Ташрифи кормандони Ваколатдор оид ба ҳуқуқи инсон ба Ҳавзаи интихоботии №22 ноҳияи Мурғоби ВМКБ

0202 - копияТибқи супориши Ваколатдор оид ба ҳуқуқи инсон дар Ҷумҳурии Тоҷикистон бо мақсади шиносоӣ аз рафти омодагӣ ба интихоботи Президенти Ҷумҳурии Тоҷикистон рӯзи 23 сентябри соли 2020 кормандони Дастгоҳи Ваколатдор оид ба ҳуқуқи инсон ба Ҳавзаи интихоботии №22 ноҳияи Мурғоби Вилояти Мухтори Кӯҳистони Бадахшон ва Участкаи интихоботии №1 Ҳавзаи мазкур, ки дар бинои МТМУ №1 ҷойгир шудааст, ташриф оварданд.

Сараввал гурӯҳи корӣ бо раиси Ҳавзаи интихоботии №22 Меҳрубон Султонов оид ба рафти омодагӣ ба гузаронидани ин маъракаи муҳими сиёсӣ суҳбат доир намуданд. Маълум гардид, ки М. Султонов ба ҳайси муовини директори МТМУ №14 ноҳияи Мурғоб фаъолият намуда, дар ташкил ва гузаронидани чунин маъракаҳои муҳими сиёсӣ таҷрибаи ғанӣ дорад. Аз 15 787 нафар аҳолии ноҳия 10 500 нафар ҳуқуқи иштирок дар интихоботро доранд, ки аз онҳо 4 924 нафар занҳо мебошанд. Интихобкунандагоне, ки бори аввал дар интихобот иштирок мекунанд, 167 нафар мебошанд.

Бо мақсади муҳайё намудани шароити мусоид барои дар интихоботи Президенти Ҷумҳурии Тоҷикистон иштирок намудани 1241 нафар шахсони дорои маъюбият, камҳаракат ва имконияташон маҳдуд қуттиҳои сайёр омода карда шудаанд.

Аз суҳбат бо муовини Раиси ноҳияи Мурғоб Абдулқаюм Мурзамат, бо раиси Ҳавзаи интихоботӣ ва аз мушоҳидаҳои гурӯҳи корӣ бармеояд, ки масъулини ноҳия ҷиҳати шаффоф ва озодона гузаронидани маъракаи интихоботи Президенти Ҷумҳурии Тоҷикистон омодагии хуб доранд. Аз ҷумла ҷиҳати пешгирии паҳншавии бемории КОВИД-19 маводи зарурӣ омода карда шуда, барои иттилоотонии интихобкунандагон санадҳои дахлдори меъёрии ҳуқуқӣ, брошюраҳо, овезаҳо ва маълумотномаҳо пешниҳод шудаанд.

Инчунин барои таъмин намудани шаффофияти интихобот қуттиҳои овоздиҳӣ, кабинаҳои овоздиҳӣ ва ҷойҳои алоҳида барои мушоҳидони миллӣ ва байналмилалӣ омода шудаанд. Масъулини соҳа иброз доштанд, ки ҷиҳати таъмин намудани ҳуқуқи шаҳрвандон ба ҳаёти сиёсӣ ва дар сатҳи баланд гузаронидани маъракаи интихоботи Президенти Ҷумҳурии Тоҷикистон аз ҳамаи имкониятҳои мавҷуда истифода мебаранд.

Дар интиҳо аз ҷониби гурӯҳи кории Ваколатдор оид ба ҳуқуқи инсон ҷиҳати боз ҳам беҳтар намудани шароит барои овоздиҳии шаҳрвандон тавсияҳои дахлдор пешниҳод карда шуданд. Аз ҷумла тавсия дода шуд, ки барои ҳаракати бемонеаи шахсони дорои маъюбият дар ҳамаи участкаҳои интихоботӣ пандусҳо ва дастқапакҳо насб карда шаванд.

Хадамоти матбуотии ВҲИ

Маҷлиси Ҳукумати Ҷумҳурии Тоҷикистон

50394274252_88c97c2199_c28 сентябр таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид.

Дар оғози кори маҷлис оид ба амалигардии “Барномаи дастгирии давлатии соҳибкорӣ дар Ҷумҳурии Тоҷикистон барои солҳои 2012-2020”, ки бо қарори Ҳукумати Ҷумҳурии Тоҷикистон аз 30 апрели соли 2012, таҳти рақами 201 тасдиқ шудааст, ҳисоботи муовини якуми раиси Кумитаи давлатии сармоягузорӣ ва идораи амволи давлатӣ Шараф Шерализода шунида шуд.

