Мизи мудаввар бахшида ба Рӯзи Парчами давлатии Ҷумҳурии Тоҷикистон

Копия (2) 20191122_161253

Имрӯз, дар мақомоти Ваколатдор оид ба ҳуқуқи инсон бо иштироки роҳбарият ва кормандони мақомот ба муносибати Рӯзи Парчами давлатии Ҷумҳурии Тоҷикистон мизи мудаввар баргузор гардид.

Чорабиниро Ваколатдор оид ба ҳуқуқи инсон  — У. Бобозода оғоз намуда, ҳозиринро ба муносибати ин санаи муҳими давлатдории навин табрик ва таҳният намуданд.  Қайд карда шуд, ки бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2009 аз ҷониби парламенти кишвар ба Қонуни Ҷумҳурии Тоҷикистон «Дар бораи рӯзҳои ид» тағйирот ворид карда шуда, ҳар сол 24 ноябр дар кишвар Рӯзи Парчами давлатӣ таҷлил мегардад. Нақши Парчам дар ҳаёти ҳар як давлат бузург буда, он ифодагаримустақилият ва соҳибихтиёрии давлат мебошад. Бинобар ин, эҳтироми волои Парчам  ин вазифаи ҳар як шаҳрванди Ҷумҳурии Тоҷикистон мебошад.

Дар мизи мудаввар Раҳимов С. – сармутахассиси шуъбаи ташкилӣ, иттилоотӣ ва таҳлилии Дастгоҳи Ваколатдор оид баҳуқуқи инсон дар мавзӯи «Парчам — шиносномаи давлату миллат» маърӯза намуд. Дар маърӯза аз таърихи парчаму парчамдории тоҷикон,  санадҳои меъёрӣ-ҳуқуқӣ оид ба Парчами имрӯзаи Тоҷикикстон ва ҷаовбгарӣ барои беэҳтиромӣ нисбати Парчам маълумот дода шуд. Қайд гардид, ки асосҳои ҳуқуқии Парчами давлатиро Конститутсияи Ҷумҳурии Тоҷикистон, қонунҳои Ҷумҳурии Тоҷикистон «Дар бораи рамзҳои давлатӣ» ва «Дар бораи рӯзҳои ид» Қарори Ҳукумати Ҷумҳурии Тоҷикистон «Дар бораи тартиби тайёр кардани Парчам ва Нишони давлатии Ҷумҳурии Тоҷикистон», Қарори Маҷлиси намояндагони Маҷлиси Олии Ҷумҳурии Тоҷикистон «Дар бораи тасдиқи Парчами давлатии Ҷумҳурии Тоҷикистон» ва дигар санадҳои меъёрию ҳуқуқӣ танзим менамоянд.

Дар ҷамбасти чорабинӣ У. Бобозода бори дигар ҳозиринро ба муносибати ҷашни Парчами давлатии Ҷумҳурии Тоҷикистон табрику таҳният намуда, қайд намуд, ки эҳтироми Парчам  ин эҳтиром ба халқи Тоҷикистон, давлату давлатдорӣ, фарҳангу маънавиёт, ватандорию ватандӯстӣ мебошад.

Хадамоти матбуотии ВҲИ ҶТ

24 ноябр — Рӯзи Парчами давлатии  Ҷумҳурии Тоҷикистон

Парчам ЧТАз соли 2009 инҷониб ҳамасола дар Ҷумҳурии Тоҷикистон 24 ноябр Рӯзи Парчами давлатӣ ҷашн гирифта мешавад. Парчаму парчамдорӣ ба мардуми мо аз гузаштагонамон мерос мондааст. Ливои Куруши Кабир ва дирафши Кова аз ҷумлаи онҳост. Давлатҳои бузурги Сосониёну Сомониён, парчамҳои пуршукуҳу зафаровари худро доштанд ва ин анъана дар давраҳои баъдина низ идома ёфта, то ба имрӯз омада расидаст. Парчам ифодагари мустақилияти ҳар як давлат буда, баҳри ҳимояи марзу бум, ватану миллат, забону фарҳанг фарзандони баору номусро зери сояи худ сарҷамъ месозад.

Дар таърихи навини давлатдории тоҷикон (дар ҳайати Иттиҳоди Шӯравӣ) низ Парчам ҳамчун рамзи давлатдорӣ истифода гардида, бо назардошит вазъи сиёсии онвақта якчанд маротиба шаклу ранги худро иваз намудааст.

Парчами кунунии Ҷумҳурии Тоҷикистон 24 ноябри соли 1992 аз ҷониби Шӯрои Олии Ҷумҳурии Тоҷикистон тасдиқ гардид, ки он аз матои росткунҷаи нафису зебои серангаи сурх, сафед ва сабз таркиб ёфтааст ва ҳар ранг маънои мушаххасро ифода менамояд.

Ранги сурх ифодагари шуҷоат ва мардонагӣ, мубориза барои озодӣ ва рамзи истиқлолияти бадастомадаи миллати тоҷик аст. Ранги сафед рамзи тозагӣ, покӣ, роҳи сафеди зиндагӣ, ояндаи дурахшони ҷумҳуриро ифода мекунад. Ранги сабз бошад рамзи табиати сабзу ҳамешабаҳори мо, сарсабзию хуррамии кишварро тасвир мекунад.

Бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2009 аз ҷониби парламенти кишвар ба Қонуни Ҷумҳурии Тоҷикистон «Дар бораи рӯзҳои ид» тағйирот ворид карда шуда, ҳар сол 24 ноябр дар кишвар Рӯзи Парчами давлатӣ таҷлил мегардад.

Инчунин бо иқдоми Сарвари давлатамон муҳтарам Эмомалӣ Раҳмон бо муносибати 20 – солагии Истиқлолияти давлатии Ҷумҳурии Тоҷикистон дар пойтахти кишварамон – шаҳри Душанбе бузургтарин Парчам, ки баландии пояи он 165 метр, дарозии матоъ 60 метр ва бараш 30 метр мебошад бунёд гардид ва боғе, ки он ҷо Парчами бузургтарини мо ҷойгир аст, “Боғи Парчами миллӣ” номгузорӣ шуд.

Тибқи муқаррароти моддаи 3 Конститутсияи Ҷумҳурии Тоҷикистон Парчам, Нишон ва Суруди миллӣ рамзҳои давлатии Ҷумҳурии Тоҷикистон ба ҳисоб мераванд. Ҷиҳати муқаррар намудани моҳият ва тартиби истифодаи рамзҳои давлатӣ Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон» аз 12 майи соли 2007 № 254 ва дигар санадҳои меъёрии ҳуқуқӣ қабул гардида, мавриди амал қарор доранд.

