
  • ҳуқуқ ба манзил – 6 адад (с.2017 — 17) (оид ба масъалаи маскун намудан ба манзил; ҷудо намудани ҳисса аз манзили истиқоматӣ; бартараф кардани монеа дар истифодаи манзил; азонихуд кардани манзили истиқоматӣ аз ҷониби шахси дигар бо роҳи қаллобию сохтакорӣ; аъзои оилаи молик эътироф намудан; бекор кардани шартномаи хариду фуруши манзили истиқоматӣ ва ғайра.) 
  • ҳуқуқи инсон ва мақомоти ҳифзи ҳуқуқ – 11 адад (с.2017 — 16) (шикоят аз қарор ё амали (бемалии) шахси мансабдор; норозигӣ нисбати тафтишот; нисбат ба эҳтимолияти истифодаи шиканҷа; муайян набудани ҷойи нигоҳдорӣ ва ғайра.) 
  • ҳуқуқ ба таъминоти иҷтимоӣ (алимент) – 4 адад (с.2017 — 10) (муқаррар кардани алимент, саркашӣ аз пардохти алимент, иҷро нагардидани ҳалномаҳои судӣ дар ин самт, муайян набудани суроғаи ҷавобгар ва ғ.).

Дар муроҷиатҳои хаттии шаҳрвандон бештар нисбат ба қарор ё амал (беамалии) субъектони зерин шикоят карда шудааст: нисбат ба мақомоти судӣ – 26 адад; нисбат ба мақомоти корҳои дохилӣ – 10 адад; нисбат ба мақомоти покуратура – 5 адад; нисбат ба шахси ҳуқуқӣ – 2 адад.

 Муроҷиатҳои шифоҳӣ (115) бештар ба ҳуқуқу озодиҳои зерини инсон ва шаҳрванд тааллуқ доранд: ҳуқуқ ба муҳокимаи одилонаи судӣ – 10 адад; ҳуқуқи инсон ва мақомоти ҳифзи ҳуқуқ – 5 адад; ҳуқуқ ба манзил – 13 адад; ҳуқуқ ба муроҷиат – 13 адад; ҳуқуқ ба таъминоти иҷтимоӣ – 7 адад.

Такмили қонунгузорӣ оид ба ҳуқуқу озодиҳои инсон, таҳияи гузоришҳо ва иштирок дар гурӯҳҳои корӣ

Дар нимсолаи якуми соли 2018 ба 35 (с.2017 — 39 адад) санадҳои меъёрии ҳуқуқӣ хулоса пешниҳод шудааст.

Кормандони ВҲИ оид ба самтҳои фаъолияти мақомот 95 адад (с.2017 — 65 адад) гузориш, маълумот ва ахбор таҳия ва пешниҳод намудаанд.

Дар кори 16 гурӯҳҳои корӣ (с.2017 — 20) оид ба самтҳои гуногуни ҳуқуқ ва озодиҳои инсон иштироки кормандон таъмин карда шудааст.

Таҳлили вазъи ҳуқуқи инсон ва санҷишу мониторингҳо

Дар нимсолаи якуми соли 2018 тибқи Барномаи амали мақомоти ВҲИ, муроҷиатҳои шаҳрвандон, Нақшаи кори гуруҳи мониторингӣ ва супориши ВҲИ 26 (с.2017 — 24) санҷишу мониторинг ва боздидҳо гузаронида шуд.

Санҷишу мониторингҳо дар муассисаҳои иҷрои ҷазои ҷиноятӣ; тавқифгоҳҳои тафтишотӣ; тавқифгоҳҳои нигоҳдошти муваққатӣ; қисмҳои ҳарбӣ; хонаҳои маъюбон ва пиронсолон; мактаб-интернатҳо; мактаб-парастишгоҳҳо, муассисаҳои таҳсилоти миёнаи умумӣ ва ғайраҳо гузаронида шудаанд.

Ҳамчунин кормандони мақомоти ВҲИ дар 7 (с.2017 — 7) мурофиаҳои судӣ иштирок намудаанд.