Барномаи дастгирии давлатии соҳибкорӣ дар Ҷумҳурии Тоҷикистон барои солҳои 2012-2020, ки бо қарори Ҳукумати Ҷумҳурии Тоҷикистон аз 30 апрели соли 2012, №201 қабул шудааст, дар самти сиёсати дастгирии соҳибкорӣ санади бениҳоят муҳим арзёбӣ гардида, он барои гузаронидани ислоҳоти давра ба давра ва маҷмӯии қонунгузории Ҷумҳурии Тоҷикистон, навсозии истеҳсолот ва равандҳои технологӣ, ҷалби сармояи хориҷӣ ва ватанӣ, тақвияти ҳамкориҳои давлат бо бахши хусусӣ, мукаммалсозии низоми қарздиҳӣ ва молиявии дастгирии субъектҳои соҳибкории хурду миёна, пешниҳоди субсидияҳои давлатӣ ва қарзи имтиёзнок ба субъектҳои соҳибкории хурду миёна, беҳтар намудани сифат, афзун намудани хаҷми истеҳсоли маҳсулоти ватанӣ ва ба содирот нигаронидашуда, мусоидат намуд.

Қайд намудан зарур аст, ки Барномаи дастгирии давлатии соҳибкорӣ дар Ҷумҳурии Тоҷикистон барои солҳои 2012-2020 дар се марҳила (марҳилаи аввал — солҳои 2012-2014, марҳиллаи дуюм — 2015-2017 ва мархилаи сеюм — 2018-2020) дар асоси нақшаҳои чорабиниҳое, ки барои татбиқи Барномаи давлатии дастгирии соҳибкорӣ бо тартиби муқарраргардида аз ҷониби Ҳукумати Ҷумҳурии Точикистон қабул карда шуданд, татбиқ гардид.

Дар натиҷаи татбиқи Барномаи дастгирии давлатии соҳибкорӣ дар Ҷумҳурии Тоҷикистон барои солҳои 2012-2020 шумораи субъектҳои фаъолияти соҳибкории амалкунанда аз 187,0 ҳазори соли 2012 то 328,0 ҳазор дар соли 2020 расонида шуд. Дар ин раванд ҳиссаи бахши хусусӣ дар маҷмӯи маҳсулоти дохилӣ 70 фоиз, дар таъмини шуғли аҳолӣ 68 фоиз ва дар пардохти андозҳо 80 фоизро ташкил дод.

Рушди бахши хусусӣ тавассути беҳтар намудани фазои сармоягузорӣ ва дастгирии давлатии соҳибкорӣ яке аз самтҳои муҳимтарини сиёсати созандаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, Ҳукумати мамлакат мебошад ва дар даврони истиқлолият ислоҳоти куллии қонунгузорӣ дар бахшҳои сармоягузориву соҳибкорӣ гузаронида шуд.

Аз ҷумла, ташкили низоми ҳуқуқиву иқтисодии шарикии давлат ва бахши хусусӣ, муколамаи давлат бо бахши хусусӣ, содагардонии расмиёти бақайдгирии соҳибкорӣ, ба танзим даровардани санҷишҳои фаъолияти субъектҳои хоҷагидорӣ, низоми иҷозатдиҳӣ, иҷозатномадиҳӣ, ташаккули низоми андозбандӣ ва содагардонии савдои беруна ислоҳоти манфиатноке мебошанд, ки ба рушди бахши хусусӣ такони ҷиддӣ бахшиданд.

Дар 8 соли охир Ҷумҳурии Тоҷикистон мавқеи худро дар Ҳисоботи “Пешбурди соҳибкорӣ” ба таври назаррас беҳтар карда, дар натиҷаи ислоҳоти гузаронидаи Ҳукумати кишвар дар солҳои 2015 ва 2020 Ҷумҳурии Тоҷикистон ду маротиба ба қатори даҳгонаи кишварҳои ислоҳотгар шомил гардид.

Барои содаву осон намудани фаъолияти соҳибкорӣ ва ба меъёрҳои муосир баробар намудани он, низомҳои Равзанаи ягона барои барасмиятдарории амалиёти содиротиву воридотӣ ва транзитӣ, дастрас намудани иҷозати корҳои сохтмонӣ, пешниҳоди шартҳои техникӣ оид ба пайвастшавӣ ба шабакаҳои барқӣ, барои бақайдгирии амволи ғайриманқул, инчунин механизмҳои дигари муосир бо истифодаи технологияҳои электронӣ ҷорӣ гардида, ба рушди фаъолияти соҳибкорӣ мусоидат намуда истодаанд.