Тибқи муқаррароти қонуни мазкур эҳтироми волои Парчам, Нишон ва Суруди Миллӣ, аз он ҷумла аз ёд донистани Суруди Миллӣ, ифтихори миллии ҳар як шаҳрванди Ҷумҳурии Тоҷикистон мебошад.

Инчунин дар Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон» тартиби афрохтан (моддаи 5), ҷойгиркунии тасвири Парчами давлатии Ҷумҳурии Тоҷикистон (моддаи 6) ва ҷавобгарӣ барои таҳқири Парчам (моддаи 11) пешбинӣ шудааст.

Тибқи тағйиру иловаҳое, ки соли 2016 ба қонуни мазкур ворид гардид шаҳрвандони Ҷумҳурии Тоҷикистон ҳуқуқ доранд бо арзи эҳтиром Парчами давлатиро истифода намоянд.

«Тартиби тайёр кардани Парчам ва Нишони давлатии Ҷумҳурии Тоҷикистон» санади дигаре мебошад, ки бо қарори Ҳукумати Ҷумҳурии Тоҷикистон аз 30 декабри соли 2011 №659 тасдиқ шудааст ва масъалаҳоро вобаста ба тайёр кардани Парчам ва Нишони давлатии Ҷумҳурии Тоҷикистон, муайян менамояд.

Тибқи муқаррароти санади мазкур Парчами давлатии Ҷумҳурии Тоҷикистон аз ҷониби корхонаҳои ватанӣ бо риояи санадҳои меъёрии ҳуқуқии Ҷумҳурии Тоҷикистон тайёр карда мешавад. Инчунин муқаррар шудааст, ки Парчами давлатии Ҷумҳурии Тоҷикистон новобаста аз андозаи он ҳангоми тайёр кардан бояд дақиқ ба асли ранг ва асли тасвири нақшагии он, ки бо Қарори Маҷлиси намояндагони Маҷлиси Олии Ҷумҳурии Тоҷикистон аз 14 марти соли 2007, №499 «Дар бораи тасдиқ намудани Парчами давлатии Ҷумҳурии Тоҷикистон» тасдиқ шудааст, мутобиқат намояд.

Мутобиқи муқаррароти қарори Маҷлиси намояндагони Маҷлиси Олии Ҷумҳурии Тоҷикистон «Дар бораи тасдиқ намудани Парчами давлатии Ҷумҳурии Тоҷикистон» парчами давлатии Ҷумҳурии Тоҷикистон матои росткунҷа буда, дар рӯи он се рахи рангаи ба таври уфуқӣ ҷойгирифта кашида шудааст, ки рахи боло ранги сурх дошта, паҳнои он ба рахи сабзи поён баробар аст, рахи сафеди мобайн якуним баробари паҳнои яке аз рахҳои ранга мебошад. Дар рӯи рахи сафед, аз ҷои чӯбдаста дар мобайни Парчам бо зарҳал рамзи тоҷи тансиқшуда ва дар болои он ҳафт ситора дар шакли нимдоира тасвир шудааст. Таносуби бару дарозии умумии Парчам 1:2 аст.

Чи тавре дар боло зикр гардид моддаи 11 Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон» барои вайрон кардани талаботҳои он ва таҳқири рамзҳои давлатии Ҷумҳурии Тоҷикистон ҷавобгарӣ пешбинӣ намудааст. Яъне, Парчами давлатӣ таҳти ҳимояи қонун қарор дорад.

Вобаста ба беэҳтиромӣ нисбати Парчам ва дигар рамзҳои давлатӣ ҷавобгарии маъмурӣ ва ҷиноятӣ пешбини шудаааст. Моддаи 483(1) Кодекси ҳуқуқвайронкунии маъмурии Ҷумҳурии Тоҷикистон барои риоя накардани қонунгузорӣ оид ба рамзҳои давлатии Ҷумҳурии Тоҷикистон ҷавобгарии маъмуриро дар шакли ҷарима пешбинӣ намуда, моддаи 342 Кодекси ҷиноятии Ҷумҳурии Тоҷикистон барои таҳқири рамзҳои давлатӣ ҷавобгарии ҷиноӣ дар шакли ҷарима, маҳдуд кардани озодӣ ва ё маҳрум кардан аз озодиро пешбинӣ намудааст.

Парчами давлатӣ ҳамчун нишони шуҳрату сарфарозӣ, баёнгари ормонҳои миллат ва азму иродаи қавии мардум баҳри ободӣ ва гулгулшукуфоии кишвари азизамон мебошад. Он нишони шарафмандию бахту пирӯзӣ буда, шаҳрвандонро зери сояи худ мутаҳид менамояд ва ифтихори ватандории ҳар як шаҳрвандро зиёд мегардонад. Ҳамчунин парчам рамзест, ки маҳз тавассути он моро ва давлати моро дар саросари дунё мешиносанд ва онро метавон ҳамчун шиносномаи давлату миллат ном бурд. Бинобарин вазифаи муқаддаси ҳар як шаҳрванди Тоҷикистони азиз аст, ки Парчамро эҳтиром намуда, баҳри баланд бардоштан ва боз ҳам машҳур сохтани он саъю кушиш намояд.

С. Раҳимов,
сармутахассиси шуъбаи ташкилӣ
иттилоотӣ ва таҳлилии Дастгоҳи
Ваколатдор оид ба
ҳуқуқи инсон
дар 
Ҷумҳурии Тоҷикистон

Иштироки Ваколатдор оид ба ҳуқуқи инсон дар Конфронси ҷумҳуриявии илмӣ-амалӣ таҳти унвони «Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон – асосгузори низоми ҳуқуқи миллӣ»

 

IMG_2648

Ваколатдор оид ба ҳуқуқи инсон дар Ҷумҳурии Тоҷикистон — Умед Бобозода рӯзи 16 ноябри соли ҷорӣ дар конфронси байналмилалии ҷумҳуриявии илмӣ-амалӣ таҳти унвони “Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон – асосгузори низоми ҳуқуқи миллӣ” бахшида ба Рӯзи Президенти Ҷумҳурии Тоҷикистон ва 10-умин солгарди таъсисёбии Маркази миллии қонунгузории назди Президенти Ҷумҳурии Тоҷикистон, ки аз ҷониби мақомоти мазкур ташкил карда шуда буд, иштирок намуданд.

Ваколатдор оид ба ҳуқуқи инсон аҳли нишастагони конфронс ва кормандони Маркази миллии қонунгузориро бахшида ба Рӯзи Президенти Ҷумҳурии Тоҷикистон ва 10-умин солгарди таъсисёбии Маркази миллии қонунгузории назди Президенти Ҷумҳурии Тоҷикистон табрик карда, дар кору фаъолияти ояндаи мақомот муваффақиятҳои беназирро орзу намуда, ҷиҳати ташаббусҳои созандаи Президенти Ҷумҳурии Тоҷикистон дар самтҳои сиёсати дохила ва хориҷа, хусусан дар самти ҳуқуқи инсон ибрози ақида намуданд.

