Муколамаи Ваколатдор оид ба ҳуқуқи инсон бо аҳолӣ

IMG_20190921_093042

Ваколатдор оид ба ҳуқуқи инсон дар Ҷумҳурии Тоҷикистон Умед Бобозода тибқи Барномаи амали мақомоти Ваколатдор оид ба ҳуқуқи инсон барои соли 2019 ҷиҳати вохӯрӣ ва муколама бо аҳолӣ аз 23 то 27 сентябри соли ҷорӣ ба ноҳияҳои Спитамен, Деваштич ва Б.Ғафурови вилояти Суғд сафар намуданд. Дар ин сафар Ваколатдор оид ба ҳуқуқи инсонро муовини сардори шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангии Дастгоҳи Ваколатдор оид ба ҳуқуқи инсон — Бобохонов С.С. ва муовини сардори шуъбаи ҳифзи давлатии ҳуқуқҳои кӯдаки Дастгоҳи Ваколатдор оид ба ҳуқуқи инсон — Нидоев Ҳ.Н. ҳамроҳӣ намуданд.

Дар вохӯрииҳо намояндагони мақомоти давлатӣ, ҷомеаи шаҳрвандӣ, рӯзноманигорон ва фаъолони маҳаллӣ иштирок намуданд.

Умед Бобозода дар рафти чорабинӣ ҷиҳати баланд бардоштани маърифати ҳуқуқии аҳолӣ дар бораи мақомоти Ваколатдор оид ба ҳуқуқи инсон ва фаъолияти он маълумот пешниҳод намуда, дар масъалаи риояи ҳуқуқи инсон ва дар бораи санадҳои миллӣ ва байналмилалии соҳаи ҳуқуқи инсон суханрони намуд.

Муовини сардори шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангӣ — Бобохонов С.С. дар масъалаи вазъи муҳити дастрас ба шахсони дорои маъюбият, санадҳои миллӣ ва байналмилалии танзимкунандаи ҳуқуқҳои шахсони дорои маъюбият ва пешгирии зуроварӣ дар оила маърӯза намуд.

Муовини сардори шуъбаи ҳифзи давлатии ҳуқуқҳои кӯдак — Нидоев Ҳ.Н. аз натиҷаи фаъолияти Гурӯҳи мониторингии назди мақомоти Ваколатдор оид ба ҳуқуқи инсон дар масъалаи пешгирии шиканҷа ва санадҳои танзимкунандаи он маърӯза намуд.

IMG_20190921_093004

Дар қисмати муҳокимавӣ аз ҷониби иштирокчиён оид ба мушкилоти ҷойдашта дар самти ҳуқуқи инсон саволҳо дода шуд, аз ҷумла вобаста ба ҳуқуқҳои меҳнатии  шахсони дорои маъюбият, мушкилоти ба таҳсил фаро гирифтани кӯдакон баъд аз адои ҷазо дар муассисаҳои ислоҳии кудакона, дохил гаштан ё нагаштани ҷалби кӯдакон ба шанбегиҳо барои ободонӣ ҳамчун меҳнати маҷбурӣ, ба мушкилӣ дучор шудани шахсони баъд аз адои ҷазои маҳрумӣ аз озодӣ ҳангоми ба кор даромадан, мушкилоти гирифтани шаҳрвандӣ аз ҷониби шахсоне, ки аз ҷумҳуриҳои ҳамсоя ба шаҳрвандони Тоҷикистон дар ноҳияҳои наздисарҳадӣ оила барпо намудаанд ва ғайраҳо.

Ваколатдор оид ба ҳуқуқи инсон ба саволҳои иштирокчиён ҷавобҳои мушаххас дода, хотиррасон намуданд, ки онҳо метавонанд оид ба вайроншавии ҳуқуқҳояшон ба мақомоти Ваколатдор оид ба ҳуқуқи инсон муроҷиат намоянд.

      Хадамоти матбуотии ВҲИ ҶТ

Маҷлиси Ҳукумати Ҷумҳурии Тоҷикистон

Sostoyalos-ocherednoe-zasedanie-Pravitelstva-Respubliki-Tadzhikistan30 сентябр таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид.