Дар кори маҷлиси Ҳукумати мамлакат Оид ба лоиҳаи Қонуни Ҷумҳурии Тоҷикистон “Дар бораи тайёр намудани мутахассисон бо дарназардошти талаботи бозори меҳнат” вазири меҳнат, муҳоҷират ва шуғли аҳолӣ Гулрӯ Ҷабборзода, Дар бораи “Стратегияи миллии рушди маорифи Ҷумҳурии Тоҷикистон барои давраи то соли 2030” вазири маориф ва илм Муҳаммадюсуф Имомзода ва Дар бораи “Барномаи рушди саноати мошинсозии Ҷумҳурии Тоҷикистон барои солҳои 2020-2025” вазири саноат ва технологияҳои нав Заробиддин Файзуллозода ҳисобот доданд.

Сипас,аъзои ҳукумати мамлакат лоиҳаҳои як қатор қонунҳо, аз ҷумла Дар бораи лоиҳаи Қонуни конститутсионии Ҷумҳурии Тоҷикистон “Оид ба ворид намудани тағйир ба Қонуни конститутсионии Ҷумҳурии Тоҷикистон “Дар бораи мақомоти прокуратураи Ҷумҳурии Тоҷикистон”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйир ба Қонуни Ҷумҳурии Тоҷикистон “Дар бораи мақомоти амнияти миллии Ҷумҳурии Тоҷикистон”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйир ба Қонуни Ҷумҳурии Тоҷикистон “Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйир ба Қонуни Ҷумҳурии Тоҷикистон “Дар бораи милитсия” муҳокима карданд.

Лоиҳаҳои қонунҳо Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйир ба Қонуни Ҷумҳурии Тоҷикистон “Дар бораи ҳифзи ҳуқуқҳои кӯдак” ва Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйир ба Қонуни Ҷумҳурии Тоҷикистон “Дар бораи ҳифзи иҷтимоии маъюбон” аз масъалаҳои дигар ва муҳим буд, ки аз тарафи аъзои Ҳукумат муҳокима гардида, барои баррасӣ ба Маҷлиси намояндагони Маҷлиси Олии Ҷумҳурии Тоҷикистон ирсол карда шуд.

Дар охири кори маҷлис Раиси Ҳукумати Ҷумҳурии Тоҷикистон, Пешвои миллат муҳтарам Эмомалӣ Раҳмон бори дигар таваҷҷуҳи аъзои Ҳукумати кишварро ба ҳалли масъалаҳои мубрами рӯз, иҷрои супоришҳои маҷлиси навбатии Ҳукумати ҷумҳурӣ, дастуру супоришҳои Сарвари давлат барои таъмини нақшаи тирамоҳӣ, истифодаи самараноки заминҳои наздиҳавлигӣ, тезонидани ҷамъоварии беталафи ҳосили шолӣ, маккаи дон, картошка, захираи тухмӣ, дар сатҳи зарурӣ баргузор кардани маъракаи зимистонгузаронӣ, вобаста ба камобии имсола сарфакорона истифода кардани нерӯи барқ баҳри рафъи мушкилоти фаслҳои тирамоҳу зимистони дарпешистода ва бо барқ таъмин намудани аҳолӣ ва соҳаҳои иқтисоди миллӣ, захираи кофии маводи сӯхт ва хӯрокворӣ, ҷалб карда, аз ҳамаи масъулини сохторҳои давлатӣ иҷрои ҳатмии онҳоро талаб намуданд.

28.09.2020, шаҳри Душанбе

www.president.tj

Семинари омӯзишӣ дар мавзӯи «Мафҳуми муосири маъюбият, қонунгузориҳои миллӣ ва байналмилалӣ, ки ба маъюбон равона шудааст»

IMG-20200923-WA0007Рӯзҳои 23-24 сентябри соли 2020 дар асоси ҳамкориҳои судманд байни мақомоти Ваколатдор оид ба ҳуқуқи инсон дар Ҷумҳурии Тоҷикистон, ЮНДП ва Иттиҳодияи миллии маъюбони Тоҷикистон семинари омӯзишӣ дар мавзӯи «Мафҳуми муосири маъюбият, қонунгузориҳои миллӣ ва байналмилалӣ, ки ба маъюбон равона шудааст, банақшагирӣ, назорат (мониторинг) ва омода намудани ҳисобот оиди муҳити дастрас» баргузор гардид.