Дар қисмати ифтитоҳии конфронс ҳачунин намояндагон аз Дастгоҳи иҷроияи Президенти Ҷумҳурии Тоҷикистон, Маҷлиси миллии Маҷлиси Олии Ҷумҳурии Тоҷикистон, Маҷлиси намояндагони Маҷлиси Олии Ҷумҳурии Тоҷикистон, Суди конститутсионии Ҷумҳурии Тоҷикистон, Суди Олии Ҷумҳурии Тоҷикистон, Прокуратураи генералии Ҷумҳурии Тоҷикистон, Вазорати адлияи Ҷумҳурии Тоҷикистон, Вазорати корҳои дохилии Ҷумҳурии Тоҷикистон, Кумитаи давлатии амнияти миллии Тоҷикистон, Хадамоти иҷрои назди Ҳукумати Ҷумҳурии Тоҷикистон, Академияи илмҳои Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон, Агентии назорати маводи нашъаовари назди Президенти Ҷумҳурии Тоҷикистон, Агентии хизмати давлатии назди Президенти Ҷумҳурии Тоҷикистон, Донишгоҳи миллии Тоҷикистон, Донишгоҳи славянии Россия — Тоҷикистон ва дигар мақомоти давлатӣ ширкат варзиданд.

Дар қисмати дуюми кори конфронс иштирок ва суханронии олимону муҳаққиқони ҷавон оид ба ҷанбаҳои низоми ҳуқуқи миллӣ мубодилаи афкор пешбинӣ карда шуд.

Кори конфронс бахшида ба масъалаҳои муҳими таҳкиму инкишофи қонунгузории Ҷумҳурии Тоҷикистон, эҳтиром ва риояи ҳуқуқҳои инсон, ташаккули давлати ҳуқуқбунёд мавриди муҳокима қарор дода шуд.

IMG_2579

Хадамоти матбуотии ВҲИ ҶТ

Давраи навбатии муколама оид ба ҳуқуқи инсон байни Ҷумҳурии Тоҷикистон ва Иттиҳоди Аврупо дар шаҳри Душанбе

муколама барои боло 1

15 ноябри соли 2019 дар бинои муассисаи давлатии «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон муколамаи навбатӣ оид ба ҳуқуқи инсон миёни Ҷумҳурии Тоҷикистон ва Иттиҳоди Аврупо дар шаҳри Душанбе баргузор гардид, ки дар кори он Ваколатдор оид ба ҳуқуқи инсон — Умед Бобозода низ тибқи дастури Роҳбари Дастгоҳи иҷроияи Президенти Ҷумҳурии Тоҷикистон иштирок ва суханронӣ намуданд.

Дар чорабинии мазкур масъалаҳои зерин мавриди баррасӣ қарор дода шуданд: озодии иттиҳодияҳо ва иштирок дар ҳаёти сиёсӣ, озодии сухан, ҳуқуқи занон ва зуроварӣ дар оила, шиканҷа ва шароити нигоҳдошт дар муассисаҳои ислоҳӣ, озодии дин ва эътиқод, роҳ надодан ба табъиз, ҳамкориҳо дар доираи форумҳои бисёртарафа ва созмонҳои байналмилалӣ.

Дар чорабинии мазкур ҳайати Ҷумҳурии Тоҷикистон таҳти роҳбарии Раёсати кафолатҳои ҳуқуқи инсони Дастгоҳи иҷроияи Президенти Ҷумҳурии Тоҷикистон ва намояндагон аз сохторҳои давлатӣ, аз ҷумла, намояндагони Суди Олӣ, Прокуратураи генералӣ, Агентии омор, вазоратҳои адлия, фарҳанг, корҳои дохилӣ, маориф ва илм, корҳои хориҷӣ, кумитаҳои дин, танзими анъана ва ҷашну маросим, кор бо занону оила ва Ваколатдор оид ба ҳуқуқи инсон дар Ҷумҳурии Тоҷикистон ширкат варзиданд.

Копия муколама барои поён 1

Дар ҷарраёни муҳокимаи масъалаҳои ҷойдоштаи чорабинӣ аз ҷониби иштирокчиён ва аъзоёни гурӯҳи корӣ саволу ҷавоб сурат гирифта, як қатор тавсияҳою пешниҳодот вобаста ба мавзӯъҳои зикргардида манзур гардиданд.

Хадамоти матбуотии ВҲИ ҶТ

Муколамаи Ваколатдор оид ба ҳуқуқи инсон бо аҳолии ноҳияи Рашт

Рашт

Тибқи Барномаи амали мақомоти Ваколатдор оид ба ҳуқуқи инсон барои соли 2019 Ваколатдор оид ба ҳуқуқи инсон дар Ҷумҳурии Тоҷикистон Умед Бобозода ҷиҳати вохӯрӣ ва муколама бо аҳолӣ аз 11 то 13 ноябри соли ҷорӣ ба ноҳияи Рашт сафар намуд. Дар ин сафар Ваколатдор оид ба ҳуқуқи инсонро ёрдамчии Ваколатдор оид ба ҳуқуқи инсон – Салихов З., сармутахассиси шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангии Дастгоҳи Ваколатдор – оид ба ҳуқуқи инсон  — Салоҳудинов М. ҳамроҳӣ намуданд.

Умед Бобозода дар рафти чорабинӣ, ки дар он Раиси ноҳияи Рашт ва намояндагони дигар сохторҳои ноҳиявӣ ҳузур доштанд, ҷиҳати баланд бардоштани маърифати ҳуқуқии аҳолӣ дар бораи эҳтиром ва риояи ҳуқуқи инсон, мавҷуд будани асосҳои ҳуқуқии ҳимояи ҳуқуқи инсон чи дар сатҳи миллӣ ва чи дар сатҳи байналмилалӣ,  ҳамчунин вобаста ба фаъолияти Ваколатдор оид ба ҳуқуқи инсон ва нақши он дар таъмини татбиқи чораҳои таъмини ҳимояи ҳуқуқи инсон суханронӣ намуд.

Зимни вохӯрӣ Ваколатдор оид ба ҳуқуқи инсон У. Бобозода вобаста ба масъалаи риояи ҳолати гендерӣ ва таъмини ҳуқуқи занон ба корҳои хизмати давлатӣ ишора намуда, таъкид намуданд, ки масъалаи мазкур яке аз масъалаҳои рӯзмарраи замон мебошад, ки аз роҳнамоиҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳратарм Эмомалӣ Раҳмон бармеояд.