Анонс: Нишасти матбуотии Ваколатдор оид ба ҳуқуқи инсон дар Ҷумҳурии Тоҷикистон

Рӯзи 19 июли соли 2018 соати  1100 дар толори Маркази матбуоти ҷумҳуриявии «Ховар», нишасти матбуотӣ доир ба фаъолияти мақомоти Ваколатдор оид ба ҳуқуқи инсон дар нимсолаи якуми соли 2018 баргузор мегардад.

Барои маълумоти бештар бо телефонҳо ва суроғаи электронии зерин тамос гиред: 221-73-17,  

E-mail: info@ombudsman.tj

Хадамоти матбуотии ВҲИ

Шабакаҳои иҷтимоӣ ва ҷавонон

шабакаБо пайдоиш ва рушди интернет инсоният дар самти шинохти сайёраи Замин ва кайҳон ба дастовардҳои назаррас ноил гардид ва имкониятҳои фаровони интернетро ҳамқадами ҳаёт ва фаъолияти худ интихоб намуд. Дар Тоҷикистон низ шурӯъ аз солҳои аввали асри 21 интернет пайдо гардида, рушд намуд. Ҳарчанд нақш ва аҳамияти интернет барои инсоният бебаҳс аст, аммо пайдоиш ва рушди унсурҳои номатлуби ба он алоқаманд моро ба он водор мекунад, ки ташвиқгари истифодаи дуруст ва мақсадноки интернет бошем.

Бо дарназардошти унсур, авомил ва хатарҳои маъмулии воқеҳ ва эҳтимол ба истиқлолияти давлат, истифодаи ғайримақсаднок ва нодурусти интернет ва шабакаҳои иҷтимоӣ низ ҳамчун хатари муосир шинохта шудааст. Дар баробари рушд ёфтани истеҳсоли компютерҳои кисагӣ ва телефонҳои дастӣ шумораи муштариёни хизматрасониҳои интернетӣ, махсусан иштирокчиёни шабакаҳои иҷтимоӣ низ бештар гардид. Шабакаҳои иҷтимоӣ яке аз ҷузъи таркибии рушдёфтаи интернет ба шумор меравад. Маҳз дар шабакаҳои иҷтимоӣ таҳдиду хатарҳои муосир нуҳуфта ва ё аёнанд. Рушд накардани як фарҳанги муайян дар истифодаи интернет дар байни истифодабарандагони он, ки аксариятро ҷавонон ташкил медиҳанд эҳтимолияти ин хатарҳоро бештар менамояд.

Дар ҳар як шабакаи иҷтимоӣ ҳазорон гурӯҳҳои алоҳида созмон дода мешавад, ки аксарияти онҳо бо номҳои мустаор ва иттилооти дурӯғ ба қайд гирифта мешаванд. Маъмурияти шабакаҳои иҷтимоӣ низ ба хотири манфиатҳои тиҷоратӣ ба муҳтавои суҳбатҳои гурӯҳ кам аҳамият медиҳанд ва қариб, ки онро назорат намекунанд.

Дуруст аст, ки дар аввал баъзе саҳифаву гурӯҳҳои дохилии шабакаҳои иҷтимоӣ бо мақсади мусоидат ба забономӯзӣ, таблиғи арзишҳои фарҳангиву сайёҳӣ, муколамаҳои ҳамсинфон, ҳамкасбон, ҳаммиллатон ва ба ин монанд самтҳо таъсис дода мешавад, вале бо бештар гардидани аъзоёну иштирокчиёни он ҳадафҳои гурӯҳ тағйир меёбад. Аз ин имконият гурӯҳҳои манфиатҷӯ истифода намуда, идеяҳои худро таблиғ мекунанд. Маҳз дар ин марҳила шабакаҳои иҷтимоӣ хатарзо мегарданд.

