Баргузории мизи мудаввар бахшида ба Рӯзи ҳуқуқи инсон

 

IMG_2985

Рӯзи 10 декабри соли ҷорӣ дар Китобхонаи миллии Тоҷикистон бо ташаббуси Ваколатдор оид ба ҳуқуқи инсон ва шарикони рушд бахшида ба Рӯзи байналмилалии ҳуқуқи инсон дар мавзӯи “Ҳуқуқҳои наврасон ва ҷавонон” мизи мудаввар баргузор гардид.

Дар чорабинӣ роҳбарият ва кормандони мақомоти Ваколатдор оид ба ҳуқуқи инсон дар Ҷумҳурии Тоҷикистон, намояндагони Дастгоҳи иҷроия Президенти Ҷумҳурии Тоҷикистон, Маҷлиси намояндагони Маҷлиси Олии Ҷумҳурии Тоҷикистон, мақомоти давлатӣ, корпусҳои дипломатии муқими Душанбе, муассисаҳои илмӣ, сохторҳои ҷомеаи шаҳрвандӣ ва намояндагони ВАО ширкат намуданд.

Чорабиниро Ваколатдор оид ба ҳуқуқи инсон — У.Бобозода оғоз намуда, ҳозиринро ба муносибати Рӯзи ҳуқуқи инсон табрику таҳният намуданд. У.Бобозода зимни суханронӣ қайд намуданд, ки ҳамасола 10 декабр дар тамоми ҷаҳон Рӯзи ҳуқуқи инсон ҷашн гирифта мешавад. Дар Тоҷикистон низ тибқи Қонуни Ҷумҳурии Тоҷикистон «Дар бораи рӯзҳои ид» имрӯз ҳамчун Рӯзи ҳуқуқи инсон таҷлил мешавад.

Ин ҷашн ба рӯзи қабули Эъломияи умумии ҳуқуқи инсон, ки 10 декабри соли 1948 дар шаҳри Парижи Фаронса қабул гардида буд вобастагӣ дорад. Санади мазкур дар таърихи инсоният нақши муҳим ва назаррас дошта, дар тамоми ҷаҳон ва аз ҷониби кулли одамон ҳамчун санади муътабар қабул шудааст ва зиёда аз 70 сол мешавад, ки ба халқи ҷаҳон хизмат мекунад.

Ҷумҳурии Тоҷикистон ҳамчун қисми ҷудонопазири ҷомеаи ҷаҳонӣ аз рӯзҳои аввали соҳибистиқлол гаштани худ Эъломияи мазкурро эътироф намуда, аксари санадҳои байналмилалии соҳаи ҳуқуқи инсонро ба тасвиб расонид. Онҳо қисми  таркибии низоми ҳуқуқии кишвар эътироф гардида, қонунгузории миллӣ ба онҳо мутобиқ гардонида шуданд.

Дар рафти чорабинӣ аз ҷониби иштирокчиён вобаста ба ин ҷашн суханронӣ ва дар мавзӯъҳои «Таҳкими кафолатҳои асосии ҳуқуқ ва манфиатҳои қонунии наврасон», «Ҳуқуқи инсон дар низоми таҳсили Ҷумҳурии Тоҷикистон», «Интегратсияи гурезаҳо дар Ҷумҳурии Тоҷикистон», «Амалигардони ҳуқуқ ба манзили муносиб дар Ҷумҳурии Тоҷикистон» ва дигар мавзӯъҳо маърӯзаҳо карда шуд.

Сипас иштирокчиёни мизи мудаввар оид ба маърӯзаҳо фикру мулоҳизаҳои худро баён намуданд.

Дар ҷамъбасти чорабинӣ  У.Бобозода ҳозиринро бо ин санаи муҳим табрик ва таҳният гуфта, ба кулли иштирокчиёни мизи мудаввар барои иштироки фаъолашон миннатдорӣ баён намуд.

IMGдоррапыра_2991

 Хадамоти матбуотии  ВҲИ ҶТ

Рӯзи ҳуқуқи инсон муборак, ҳамватанони азиз!

Banner

Ҳамасола 10 декабр дар тамоми ҷаҳон “Рӯзи байналмилалии ҳуқуқи инсон” ҷашн гирифта мешавад. Таърихи ин рӯз вобаста аст ба рӯзи қабули Эъломияи умумии ҳуқуқи инсон, ки 10 декабри соли 1948 дар шаҳри Парижи Фаронса қабул гардида буд. Нақши санади мазкур барои инсоният дар даврони имрӯза хеле муҳим ва назаррас мебошад.

Дар Тоҷикистон низ тибқи Қонуни Ҷумҳурии Тоҷикистон «Дар бораи рӯзҳои ид» имрӯз ҳамчун Рӯзи ҳуқуқи инсон таҷлил мегардад. Ҳар сол Рӯзи ҳуқуқи инсон ба мавзӯи муайяне бахшида мешавад. Имсол ин рӯз ба ҳуқуқҳои наврасону ҷавонон бахшида шудааст, ки асоси онро 30 – солагии қабули Конвенсияи СММ оид ба ҳуқуқи кӯдак ташкил медиҳад.

Мақсади ҷашнгирии Рӯзи ҳуқуқи инсон ин пеш аз ҳама ба ҷомеа ва ҳар як фарди он расонидани аҳамияти эҳтиром ва риояи ҳуқуқу озодиҳои инсон, нақши ҳуқуқи инсон дар таҳким ва рушди ҷомеа ва ҳаёти ҳар як фард мебошад.

Ҷумҳурии Тоҷикистон ба сифати қисми ҷудонопазири ҷомеаи ҷаҳонӣ аз рӯзҳои аввали соҳибистиқлол гаштани худ Эъломияи мазкурро эътироф намуда, аксари санадҳои байналмилалии соҳаи ҳуқуқи инсонро ба тасвиб расонид. Онҳо қисми  таркибии низоми ҳуқуқии кишвар эътироф гардида, қонунгузории миллӣ ба онҳо мутобиқ гардонида шуданд.

Тоҷикистон ҳуқуқ ва озодиҳои инсонро арзиши олӣ эътироф намуда,  барои ҳар як шахс шароити зиндагонии арзанда ва инкишофи озодонаро фароҳам меоварад. Фароҳам овардани шароити зиндагии арзанда барои ҳар як фарди ҷомеа мақсади олии давлат ва Ҳукумати Тоҷикистон мебошад.

Бо истифода аз фурсати муносиб тамоми мардуми Тоҷикистони азизро бо Рӯзи ҳуқуқи инсон табрику таҳният намуда, бароятон саломатӣ, саодатмандӣ ва мувафақиятҳои комилро дар самти таъмини риоя ва амалӣ гардидани ҳуқуқу озодиҳои инсон таманно менамоем.

Бо камоли эҳтиром,
роҳбарият
 ва ҳайати кормандони мақомоти
Ваколатдор оид ба ҳуқуқи
 инсон дар Ҷумҳурии Тоҷикистон