Дар ҷарраёни муҳокимаронӣ аз ҷониби иштирокчиён оид ба мушкилоти ҷойдошта дар самти ҳуқуқи инсон саволҳо дода шуд, аз ҷумла, вобаста ба ҳуқуқҳои меҳнатии шахсони гурӯҳҳои осебпазири ҷомеа, доираи татбиқи Қонуни Ҷумҳурии Тоҷикистон «Дар бораи авф» нисбати гурӯҳҳои шахсон, масъалаи бардоштани доғи судӣ баъд аз татбиқ гаштани қонуни мазкур нисбати шахсон ва ғайраҳо.

Дар қисмати хотимавӣ Ваколатдор оид ба ҳуқуқи инсон ба саволҳои иштирокчиёни муколама ҷавобҳои мушаххас дода, хотирнишон намуд, ки тамоми шаҳрвандон метавонанд оид ба вайрон  шудани ҳуқуқҳояшон ба мақомоти Ваколатдор оид ба ҳуқуқи инсон, дар ҳама ҳолатҳо ва бевосита муроҷиат намоянд.

Хадамоти матбуотии ВҲИ ҶТ

Ба истиқболи 30-солагии Конвенсияи СММ дар бораи ҳуқуқҳои кӯдак

Копия Конвенсияи хукуки кудакКонвенсияи СММ дар бораи ҳуқуқҳои кӯдак аз ҷумлаи муҳимтарин санадҳои байналмилалие мебошад, ки ҳуқуқҳои бунёдии кӯдак ва аз ҷумла яке аз ҳуқуқҳои калидии ӯ — ҳуқуқ ба таҳсилро ба танзим медарорад, зеро маърифатнокӣ омили асосии амалисозии дигар ҳуқуқҳои инсон мебошад. Конвенсияи мазкур бо қарори 44/25 Ассамблеяи Генералии СММ  аз 20 ноябри соли 1989 қабул шудааст.

Дар таърихи навини тоҷикон Конвенсияи СММ дар бораи ҳуқуқҳои кӯдак яке аз аввалин санадҳои байналмилалие мебошад, ки онро Тоҷикистони соҳибистиқлол ҳамчун узви  комилҳуқуқи Созмони Милали Муттаҳид ба тасвиб расонидааст ва соли сипаришуда 25-солагии ҳамроҳшавии Ҷумҳурии Тоҷикистон ба ин Конвенсия бо доир намудани як қатор чорабиниҳои илмиву оммавӣ ва маърифативу фароғатӣ ҷашн гирифта шуд.

Ҳукумати ҷумҳурӣ ҷиҳати иҷрои уҳдадориҳои байналмилалии худ дар доираи Конвенсия дар бораи ҳуқуқҳои кӯдак, аз ҷумла дар самти ҳуқуқи кӯдакон ба таҳсил пайваста талош намуда, тайи солҳои охир ба дастовардҳои назаррас ноил гаштааст.

Чунин талошҳои пешбарандаи Ҳукумати ҷумҳурӣ дар Қайдҳои хотимавии Кумитаи СММ оид ба ҳуқуқҳои кӯдак вобаста ба Маърӯзаи муттаҳидаи сеюм-панҷуми Ҷумҳурии Тоҷикистон оид ба рафти иҷрои Конвенсияи СММ дар бораи ҳуқуқҳои кӯдак ва протоколҳои иловагии он, ки моҳи сентябри соли 2017 дар Женева мавриди баррасӣ қарор дода шуда буд, мусбӣ арзёбӣ шудаанд.

Кумита ҳусни тафоҳум ва муколамаи бунёдкоронаи Тоҷикистонро пазироӣ намуда, муваффақиятҳои ҷумҳуриро аз ҷумла дар пешбурди тадбирҳои қонунгузорӣ, институтсионалӣ ва сиёсӣ, махсусан Қонун “Дар бораи ҳифзи ҳуқуқи кӯдак” (соли 2015) ва таъсис додани мансаби Ваколатдор оид ба ҳуқуқи кӯдак (2016) истиқбол намудааст.

Ҳамзамон, Кумита ҷиҳати боз ҳам тақвият додан ва таҳким бахшидани амалисозии муқаррароти Конвенсияи СММ дар бораи ҳуқуқҳои кӯдак ба Ҷумҳурии Тоҷикистон тавсияҳои дахлдор пешниҳод намудааст. Ҷиҳати иҷрои тавсияҳои мазкур моҳи апрели соли 2018 Нақшаи миллии амалҳо барои солҳои 2018-2022 тасдиқ ва роҳандозӣ карда шудааст.

Яке аз тавсияҳое, ки аз ҷониби Кумита пешниҳод шуда буд, андешидани чораҳо ҷиҳати баланд бардоштани сифати таҳсилот, касбияти омӯзгорон ва сохтмони муассисаҳои таълимӣ бо таваҷҷӯҳи махсус ба манотиқи деҳот ва дурдаст, инчунин ҷиҳати тақвият додани низоми таҳсилоти томактабӣ ва таъмини дастрасӣ ба он, аз ҷумла барои кӯдакон аз оилаҳои камбизоат буда, роҳҳои амалисозии он дар Нақшаи миллии амалҳо барои солҳои 2018-2022 инъикоси худро ёфтаанд.

Дар Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 26 декабри соли 2018 қайд шудааст, ки Ҳукумати ҷумҳурӣ ба соҳаи илму маориф эътибори аввалиндараҷа медиҳад ва ҷиҳати баланд бардоштани сатҳу сифати таълим ислоҳотро дар ҳамаи зинаҳои таҳсилот бомаром идома дода, мушкилоти мавҷударо давра ба давра бартараф менамояд.

Дар қатори мушкилоти мавҷудаи соҳаи маориф дар Паёми Пешвои миллат ду проблемаи асосии ҳалталаб: норасоии кадрҳои соҳибкасби омӯзгорӣ ва нокифоя будани сатҳу сифати таълим дар тамоми муассисаҳои таҳсилоти кишвар нишон дода шудаанд.

Сарвари давлат меҳнату заҳмати кормандони соҳаи маорифро баланд арзёбӣ намуда, қайд карданд, ки Ҳукумати ҷумҳурӣ минбаъд низ ғамхориро нисбати онҳо идома хоҳад дод. Ҳамзамон қайд карда шуд, ки пешрафти ҷомеа, тараққиёти илму техника ва технология тақозо мекунад, ки онҳо низ барои баланд бардоштани сатҳи касбияти худ мунтазам кӯшиш кунанд ва “Агар омӯзгор сатҳи баланди касбият надошта бошад, мо ҳеҷ гоҳ ва бо ягон восита сифати таълиму тарбияро беҳтар карда наметавонем”.