Яке аз хатарҳои асосии саҳифаву гурӯҳҳои баъзе шабакаҳои иҷтимоӣ дур намудани инсон аз асли иҷтимоиаш мебошад. Инсон ҳамчун мавҷудоти иҷтимоӣ дар доираи ҷомеа рушд мекунад. Берун аз ҷомеа ва бидуни муносибатҳои маъмулии инсонӣ ӯ аз асли худ дур мешавад. Бо пайвастан ба шабакаҳои иҷтимоӣ, ки дар асоси муносибати виртуалӣ ва ғайримаъмулӣ ба монанди шиносоиву суҳбату бозиву алоқаҳои виртуалӣ ва ғайра амал мекунад, инсон оҳиста-оҳиста аз муносибатҳои маъмулӣ даст мекашад. Дур шудани инсон аз асли иҷтимоиаш боиси пайдо гардидани ихтилоф дар муносибатҳои сиёсӣ, иқтисодӣ, иҷтимоӣ, фарҳагӣ ва динии ӯ мегардад. Чунин инсон нисбат ба падидаву ҳодисаҳои ҷомеа бетафовут мешавад ва дар худ маҳдуд мегардад.

Хатари дигари баъзе шабакаҳои иҷтимоӣ, ки дар рӯзҳои мо бештар ба назар мерасад, тавассути гурӯҳҳои ифротӣ мағзшӯӣ шудани ҷавонон мебошад. Бо ин васила ҷавонон иштирокчиёни шабакаҳои иҷтимоӣ ба шабакаҳои террористӣ ва экстремистӣ ҷалб гардида, барои содир намудани кирдорҳои ҷиноятӣ ва ғайра осебпазир мегарданд. Бо маҳдуд гардидан ва таҳти назорат қарор гирифтани дигар роҳу усулҳои таблиғ ва ташвиқӣ идеяҳои иртиҷоӣ ва ифротгароёна гурӯҳҳои террористӣ ва экстремистӣ аз шабакаҳои иҷтимоӣ васеъ истифода мебаранд.

Гузоштан ва паҳн намудани маълумот, махсусан сурат ва наворҳо низ дар шабакаҳои иҷтимоӣ метавонад мушкилсоз гардад. Дар натиҷаи чунин амалкард дахолат ба ҳаёти шахсӣ сурат мегирад, сирри оилавӣ, хизматӣ ва ғайра фош карда мешавад. Маълумоте, ки дар назари аввал содаву одӣ менамояд бо гузашти вақти муайян ва тағйир ёфтани вазъ метавонад, мушкилсоз гардад.

Яке аз хатарҳои дигари шабакаҳои иҷтимоӣ ин ташвиқ ва таблиғи фарҳанг ва расму оини бегона мебошад. Дар ин замина, тавассути шабакаҳои иҷтимоӣ маводу наворҳои зиёд паҳн карда мешавад, ки метавонад ба тарзи муошират, муносибат, ботину зоҳири инсон ва арзишҳои он таъсир гузорад. Ва ё инсонҳоро вобаста ба ин амалкардашон таҳқир намояд. Ҳамаи ин ба ахлоқи инсоният таъсир мегузорад ва боиси сар задани ихтилоф дар худшиносӣ, муносибатҳои хешутаборӣ, урфу одатҳои таърихан асосёфта мегардад.

Маводу маълумотҳое, ки дар шабакаҳои иҷтимоӣ гузошта мешаванд, маҳз аз тариқи иштирокчиёни он паҳн мешаванд. Шабакаҳои иҷтимоӣ маъмулан ба иштирокчии худ имкон медиҳанд, ки дар зери маводи чопшуда фикри худро нависад, тугмачаи «ба ман писанд аст»-ро пахш намояд ва ё ин маводро аз номи худ ба дӯстонаш дар доираи гурӯҳ ва ё дигар шабакаҳои иҷтимоӣ фиристонад.

Агар дар аввал шахс ба мазмуни муҳтавои мавод шинос шуда, нисбат ба он мавқеъгирӣ кунад, бо бештар гардидани маводҳо, бо мазмуни мавод шинос нашуда, мавқеъгирӣ мекунад. Имрӯзҳо ҳолатҳои зиёдеро мушоҳида кардан мумкин аст, ки иштирокчиёни шабакаҳои иҷтимоӣ маводу маълумоти хусусияти экстремистидоштаро паҳн мекунанд ва ё ҳамон тугмаи маъмулии «ба ман писанд аст»-ро пахш менамоянд, ки ин баёнгари мавқеъгирии онҳост. Дарки иттилоот аз инсон маърифати баланд, ҷаҳонбинии васеъ ва таҳаммулпазириро талаб мекунад. Одамони сатҳи маърифату ҷаҳонбинии гуногун иттилоъро ба тарзи худ мефаҳманд ва бархурд мекунанд.