Дар семинари мазкур кормандони Дастгоҳи марказии ВҲИ, Намояндагиҳо ва Қабулгоҳҳои Ваколатдор оид ба ҳуқуқи инсон дар минтақаҳо иштирок доштанд.

Дар семинар мавзӯҳои зерин мавриди омӯзиш қарордода шуд: Таъриҳи маъюбият, қонунгузории миллӣ ва байналмилалӣ, ки ба маъюбон равона шудаанд, мафҳуми таҳсили фарогир, асосҳои ҳизматрасониҳои тиббии ройгон дар муассисаҳои тиббии давлатӣ, мафҳуми муосири маъюбият, терминалогия ва этикаи дурусти муносибат бо шаҳси маъюбиятдошта, моделҳои маъюбият, мафҳум ва асосҳои муҳити дастрас ва моҳияти он барои фаъол будани шаҳсони маъюбиятдошта ва асосҳои гузаронидани мониторинги муҳити дастрас.

IMG-20200924-WA0017Мавзӯҳои зикргардида аз ҷониби коршиносон ба таври содда фаҳмонида шуд ва кормандони макомоти Ваколатдор оид ба ҳуқуқи инсон дар муҳокимаҳо, корҳои гурӯҳи, саволу ҷавобҳо ва корҳои амалӣ фаъолона иштирок намуданд.

Аз ҳулосаи коршиносон бармеояд, ки иштирокчиён мавзӯҳоро аз ҳуд намуда дар фаъолияти минбаъдаи кориашон дар самти ҳифзи ҳуқуқи маъюбон истифода мебаранд.

Аз ҷониби Раиси иттиҳодияи миллии маъюбони Тоҷикистон Зикриҳудоев А. пешниҳод гардид, ки роҳбарони Намояндагиҳо ва Қабулгоҳҳои Ваколатдор оид ба ҳуқуқи инсон дар минтақаҳо мониторинги дастрасии маъюбон гузаронанд ва аз натиҷаи он ба тарзи китобча тайёр намуда ҳамчун намуна истифода баранд.

Хадамоти матбуотии ВҲИ

Стандартҳои байналмилалӣ дар соҳаи ҳуқуқи интихобот шаффофият ва дастрасии озоди овоздиҳиро тақозо менамоянд

Интихоботи озод ва одилона яке аз воситаҳои асосии ифодаи иродаи халқ ба ҳисоб рафта, қадами муҳим дар роҳи демократикунонии ҷомеа ва амалӣ намудани ҳуқуқи иштирок дар ҳаёти сиёсӣ ва идораи давлатӣ мебошад.

Стандартҳои байналмилалии интихобот талаб менамоянд, ки давлатҳо ба шахсони таҳти салоҳияташон қарордошта ҳуқуқ ва озодиҳои иштирок дар гузаронидани интихоботро пешниҳод ва барои амалишавии онҳо чораҳои дахлдор андешанд.

Дар моддаи 21 Эъломияи умумии ҳуқуқи инсон принсипҳои асосии гузаронидани интихобот ифодаи худро ёфтаанд. Моддаи мазкур эълон менамояд, ки  «Иродаи халқ бояд асоси ҳокимияти давлатӣ бошад; ин ирода бояд ба воситаи интихоботи давра ба давра, бидуни сохтакорӣ, тавассути ҳуқуқи интихоботи умумӣ, баробар ва бо роҳи овоздиҳии пинҳонӣ ё тавассути шаклҳои дигари баробар, ки овоздиҳии озодро таъмин менамоянд, ба амал бароварда шавад».

Моддаи 25 Паймони байналмилалӣ оид ба ҳуқуқҳои шаҳрвандӣ ва сиёсӣ пешбинӣ намудааст, ки «Ҳар як шаҳрванд бояд бидуни ягон навъи табъиз ва маҳдудиятҳои беасос ҳуқуқ ва имкониятҳои дар интихоботи озоди даврӣ, ки дар асоси ҳуқуқи интихоботии умумӣ ва баробар бо овоздиҳии пинҳонӣ ва таъминкунандаи иродаи озоди интихобкунандагон доир карда мешаванд, овоз диҳад ва интихоб шавад».

Мазмун ва принсипҳои асосии таъмини ҳуқуқ ба интихобот инчунин дар Мулоҳизоти тартиби умумии  Кумитаи Созмони Милали Муттаҳид оид ба ҳуқуқи инсон аз соли 1996 № 25, Ҳуҷҷати Копенгаген (соли 1990) ва дигар санадҳои байналмилалӣ мустаҳкам карда шудааст.