Санҷишу мониторингҳое, ки соли 2019 аз ҷониби кормандони шуъбаи ҳифзи давлатии ҳуқуқҳои кӯдаки Дастгоҳи Ваколатдор оид ба ҳуқуқи инсон дар Ҷумҳурии Тоҷикистон дар 4 муассисаҳои томактабӣ, 12 муассисаҳои таҳсилоти ҳамагонӣ ва 6 мактаб-интернат дар минтақаҳои гуногуни ҷумҳурӣ  гузаронида шуданд, бори дигар нишон медиҳанд, ки чунин проблемаҳо дар сатҳи ҷумҳурӣ вуҷуд доранд.

Ҳуқуқи дастрасӣ ба таҳсил дар Стратегияи фаъолияти ВҲИ ҶТ барои солҳои 2016-2020 яке аз самтҳои афзалиятнок муайян шудааст. Дар Стратегияи фаъолияти ВҲК ҶТ барои солҳои 2018-2020 низ бо мақсади ҳифз ва пешбурди ҳуқуқи кӯдакони маъюб ба таҳсилоти босифат дар муҳити фарогир ҳамчун самти афзалиятноки фаъолияти ВҲК муқаррар шудааст.

Таҳлилҳо нишон медиҳанд, ки ба шарофати Истиқлолияти давлатӣ ва сулҳу ваҳдати миллӣ сол аз сол нуфуси аҳолӣ дар Ҷумҳурии Тоҷикистон бо суръати баланд афзоиш меёбад ва чунин ҳолат аз Ҳукумати ҷумҳурӣ тақозо менамояд, ки ҷиҳати азнавсозӣ ва бунёди муассисаҳои нави таълимӣ пайваста чораандешӣ намояд.

Ҳукумати ҷумҳурӣ бо дарки амиқи масъалаи мазкур ҷиҳати беҳтар намудани заминаҳои моддиву техникии муассисаҳои таълимӣ ва тибқи меъёрҳои муқарраргардида таъмин намудани хонандагон бо ҷойҳои нишаст пайваста фаъолият мекунад. Аз ҷумла, қабули Барномаи давлатии рушди муассисаҳои таҳсилоти томактабӣ ва миёнаи умумии хусусӣ барои солҳои 2014-2020, Барномаи давлатии таъмини муассисањои тањсилоти умумии љумњурї бо кабинетњои фаннї ва озмоишгоњњои муљањњази таълимї барои солњои 2018- 2020 ва дигар санадҳои дахлдори соҳавӣ барои амалисозии ҳадафҳои дар боло зикршуда равона шудааст.

Дар идомаи иқдомҳои бунёдкоронаву созандаи Пешвои миллат муҳтарам Эмомалӣ Раҳмон эълон шудани солҳои 2019-2021 ҳамчун солҳои рушди деҳот, сайёҳӣ ва ҳунарҳои мардумӣ аз ҷумла ҷиҳати азнавсозӣ ва бунёди муассисаҳои нави таълимӣ такони тоза хоҳад бахшид.

Фаъолияти пайвастаи ВҲК ҶТ дар ин самт ба роҳ монда шудааст ва кормандони мақомоти ВҲИ ҶТ ҷиҳати пешбурди ҳуқуқи кӯдакон ба таҳсил ҳамчун самти афзалиятноки стратегӣ минбаъд низ кӯшиш менамоянд, ки дар доираи амалисозии Нақшаи миллии амалҳо ҷиҳати иҷрои тавсияҳо вобаста ба гузориши муттаҳидаи сеюм ва панҷуми Ҷумҳурии Тоҷикистон оид ба рафти иҷрои Конвенсияи СММ дар бораи ҳуқуқи кӯдак ва протоколҳои иловагии он барои солҳои 2018-2022 аз ҳамаи имкониятҳои мавҷуда самаранок истифода баранд.

А. Содиқов,
Сардори шуъбаи ҳифзи давлатии
ҳуқуқҳои кӯдаки Дастгоҳи
Ваколатдор оид ба ҳуқуқи инсон
дар Ҷумҳурии Тоҷикистон

Мизи мудаввар бахшида ба Рӯзи Президенти Ҷумҳурии Тоҷикистон

Копия 20191114_102702

 

Имрӯз дар мақомоти Ваколатдор оид ба ҳуқуқи инсон бахшида ба Рӯзи Президенти Ҷумҳурии Тоҷикистон дар мавзӯи «Президенти Ҷумҳурии Тоҷикистон ҳомии ҳуқуқу озодиҳои инсон ва шаҳрванд» мизи мудаввар баргузор гардид.

Дар чорабинӣ Ваколатдор оид ба ҳуқуқи инсон – У.Бобозода, Ваколатдор оид ба ҳуқуқи кӯдак — Р.Ҳабибулозода, намояндаи Дастгоҳи иҷроияи Президенти Ҷумҳурии Тоҷикистон – Д.Муминзода, намояндаи Донишкадаи идоракунии давлатии назди Президенти Ҷумҳурии Тоҷикистон – А.Каримов, роҳбарият ва кормандони мақомоти Ваколатдор оид ба ҳуқуқи инсон иштирок намуданд.

Умед Бобозода чорабиниро бо сухани ифтитоҳӣ оғоз намуда, ҳозиринро ба муносибати Рӯзи Президенти Ҷумҳурии Тоҷикистон табрику таҳният намуданд. Зикр гардид, ки Рӯзи Президенти Ҷумҳурии Тоҷикистон дар асоси Қонуни Ҷумҳурии Тоҷикистон «Дар бораи рӯзҳои ид»  ҳамасола 16 ноябр ҷашн гирифта мешавад. Нақши Президент ҳамчун Сарвари давлат дар рушду нумуи кишвари соҳибистиқлоламон аҳамияти хоса дорад. Маҳз бо заҳмату талошҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мо тавонистем, ки волоияти қонунро дар кишвар таъмин намуда, эътироф, риоя, ҳифз ва амалишавии ҳуқуқу озодиҳои инсонро таъмин намоем.

Сипас намояндагони Дастгоҳи иҷроияи Президенти Ҷумҳурии Тоҷикистон, Донишкадаи идоракунии давлатии назди Президенти Ҷумҳурии Тоҷикистон ва Сардори шуъбаи ташкилӣ, иттилоотӣ ва таҳлилии Дастгоҳи Ваколатдор оид ба ҳуқуқи инсон – Қодирӣ С. бахшида ба Рӯзи Президенти Ҷумҳурии Тоҷикистон маърӯза намуданд.