Албатта атрофи масъалаҳои таҳдид ва хатарҳои эҳтимолӣ ва воқеии шабакаҳои иҷтимоӣ метавон соатҳо баҳс намуд ва мақсади мо низ инкор намудани аҳамияти интернет ба инсоният нест. Фақат бо пешниҳоди тавсияҳое ба монанди таблиғи фарҳанги истифодаи дуруст ва мақсадноки интернет ва шабакаҳои иҷтимоӣ пурзӯр намудани муқаррароти қонунгузорӣ дар ин самт, таблиғи оқибатҳои манфии истифодаи нодуруст ва ғайримақсадноки шабакаҳои иҷтимоӣ, назорати оила, ҷомеа ва давлат дар ин самт, маҳдуд намудани имкониятҳои ноболиғон барои дастрасӣ ба унсурҳои номатлуби интернет мехоҳем муносибат дар ин самт ба куллӣ тағйир дода шуда, аз дониш, тафаккур ва ақл кор гирифта шавад.

С. ҚОДИРӢ, корманди мақомоти ваколатдор оид ба ҳуқуқи инсон    

Бознашр аз рӯзномаи Ҷавонони Тоҷикистон, №26 аз 10.07.2018

Эълон!

ВАКОЛАТДОР ОИД БА ҲУҚУҚИ ИНСОН ДАР
ҶУМҲУРИИ ТОҶИКИСТОН (ВҲИ)

барои ишғоли мансаби холии маъмурии хизмати давлатии зерин озмун эълон менамояд:

  • Мутахассиси пешбари Намояндагии Ваколатдор оид ба ҳуқуқи инсон дар Вилояти Мухтори Кӯҳистони Бадахшон – 1 ҷой, маоши мансабӣ – 696,8 сомонӣ.

 

Талаботи тахассусӣ барои ишғоли мансаби мутахассиси пешбар

  • таҳсилоти олии касбӣ (ҳуқуқшиносӣ), ихтисоси ба мансаби ишғолшаванда мувофиқ, ки иҷрои самараноки вазифаҳои мансабии мазкури маъмурии хизмати давлатиро таъмин карда метавонад;
  • 1 сол собиқаи умумии меҷнатӣ;
  • кор карда тавонистан бо компютер.

 

Ҳуҷҷатҳои пешниҳодшаванда:

  • ариза ба унвони раиси комиссияи озмунӣ;
  • варақаи шахсии баҳисобгирии кадрҳо бо 2 адад акси 4х6;
  • шарҳи ҳол;
  • нусхаи ҳуҷҷатҳо дар бораи таҳсилот;
  • нусхаи дафтарчаи меҳнатӣ;
  • маълумотнома оид ба вазъи саломатӣ;
  • нусхаи шиноснома;
  • нусхаи гувоҳномаи рақами мушаххаси андозсупоранда;

 

Суроғаи қабули ҳуҷҷатҳо

734023,  шаҳри Душанбе, хиёбони Рӯдакӣ-78, тел.: 221-46-89., www.ombudsman.tj

Муҳлати қабули ҳуҷҷатҳо 21 рӯз аз рӯзи нашри эълон.

Саволномаи озмун

Семинари омӯзишии ВҲИ ҶТ барои коргузор-судяҳо

Ҳамкориҳои мақомоти ВҲИ ҶТ бо мақомоти давлатӣ ва созмонҳои байналмилалӣ беш аз пеш тақвият меёбанд. Дар ин раванд рӯзи 2 июли соли 2018 дар доираи амалисозии Барномаи таълим дар соҳаи ҳуқуқи  инсон барои солҳои 2013-2020 аз ҷониби мақомоти ВҲИ ҶТ дар ҳамкорӣ бо Суди Олии ҶТ ва Дафтари барномаҳои САҲА дар шаҳри Душанбе барои 30 нафар коромӯз-судяҳо дар Маркази таълимии судяҳои назди Суди Олии ҶТ семинари омӯзишӣ гузаронида шуд.