Принсипҳои стандартҳои байналмилалии интихобот асоси қонунгузории интихоботии миллиро ташкил мекунанд.

Ҳуқуқи интихобот, ки дар моддаҳои 6 ва 27 Конститутсияи Ҷумҳурии Тоҷикистон пешбинӣ шудааст, шакли ифодаи озоди иродаи халқ ва иштироки он дар раванди сиёсӣ мебошад.

Санадҳои меъёрии ҳуқуқии соҳаи интихобот — қонунҳои конститутсионии Ҷумҳурии Тоҷикистон «Дар бораи интихоботи Президенти Ҷумҳурии Тоҷикистон», «Дар бораи интихоботи Маҷлиси Олии Ҷумҳурии Тоҷикистон», «Дар бораи интихоботи вакилон ба Маҷлисҳои маҳаллии вакилони халқ» ва дигарҳо кафолати ҳуқуқи интихоботро тақвият дода, шаффофият ва дастрасии озоди овоздиҳиро баланд бардоштанд.

Дар Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон “Дар бораи самтҳои асосии сиёсати доҳилӣ ва хориҷии Ҷумҳурии Тоҷикистон” аз 26 декабри соли 2019 баргузории интихобот яке аз вазифаҳои муҳими давлат ҳисобида шуда, дастур дода шуд, ки барои ба таври демократӣ ва озоду шаффоф баргузор карда шудани он тамоми чораҳо андешида шаванд. Ҳамзамон аз ҳар фарди ҷомеа тақозо карда шуд, ки дар гузаронидани ин чорабиниҳои сиёсӣ фарҳанги баланди сиёсӣ, ҳисси ватандӯстӣ ва масъулиятшиносиро нишон диҳанд.

Яке аз самтҳои муҳими фаъолияти Ваколатдор оид ба ҳуқуқи инсон дар Ҷумҳурии Тоҷикистон мусоидат ба риоя ва барқарорсозии ҳуқуқи интихоботии шаҳрвандон чун яке аз ҳуқуқҳои асосии сиёсӣ мебошад.

Бо мақсади баланд бардоштани огоҳии шаҳрвандон оид ба масъалаҳои ҳуқуқи интихоботӣ ва мониторинги рафти интихобот дар Дастгоҳи Ваколатдор оид ба ҳуқуқи инсон дар Ҷумҳурии Тоҷикистон номгӯи чорабиниҳо таҳия карда шуд, ки масъалаҳои зеринро дарбар мегиранд: гузаронидани корҳои маърифатнокӣ оид ба баланд бардоштани фарҳанги интихоботӣ, шиносоӣ бо кори участкаҳои интихоботӣ, мониторинги рафти интихобот, бурдани корҳои фаҳмонидадиҳӣ оид ба ҳуқуқи интихоботӣ, мушоҳидаи амалҳои аъзои комиссияҳои интихоботӣ, санҷиши вазъи бино, кабинаҳо ва қуттиҳои овоздиҳӣ, санҷиши мавҷудияти шароит барои овоздиҳии маъюбон ва шахсони камҳаракат ва дигарҳо.

Барои қабул ва баррасии муроҷиатҳои шахсони воқеӣ ва ҳуқуқӣ вобаста ба интихобот қабули ҳаррӯзаи шаҳрвандон дар дафтари Ваколатдор оид ба ҳуқуқи инсон ба роҳ монда шудааст.

Ҳамзамон дар давраи омодагӣ ба интихобот Ваколатдор оид ба ҳуқуқи инсон ҳамкориҳои судманди худро бо мақомоти давлатӣ, созмонҳои байналмилалӣ ва сохторҳои ҷомеаи шаҳрвандӣ ба роҳ мондааст.

Рӯзи 28 феврали соли 2020 дар асоси дастури Роҳбари Дастгоҳи иҷроияи Президенти ҶТ аз 26 феврали 2020 таҳти № 11763 (29-8) ва мактуби Вазорати корҳои хориҷӣ аз 19 феврали соли 2020 № 1/14-11 (3973) Ваколатдор оид ба ҳуқуқи инсон бо таҳлилгари Дафтари ниҳодҳои демократӣ ва ҳуқуқи инсони САҲА хонум Мерсер Кастелс Винсент воҳӯрӣ анҷом дод, ки дар он масъалаҳои гузаронидани интихоботи шаффоф ва дастрасии озоди овоздиҳӣ мавриди муҳокима қарор дода шуданд.