Зимни маърӯзаҳо аз таърихи пайдоиши мансаби президент, пайдоиши он дар Ҷумҳуриии Тоҷикистон, нақши президент дар пешрафти давлат ва хизматҳои шоёни Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёддоварӣ карда шуд.

Сипас иштирокчиёни мизи мудаввар оид ба мазмун ва муҳтавои маърӯзаҳо фикру мулоҳизаҳои худро баён намуданд.

Дар охир У.Бобозода ҳозиринро бо ин санаи муҳим табрик ва таҳният гуфта, барои боз ҳам содиқона дар амал татбиқ намудани сиёсати хирадмандонаи Президенти мамалакат даъват ба амал оварданд ва  ба Президенти Ҷумҳурии Тоҷикистон муҳтарам Эмомалӣ Раҳмон тансиҳатӣ, умри дароз ва амалӣ гардидани мақсадҳои некашонро таманно намуданд.

  Хадамоти матбуотии  ВҲИ ҶТ

Санади бунёдгузор дар таҳкими ҳифзи ҳуқуқу озодиҳои инсон ва шаҳрванд

????????????????????????????????????

6 ноябри соли ҷорӣ аз қабули Конститутсияи Ҷумҳурии Тоҷикис­тон 25 сол сипарӣ мегардад. Оид ба аҳамияти таърихии ин санади тақдирсоз борҳо олимону мутафаккирони соҳа ибрози ақида намудаанд. Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам  Эмомалӣ Раҳмон зимни суханронӣ дар маҷлиси тантанавӣ бахшида ба 20-умин солгарди Конститутсияи Ҷумҳурии Тоҷикистон қайд карда буданд, ки «Аввалин Конститутсияи Тоҷикистони соҳибистиқлол ҳамчун ҳуҷҷати сарнавиштсоз ва бахтномаи миллат дар роҳи эъмори давлатдории навини тоҷикон, пайвастани он бо ҷомеаи ҷаҳонӣ ва ҳифзи манфиатҳои  милливу давлатӣ, таъмини сулҳу субот, ваҳдати миллӣ ва ҳуқуқу озодиҳои инсон нақши барҷастаи таърихӣ дорад. Конститутсияи кишвар, ки таҷассумгари орзуву ормони озодандешӣ ва ғояҳои ҷовидонаи  мардуми мо мебошад, барои пойдории ҳокимияти конститутсионӣ, таҳкими рукнҳои давлатдорӣ, ноил гардидан ба пешравиҳои азими сиёсиву иқтисодӣ ва иҷтимоиву фарҳангӣ, ба вуҷуд овардани асос­ҳои ҷомеаи шаҳрвандӣ ва муҳайё намудани фазои мусоид барои ташаккули озодонаи ҳар фард заминаи мустаҳкам ва боэътимоди ҳуқуқӣ гузошт».

1559296887_unnamedКонститутсияи нави Ҷумҳурии Тоҷикистон дар давраи нисбатан душвор қабул шуд, вале, сарфи назар аз ин, ба Ҳукумати мамлакат зери роҳбарӣ ва ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам  Эмомалӣ Раҳмон муяссар гардид, ки на танҳо Конститутсияи давраи гузариш, балки санади заминавии ҳуқуқиро, ки инкишофи босуръати сиёсӣ, иқтисодӣ ва иҷтимоии Тоҷикистонро таъмин мекард ва то кунун таъмин менамояд, таҳия ва қабул намояд. Яъне, маҳз Конститутсияи ҷумҳурии соҳибистиқлоли мо ба сифати санади олии ҳуқуқӣ ҷиҳати аз байн бурдани хатаре, ки ба Истиқлолияти давлатӣ, тамомияти арзии кишвар ва ниҳоят, ба ягонагии давлат, таҳдид мекард, шароити зарурии ҳуқуқӣ муҳайё намуда, роҳро барои сулҳу субот, ваҳдати миллӣ ва ягонагии халқи тоҷик боз намуд.

Барои Тоҷикистони соҳибис­тиқлол ҳар як ҳарфи дар ин санади бузург дарҷгардида аҳамияти  хоса дорад. Ин аввалин конститутсияест, ки мардуми мо бо роҳи раъйпурсии умумихалқӣ қабул намудааст.

Ҷумҳурии Тоҷикистон баъди ба даст овардани истиқлолияти комил дар Конститутсия эълон дошт, ки Тоҷикистон давлати соҳибихтиёр, демократӣ, ҳуқуқбунёд, дунявӣ ва ягона мебошад. Кафолатнокии ҳуқуқ ва озодиҳои инсон яке аз нишонаҳои асосии давлати ҳуқуқбунёд маҳсуб меёбад. Масоили ҳуқуқи инсон дар маркази Конститутсияи Ҷумҳурии Тоҷикистон қарор дошта, яке аз принсипҳои калидии давлат ба ҳисоб меравад. Дар Конститутсияи амалкунанда боби алоҳида (боби дуюм) маҳз ба ҳуқуқ, озодӣ, вазифаҳои асосии инсон ва шаҳрванд бахшида шудааст, ки дар маҷмӯъ, дарбаргирандаи 34 модда мебошад. Дар дигар моддаҳои Конститутсия низ масъалаҳое, ки ба вазъи ҳуқуқии инсон дахл доранд, зиёданд. Яъне, муҳтавои асосии Конститутсияи имрӯзаро маҳз ҳуқуқи инсон ва шаҳрванд ташкил медиҳад.

Агар, аз як ҷониб, мавқеи конститутсионии инсон, ҳуқуқ ва озодиҳои ӯ чун арзиши олӣ — асоси давлати ҳуқуқбунёд бошад, аз ҷониби дигар, ҳолат ё вазъи ҳуқуқ ва озодиҳои  инсон, низоми ҳифзи ҳуқуқ ва озодиҳои инсон нишондиҳандаи дараҷаи  демократӣ будани давлат ба ҳисоб меравад.

Конститутсияи Ҷумҳурии Тоҷикис­тон муқаррар менамояд, ки инсон, ҳуқуқ ва озодиҳои ӯ арзиши олӣ мебошанд. Ба илова, Конститутсия консепсияи нави ҳуқуқ ва озодиҳои инсон ва шаҳрвандро дар худ дарҷ намудааст, ки дар он инсон ба таври мухтасар минбаъд чун шахсият баррасӣ мешавад. Вобаста ба ин, Конститутсия муқаррар менамояд, ки эътироф, риоя ва ҳифзи ҳуқуқ ва озодиҳои инсон ва шаҳрванд уҳдадории давлат ба ҳисоб меравад.