Дар кори маҷлис нахуст Дар бораи “Барномаи пешгирии фарбеҳӣ ва ташаккули ғизои солим дар Ҷумҳурии Тоҷикистон барои солҳои 2019-2024” гузориши вазири тандурустӣ ва ҳифзи иҷтимоии аҳолӣ Насим Олимзода шунида шуд.

Зарурати таҳияи лоиҳаи қарори мазкур афзоиши бемориҳои ғайрисироятӣ мебошад, зеро фарбеҳӣ аз ҷиҳати фавту маъюбӣ дар ҷойи намоён меистад.

Таҳлилҳо нишон медиҳанд, ки тайи солҳои охир кам истеъмол намудани нахҳои ғизоӣ ва зиёд истеъмол кардани хӯрокҳои тезтайёру чарбдор, нӯшокиҳои газноки ширин, қандҳои оддӣ ва намак ба сатҳи инкишофи бемориҳои музмини ғайрисироятӣ мусоидат кардааст.

Сарвари давлат муҳтарам Эмомалӣ Раҳмон супориш доданд, ки барои омӯзиш, пешгирӣ ва табобати фарбеҳӣ дар доираи “Стратегияи оид ба ғизо ва фаъолияти ҷисмонӣ дар Ҷумҳурии Тоҷикистон барои солҳои 2015-2024” тадбирҳои мушаххас андешида шавад.

Сипас, аъзои Ҳукумати кишвар 16 хулосаи Ҳукумати Ҷумҳурии Тоҷикистон, аз ҷумла Дар бораи пешниҳоди хулосаи Ҳукумати Ҷумҳурии Тоҷикистон ба лоиҳаи  Қонуни конститутсионии Ҷумҳурии Тоҷикистон “Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ”, Дар бораи пешниҳоди хулосаи Ҳукумати Ҷумҳурии Тоҷикистон ба лоиҳаи Қонуни конститутсионии Ҷумҳурии Тоҷикистон “Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон “Дар бораи интихоботи  вакилон ба Маҷлиси маҳаллии вакилони халқ”, Дар бораи пешниҳоди хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон “Оид ба ворид намудани тағйиру иловаҳо ба Қонуни Ҷумҳурии Тоҷикистон “Дар бораи хизмати давлатӣ”, Дар бораи пешниҳоди хулосаи Ҳукумати Ҷумҳурии Тоҷикистон ба лоиҳаи  Қонуни Ҷумҳурии Тоҷикистон “Дар бораи телевизион ва радио” ва Дар бораи пешниҳоди хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон “Дар бораи ниҳолпарварӣ”-ро муҳокима карда, барои баррасӣ ба Маҷлиси намояндагони Маҷлиси Олии Ҷумҳурии Тоҷикистон ирсол намуданд.

Дар кори маҷлис ҳамчунин масъалаҳо Дар бораи лоиҳаи Кодекси нақлиёти автомобилии Ҷумҳурии Тоҷикистон, Дар бораи лоиҳаи Кодекси оби Ҷумҳурии Тоҷикистон, Дар бораи Стратегияи миллии мутобиқшавӣ ба тағйирёбии иқлими Ҷумҳурии Тоҷикистон барои давраи то соли 2030 ва Оид ба низомномаи минтақаи озоди иқтисодии “Кӯлоб” мавриди баррасӣ қарор дода шуд.

Президенти мамлакат муҳтарам Эмомалӣ Раҳмон ба аъзои Ҳукумат, роҳбарони вазорату идораҳои давлатӣ супориш доданд, ки ҷиҳати иҷрои босифати супоришҳои маҷлиси навбатии Ҳукумати Ҷумҳурии Тоҷикистон ва истиқболи сазовори 30 — солагии Истиқлолияти давлатӣ чораҷуӣ намоянд.

Дастурҳои дигар ба Ҳукумати мамлакат, роҳбарияти вазорату идораҳои давлатӣ ва мақомоти иҷроияи ҳокимияти давлатии шаҳру ноҳияҳо вобаста ба омодагии ҳамаи бахшҳо ба маъракаи зимистонгузаронӣ, кишти тирамоҳӣ ва вусъати корҳои ободонӣ, дода шуд.

30.09.2019, шаҳри Душанбе             www.president.tj