Бо мақсади шиносоӣ аз рафти корҳои омодагӣ ба интихоботи Президенти Ҷумҳурии Тоҷикистон кормандони Дастгоҳи Ваколатдор оид ба ҳуқуқи инсон рӯзи 22 сентябри соли 20 аз участкаи интихоботии №9 ноҳияи Исмоили Сомонии шаҳри Душанбе, участкаи  интихоботии №4  ноҳияи Шоҳмансури шаҳри Душанбе, участкаи интихоботии №31 ва №35 ноҳияи Фирдавсии шаҳри Душанбе боздид намуданд.

Шиносоии мазкур нишон дод, ки дар участкаҳои интихоботии зикргардида барои озоду шаффоф баргузор шудани интихобот шароитҳои дахлдор муҳайё карда шуда, участкаҳои  интихоботии мазкур бо маводи иттилоотии зарурӣ, ҳӯҷраҳо ва  қуттиҳои овоздиҳӣ, маводи безараргардонӣ таъмин буда, барои дар сатҳи баланд баргузор намудани ин маъракаи муҳими сиёсӣ омодаанд.

Ҳамзамон дар ҷараёни шиносоӣ барои беҳтар ба роҳ мондани кори участкаҳои интихоботӣ, дар сатҳи баланд ва шаффоф баргузор намудани интихоботи Президенти Ҷумҳурии Тоҷикистон як қатор тавсияҳою пешниҳодот манзур гардиданд.

Муқим Ашуров – сардори шуъбаи ҳифзи давлатии
ҳуқуқҳои шаҳрвандӣ ва сиёсии Дастгоҳи Ваколатдор
оид ба ҳуқуқи инсон дар Ҷумҳурии Тоҷикистон

Паёми видеоӣ дар мубоҳисаҳои умумии Иҷлосияи 75-уми Маҷмаи Умумии Созмони Милали Муттаҳид

Паёми видеоАсосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мубоҳисаҳои умумии Иҷлосияи 75-уми Маҷмаи Умумии Созмони Милали Муттаҳид, ки тариқи видеоконференсия баргузор гардид, суханронӣ намуданд.

Сарвари давлат муҳтарам Эмомалӣ Раҳмон нахуст Волкан Бозкирро ба муносибати интихоб гардиданаш ба маснади Раиси иҷлосияи 75-уми Маҷмаи Умумии Созмони Милали Муттаҳид табрик гуфта, доир ба вазъи имрӯзаи ҷаҳони муосир дар пасманзари шиддат гирифтани рақобатҳои геосиёсӣ, геоиқтисодӣ ва тавсеа ёфтани таҳдиду хатарҳои муосир, бахусус ҳамагирии коронавируси нав, ҳолатҳои ноустувору мураккаб ва ҳассоси сайёра изҳори андеша намуданд.

Тавре Сарвари давлат муҳтарам Эмомалӣ Раҳмон таъкид намуданд, бемории COVID-19, ки дар ибтидо ҳамчун буҳрони соҳаи тандурустӣ хуруҷ кард, тадриҷан боиси буҳрони иқтисодиву иҷтимоӣ ва молиявии ҷаҳонӣ гардид.

Ба таъкиди Пешвои миллат муҳтарам Эмомалӣ Раҳмон бемории сироятии коронавирус ба Ҷумҳурии Тоҷикистон низ таъсири ҷиддӣ расонида, боиси паст рафтани нишондиҳандаҳои тамоми соҳаҳои иқтисоди миллӣ, аз ҷумла фаъолияти сармоягузорӣ, ба шумули сармоягузории мустақими хориҷӣ, тиҷорати дохиливу хориҷӣ, сайёҳӣ ва хизматрасонӣ, бахусус, нақлиёт шуд.