Бояд қайд намуд, ки ҳуқуқ ва озодиҳои инсон ва шаҳрванд на танҳо ба воситаи Конститутсия, инчунин, бо принсипҳо ва меъёрҳои ба таври умумиэътирофгардидаи ҳуқуқи байналмилалӣ низ кафолат дода мешаванд. Ин раванд, аз як ҷониб, аз воридшавии Ҷумҳурии Тоҷикистон ба ҷомеаи мутамаддини ҷаҳонӣ дарак диҳад, аз ҷониби дигар, ба ҳавасмандгардонии қонунгузорӣ дар соҳаи ҳуқуқ ва озодиҳои инсон ва шаҳрванд равона мегардад.

Месазад Эъломия дар бораи ҳуқуқ ба инкишофро, ки аз ҷониби Ассамблеяи генералии Созмони Милали Муттаҳид қабул гардидааст, ёдовар шавем. Тибқи он инкишоф ин ҷараёни ҳамаҷонибаи иқтисодӣ, иҷтимоӣ, фарҳангӣ ва сиёсӣ мебошад, ки ба болоравии доимии вазъи зиндагии аҳолӣ дар асоси иштироки фаъолона, озодии онҳо дар ташкил ва тақсимоти оқилонаи мусоид равона гардидааст. Ҳамин тариқ, меъёрҳои байналмилалӣ ҳуқуқи инсон ва шаҳрвандро бевосита ба озодиҳои сиёсӣ ва инкишофи иқтисодии ҷомеа алоқаманд медонад.

Дар Конститутсияи Ҷумҳурии Тоҷикистон консепсияи «ҳуқуқи табиӣ» — и инсон дарҷ гардидааст, чунки ҳуқуқҳои инсон аз ҷониби давлат «туҳфа» не, балки эътироф мешаванд.

Ҳамин тавр, уҳдадориҳои давлат оид ба эътироф, риоя ҳифзи ҳуқуқ, озодиҳои инсон ва шаҳрванд онро мефаҳмонад, ки давлат:

— ҳуқуқ ва озодиҳои ҷудонашавандаи инсонро, ки аллакай ба ӯ аз лаҳзаи таваллуд тааллуқ доранд, эътироф менамояд;

— онҳоро риоя менамояд, яъне, барои амалишавии ҳуқуқҳои инсон шароит фароҳам меорад (мисол, давлат барои пешбурди интихоботи озод ва демократӣ ба интихобкунандагон шароит фароҳам меорад);

— ҳуқуқу озодиҳоро аз ҳама гуна муноқишаю вайронкуниҳо бо роҳи муқаррар намудани доираи васеи кафолат ва амалишавии онҳо, муайян кардани  намудҳои гуногуни ҷавобгарии ҳуқуқӣ дар қонунгузорӣ, ҳимоя менамояд. Кодекси ҷиноятии Ҷумҳурии Тоҷикистон ҷавобгариро барои ҷиноятҳо ба муқобили ҳуқуқ ва озодиҳои конститутсионии инсон ва шаҳрванд пешбинӣ кардааст.

Арзиши Конститутсияи Ҷумҳурии Тоҷикистон аз он нуқтаи назар муайян мегардад, ки он воситаи асосии меъёрии ҳуқуқии таъмини ҳуқуқ, озодиҳои инсон ва шаҳрванд ба ҳисоб меравад. Дар қатори дигар афзалиятҳо ва ҳадафҳои давлат, таъмини манфиати инсон, ҳуқуқ ва озодиҳои он ҳамеша дар мадди аввал меистад. Навоварии муҳими Конститутсияи Ҷумҳурии Тоҷикис­тон маҳз дар ҳамин маънӣ ифода меёбад, зеро то ин дам, дар таърихи ватани мо дар ягон маврид ба ҳуқуқи шахсият афзалият дода намешуд.

Маҳз бо истифода аз меъёрҳои Конститутсия, яъне, ба хотири татбиқи меъёри конститутсионӣ, хусусан, бо дарназардошти он ки инсон ва ҳуқуқу озодиҳои ӯ меҳвари сиёсати инсондӯстонаи давлати мо бо роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад, Президенти мамлакат бо истифода аз ҳуқуқи конститутсионии худ ва бахшида ба 25 — солагии ин санади бузург Қонуни Ҷумҳурии Тоҷикистон «Дар бораи авф» — ро ба имзо расониданд, ки он ба зиёда аз бист ҳазор нафар гумонбаршуда, айбдоршаванда, судшаванда ва маҳкумшуда татбиқ гардид. Хусусан, занон ва ноболиғон, ки барои ҷиноятҳои гуногун  маҳкум гардидаанд ва таҳти тафтишот ё баррасии судӣ қарор доранд, аз ҷазо озод карда шуданд, ки ин боз як қадами устувор дар самти ҳифзи ҳуқуқу озодиҳои инсон мебошад.

Ҳамин тариқ, бисту панҷ соли амали Конститутсияи Ҷумҳурии Тоҷикистон гувоҳи он аст, ки ин санади тақдирсози миллат воқеан ҳам ҷавобгӯи манофеи халқи кишвар мебошад ва барои пешрафту шукуфоии ин сарзамину миллати куҳанбунёд боз садсолаҳо хизмат хоҳад кард.

Пас, ҳар яки моро зарур аст, ки тибқи гуфтаҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам  Эмомалӣ Раҳмон амал намоем: «Вазифаи ҷониву муқаддаси ҳар яки мост, ки ин дастоварди бебаҳои  таърихиро тақвият бахшем ва ояндаи дурахшони ватанамонро бо заҳмати содиқонаву софдилона таъмин намуда, ба арзишу меъёрҳои Конститутсия, ки Тоҷикистонро ба ҷомеаи мутамаддини ҷаҳонӣ пайвастанд, арҷ гузорем ва дар асоси ин бахтномаи миллат дар роҳи расидан ба иҷрои ҳадафҳои созандаамон кӯшиш намоем».

Умед Бобозода,
Ваколатдор оид ба ҳуқуқи инсон
дар Ҷумҳурии Тоҷикистон,
номзади илмҳои ҳуқуқ

www.sadoimardum.tj

25-УМИН СОЛГАРДИ ҚАБУЛИ КОНСТИТУТСИЯ МУБОРАК, ҲАМВАТАНОНИ АЗИЗ!

fa55c8bad0e242eb7986dc1135b50adb_XL

Бо роҳнамоиву иштироки бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон аввалин Конститутсияи Тоҷикистони соҳибистиқлол ҳамчун ҳуҷҷати сарнавиштсоз ва бахтномаи миллат таҳия ва қабул гардид, ки дар роҳи эъмори давлатдории навини тоҷикон, пайвастани он бо ҷомеаи ҷаҳонӣ ва ҳифзи манфиатҳои милливу давлатӣ, таъмини сулҳу субот, ваҳдати миллӣ ва ҳуқуқу озодиҳои инсон нақши барҷастаи таърихӣ дорад.