фото 1Семинари омӯзиширо 3 нафар тренерон, ки дар доираи амалисозии Барномаи таълим дар соҳаи ҳуқуқи инсон омода шуда буданд, роҳандозӣ намуданд. Зимни баргузории семинар А. Содиқов – корманди масъули Дастгоҳи ВҲИ ҶТ оид ба рафти амалисозии Барномаи таълим дар соҳаи ҳуқуқи  инсон барои солҳои 2013-2020 ва барномаҳои соҳавии он маълумоти мухтасар пешниҳод намуд. Сипас тренерон ба таваҷҷуҳи иштирокчиён оид ба истифодаи санадҳои миллӣ ва байналмилалӣ оид ба ҳуқуқи инсон аз љониби мақомоти судӣ, амалияи судие, ки дар онҳо санадҳои байналмилалӣ истифода шудааст ва номгўи комили ҳуқуқу озодиҳои инсон, ки дар санадҳои байналмилалӣ пешбинӣ шудааст, маълумоти муфассал пешниҳод намуданд. Донишҳои назариявии иштирокчиёни семинар бо истифода аз роҳу усулҳои интерактивӣ ва машғулиятҳои амалӣ мустаҳкам карда шуданд.

фото 2Ба иштирокчиёни чорабинӣ адабиёти соҳавӣ, ки ба фаъолияти ҳамарӯзаи онҳо мусоидат мекунад, аз ҷумла Маҷмӯаи санадҳои асосии байналмилалӣ ва миллӣ оид ба ҳуқуқи инсон, Маърӯзаи ВҲИ ҶТ барои соли 2017, Маърӯзаи ВҲК ҶТ барои соли 2017 ва ғ. дастрас карда шуданд.

Дар ҷамъбасти чорабинӣ иштирокчиёни семинар фикру ақида ва пешниҳодоти худро оид ба масъалаҳои баррасишуда баён намуданд. Аз ҷумла онҳо қайд карданд, ки гузаронидани чунин чорабиниҳо барои судяҳо дар шакли силсиласеминарҳо ва дар муддати ду-се рӯз гузаронида шаванд. Онҳо изҳор доштанд, ки маводҳои тақсимотие, ки аз ҷониби ВҲИ ҶТ пешкаш шуданд, барои фаъолияти ҳамарӯзаашон хеле муҳим буда, идома додани чунин иқдомҳо мувофиқи мақсад мебошад.

А. Содиқов — сардори шуъбаи ҳифзи давлатии ҳуқуқҳои кӯдаки Дастгоҳи ВҲИ ҶТ

Тренинги омӯзишӣ оид ба мониторинги ҳуқуқи инсон

Рӯзҳои 27-29 июни соли 2018 барои кормандони Дастгоҳи марказӣ, намояндагиҳо ва қабулгоҳҳои ҷамъиятии Ваколатдор оид ба ҳуқуқи инсон дар Ҷумҳурии Тоҷикистон дар мавзӯи «Мониторинги ҳуқуқи инсон»  тренинги омӯзишӣ гузаронида шуд. Тренинги мазкур бо ҷалби коршиносони миллӣ ва мусоидати Лоиҳаи Барномаи рушдаи СММ дар Тоҷикистон баргузор гардид.

Дар рафти тренинг масъалаҳо вобаста ба мазмун ва моҳияти мониторинги ҳуқуқи инсон, интихоби мавзӯи мониторинг, манбаъҳои маълумот, таҳлили қонунгузорӣ, таёрӣ, гузаронидан ва истифодаи маводҳо аз натиҷаи мониторинг  омӯзонида шуданд. Инчунин дар рафти тренинг вобаста ба масъалаҳои зикршуда корҳои амалӣ гузаронида шуд, ки дар он кормандон фаъолона иштирок намуданд.

Тренинги мазкур ҷиҳати баланд бардоштани иқтидори кормандон мусоидат намуда, донишҳои бадастоварда дар рафти мониторинги ҳуқуқи инсон, ки яке аз самтҳои фаъолияти мақоми Ваколатдор оид ба ҳуқуқи инсон мебошад истифода хоҳад шуд.

Хадамоти матбуотии ВҲИ