Бо дарназардошти идомаи паҳншавии бемории коронавирус Ҳукумати Тоҷикистон имрӯзҳо кӯшиш ба харҷ медиҳад, ки дар баробари пешгирӣ аз паҳншавии бемории сироятӣ, ҷиҳати таъмин намудани фаъолияти босуботи тамоми соҳаҳои иҷтимоиву иқтисодии кишвар чораҳои зарурӣ андешад, таъкид намуданд Сарвари давлат муҳтарам Эмомалӣ Раҳмон

Дар баробари паҳншавии бемории коронавирус ва таъсири он ба соҳаҳои иқтисодию иҷтимоии кишварҳои ҷаҳон Пешвои миллат муҳтарам Эмомалӣ Раҳмон ҳамчунин аз шиддатёбӣ ва тавсеаи терроризму ифротгароӣ, ҷангу низоъҳои мусаллаҳона, ҷинояткории муташаккили фаромиллӣ, аз ҷумла муомилоти ғайриқонунии маводи мухаддир ва дигар хатару таҳдидҳои муосир низ ёдовар шуда, ин ҳолатро ниҳоят нигаронкунанда арзёбӣ намуданд ва таъкид бар он доштанд, ки рафъи таҳдиди терроризм дарку фаҳмиши омилҳои таҳрикдиҳандаи он ва сабабҳои аслии ба терроризм мусоидаткунанда, ягонагии мавқеи ҷомеаи ҷаҳониро нисбат ба мафҳуми терроризм тақозо менамояд.

Ба таъкиди Сарвари давлат муҳтарам Эмомалӣ Раҳмон ҷониби Тоҷикистон мутмаин аст, ки вокуниш ба таҳдиди афзоишёбандаи терроризм бояд фарогир бошад ва дар ин самт Созмони Милали Муттаҳид нақши ҳамоҳангсози калидиро иҷро намояд.

Тоҷикистон дар сафи пеши мубориза бо таҳдиду хатарҳои амниятӣ қарор дорад ва дар муқовимат бо терроризму ифротгароӣ, тундгароӣ, ҷинояткории муташаккили фаромиллӣ, аз ҷумла муомилоти ғайриқонунии маводи мухаддир саҳми босазои худро гузоштааст ва ин равандро идома хоҳад дод, таъкид намуданд Президенти Ҷумҳурии Тоҷикистон муҳтарам Эмомалӣ Раҳмон.

Дар идомаи суханронӣ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон доир ба тадбирҳои ҷаҳонии Тоҷикистон дар соҳаҳои обу энергетика, ҳифзи муҳити зист, мушкилоти вобаста ба тағйирёбии иқлим ва мусоидат ба таъмини сулҳу оромии сартосари дар Ҷумҳурии Исломии Афғонистон изҳори андеша намуда, аз ҷомеаи ҷаҳонӣ ҷиҳати таҳкими ҳамкорӣ дар ин самтҳо даъват ба амал оварданд.

Пешвои миллат муҳтарам Эмомалӣ Раҳмон таваҷҷуҳи ҳамаи кишварҳои узви Созмони Милали Муттаҳидро ба лоиҳаи қатъномаи навбатии Тоҷикистон оид ба Конфронси сатҳи баланд ҷиҳати арзёбии фарогири миёнамуҳлати татбиқи Ҳадафҳои Даҳсолаи байналмилалии амал “Об барои рушди устувор, 2018-2028”, ки дар Иҷлосияи 75-уми Маҷмаи Умумии Созмони Милали Муттаҳид мавриди баррасӣ қарор мегирад ҷалб намуда, изҳори боварӣ намуданд, ки ин иқдоми Тоҷикистон ба мисли қатъномаҳои гузашта дар сатҳи ҷаҳонӣ ҷонибдорӣ пайдо менамояд.

23.09.2020, шаҳри Душанбе

www.prezident.tj

Суханронӣ дар мубоҳисаҳои умумии Иҷлосияи 75-уми Маҷмаи Умумии Созмони Милали Муттаҳид

2020-09-23un_ga_sМуҳтарам ҷаноби Раис,
Муҳтарам ҷаноби Дабири кулл,
Хонумҳо ва ҷанобон!

Нахуст бо камоли майл табрику таҳнияти хешро ба ҷаноби Волкан Бозкир ба муносибати интихоб гардиданаш ба маснади Раиси иҷлоси 75-уми Маҷмаи Умумии Созмони Милали Муттаҳид иброз медорам.

Вазъи имрӯзаи ҷаҳон дар пасманзари шиддат гирифтани рақобатҳои геосиёсӣ, геоиқтисодӣ ва тавсеа ёфтани таҳдиду хатарҳои муосир, бахусус ҳамагирии коронавируси нав, боз ҳам ноустувору мураккаб ва ҳассос гардидааст.

Бемории КОВИД-19, ки дар ибтидо ҳамчун буҳрони соҳаи тандурустӣ сар зада буд, тадриҷан боиси буҳрони иқтисодиву иҷтимоӣ ва молиявии ҷаҳонӣ гардид.