Конститутсияи кишвар, ки таҷассумгари орзуву ормони озодандешӣ ва ѓояҳои ҷовидонаи мардуми мо мебошад, барои пойдории ҳокимияти конститутсионӣ, таҳкими рукнҳои давлатдорӣ, ноил гардидан ба пешравиҳои азими сиёсиву иқтисодӣ ва иҷтимоиву фарҳангӣ, ба вуҷуд овардани асосҳои ҷомеаи шаҳрвандӣ ва муҳайё намудани фазои мусоид барои ташаккули озодонаи ҳар фард заминаи мустаҳкам ва боэътимоди ҳуқуқӣ гузошт.

Яке аз масъалаи асосие, ки зимни таҳия ва қабули ҳеҷ як Конститутсия ва санадҳои ба он монанд истисно намегардад, ҳуқуқу озодиҳои инсон мебошад. Ҳуқуқҳои инсон дар конститутсия ҷойгоҳи марказиро доро буда, аз ҷумла қисми таркибӣ ва ҳатмии Конститутсияи Ҷумҳурии Тоҷикистон мебошанд. Аз 10 боб ва 100 моддаи Конститутсияи Тоҷикистон як боб ва 34 модда ба ҳуқуқ, озодӣ ва вазифаҳои асосии инсон ва шаҳрванд бахшида шудааст, ки аз се як ҳиссаи матни онро ташкил медиҳанд.

Умедворем, ки меъёрҳои Конститутсияи Ҷумҳурии Тоҷикистон давоми асрҳо ҳамчун манбаи нодири ҳуқуқӣ, таҳкимбахши пояҳои сиёсии давлатамон ва роҳнамои халқи тамаддунсози тоҷик боқӣ мемонад.

Бо истифода аз фурсати муносиб ва ифтихору шарафмандӣ 25-умин солгарди қабули Конститутсияи Тоҷикистони соҳибистиқлолро табрику таҳният гуфта, бароятон саломатӣ, саодатмандӣ, сарбаландӣ ва беҳтарин хушиҳои зиндагиро таманно менамоем.

Бо камоли эҳтиром,
роҳбарият ва ҳайати кормандони мақомоти
Ваколатдор оид ба ҳуқуқи инсон дар Ҷумҳурии Тоҷикистон

Маҷлиси тантанавӣ ба ифтихори 25-умин солгарди қабули Конститутсияи Ҷумҳурии Тоҷикистон

2019-11-04constitution4 ноябр дар Кохи Борбад ба ифтихори таҷлили 25-солагии қабули Конститутсияи  Ҷумҳурии Тоҷикистон ҷамъомади тантанавӣ баргузор шуд, ки дар он Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иштирок ва суханронӣ карданд.

Ҷамъомади тантанавӣ бо ворид шудани Сарвари давлат ба толор ва садо додани Суруди миллии Тоҷикистон оғоз ёфт.

Дар оғози суханронӣ Президенти мамлакат муҳтарам Эмомалӣ Раҳмон Конститутсияи Ҷумҳурии Тоҷикистонро инъикоскунандаи воқеияти даврони истиқлолу озодии Ватан, рушди давлат ва пешрафти миллати тамаддунсози тоҷик арзёбӣ карда, мардуми шарафманди кишварро ба муносибати санаи фархунда самимона шодбош гуфтанд.

Таъкид гардид, ки қабули Конститутсияи Тоҷикистони соҳибистиқлол, аз ҷумлаи муҳимтарин рӯйдодҳои таърихи навини халқи тоҷик ва дастоварди бузурги мардуми кишвар мебошад.

Таҷрибаи қабули конститутсия дар давлатҳои ҷаҳон, аз ҷумла дар Тоҷикистони мо баръало нишон медиҳад, ки он ҳамчун ҳуҷҷати бисёр муҳимми сиёсӣ ва санади олии ҳуқуқӣ бо истиқлоли давлатӣ робитаи ногусастанӣ дорад.

Мутаассифона, эълони истиқлол дар кишвари мо ба давраи ниҳоят мураккаби сиёсӣ ва буҳрони шадиди конститутсионӣ рост омад.

Президенти мамлакат таъкид намуданд, ки фақат қабули Конститутсия метавонист барои ҳифзи истиқлол, аз оташи ҷанги таҳмилии шаҳрвандӣ берун овардани ҷомеа, барқарор намудани  фаъолияти сохторҳои фалаҷшудаи давлатӣ, таъмин намудани амнияти миллӣ, тартиботи ҷамъиятӣ, ба Ватан баргардонидани гурезаҳо, инчунин, ҷиҳати мустаҳкам кардани заминаҳои сиёсиву ҳуқуқӣ, иҷтимоиву иқтисодӣ ва фарҳангии давлат, шароити мусоиди ҳуқуқиро фароҳам орад.

Бо дарки чунин масъулияти таърихӣ 6 ноябри соли 1994 сокинони кишвар дар фазои озод дар раъйпурсии умумихалқӣ фаъолона иштирок карда, аксари мутлақи онҳо (беш аз 87 фоиз) ба ҷонибдории Конститутсия раъйи худро изҳор доштанд.

“Бо қабули Конститутсия дар инкишофи давлатдории Тоҷикистон марҳалаи нави таърихӣ оғоз гардид ва он моро ба дигаргуниҳои азими сиёсиву ҳуқуқӣ, иқтисодиву иҷтимоӣ, фарҳангӣ ва созандагиву бунёдкорӣ роҳнамоӣ кард”, таъкид доштанд Пешвои миллат муҳтарам Эмомалӣ Раҳмон.

Меъёрҳои Конститутсия барои ҳамгироӣ бо ҷомеаи ҷаҳон замина гузоштанд ва Тоҷикистон дар як муддати кӯтоҳ ба узвияти созмонҳои бонуфузи байналмилалӣ пазируфта шуд ва бо 160 давлати дунё муносибатҳои дипломатӣ барқарор кард.

Дар охири суханронӣ Сарвари давлат муҳтарам Эмомалӣ Раҳмон изҳори боварӣ карданд, ки Конститутсияи Ҷумҳурии Тоҷикистон боз садсолаҳои дароз барои рушди ҷомеаи Тоҷикистон ва оромиву осоиши ҳар як фарди Ватан хизмат хоҳад намуд.

Ҷамъомади тантанавиро ба ифтихори 25-солагии қабули Конститутсияи Ҷумҳурии Тоҷикистон барномаи рангини идонаи консертии устодони санъат ва ҳунармандони кишвар идома дод.

04.11.2019, шаҳри Душанбе                    www.president.tj