Чунин вазъ, албатта, аз мо амалҳои ҳарчи бештар фаъол ва ҳамоҳангшударо тақозо менамояд.

Дар ин робита мо аз саъю кӯшишҳои Дабири кулл, ташкилоту бунёдҳо ва барномаҳои Созмони Милали Муттаҳид ҷиҳати расонидани кумаки фаврӣ ва дарозмуддат ба давлатҳои узв дар мубориза бо пайомадҳои гуманитарӣ ва иҷтимоиву иқтисодии КОВИД-19 истиқбол менамоем.

Мо, ҳамчунин, талошҳои кишварҳоро ҷиҳати ихтирои ваксинаи зидди коронавируси нав бо хушнудӣ қабул дорем.

Изҳори умед менамоем, ки он барои ҳамаи кишварҳо дастрас хоҳад гардид ва дар оянда ҷонибҳои истеҳсолкунандаи ваксина ҷиҳати дар шакли кумаки гуманитарӣ бо як миқдори он таъмин намудани табақаҳои осебпазири кишварҳои дигар, алалхусус кӯдакону занон ва пиронсолон, иқдом хоҳанд кард.

Ҳамагирии КОВИД-19 ба Ҷумҳурии Тоҷикистон низ таъсири ҷиддӣ расонида, боиси нигаронии мо гаштааст.

Дар самти пешгирӣ аз паҳншавии он мо имрӯз талош дорем, ки ҳаҷми зарурии маводи доруворӣ ва таҷҳизоти тиббиро зиёд намоем ва бо ин мақсад дар ҳамкорӣ бо Созмони ҷаҳонии тандурустӣ, кишварҳо ва шарикони рушд чораҳои зарурӣ андешида истодаем.

Созмонҳои бонуфузи байналмилалӣ оқибатҳои паҳншавии коронавирусро ҳамчун ҷараёни идомаёбанда арзёбӣ мекунанд, ки албатта, ба рушди иқтисодиёти ҷаҳон бетаъсир нахоҳад буд.

Чунин ҳолат пешорӯи рушди Тоҷикистон душвориҳои зиёди бесобиқаро ба бор меоварад.

Ҳамагирии коронавирус ба паст рафтани нишондиҳандаҳои тамоми соҳаҳои иқтисоди миллӣ, аз ҷумла фаъолияти сармоягузорӣ, ба шумули сармоягузории мустақими хориҷӣ, тиҷорати дохиливу хориҷӣ, сайёҳӣ ва хизматрасонӣ, бахусус, нақлиёт боис гаштааст.

Тоҷикистон кишвари кӯҳӣ ва маҳсур бо хушкӣ буда, захираҳои кофии нафту газ надорад.

Дар ин зимн, мо то 100 фоиз аз воридоти маводи сӯзишворӣ, ҳамчунин, дигар намудҳои молу маҳсулот, аз ҷумла озуқаворӣ ва доруворӣ, дар ҳудуди мутобиқан 80 ва 90 фоиз вобастагии ҷиддӣ дорем.

Мувофиқи арзёбии пешакӣ, бинобар таъсири манфии омилҳои иқтисодии берунаи бавуҷудомада, соли равон зарари умумӣ ба иқтисодиёти Тоҷикистон метавонад зиёда аз 2 миллиард долларро ташкил дода, дар оянда ҳам афзоиш ёбад.

Бо дарназардошти идомаи тамоюли мазкур, Ҳукумати Тоҷикистон имрӯзҳо кӯшиш ба харҷ медиҳад, ки дар баробари пешгирӣ аз паҳншавии бемории сироятӣ, ҷиҳати таъмин намудани фаъолияти босуботи тамоми соҳаҳои иҷтимоиву иқтисодии кишвар чораҳои зарурӣ андешад.

Ҷаноби Раис!

Маълум аст, ки пешбурди равандҳои созанда танҳо дар шароити субот ва амнияти пойдор имконпазир аст.

Имрӯзҳо дар баробари мавҷи бесобиқаи бемории КОВИД-19 тавсеаи миқёс ва шиддати терроризму ифротгароӣ, ҷангу низоъҳои мусаллаҳона, ҷинояткории муташаккили фаромиллӣ, аз ҷумла муомилоти ғайриқонунии маводи мухаддир ва дигар хатару таҳдидҳои муосир низ нигаронкунанда боқӣ мемонад.

Гурӯҳҳои террористиву ифротгаро ҳамоно амнияту суботи кишварҳо ва минтақаҳои гуногунро ҷиддан ноустувор мегардонанд.

Рафъи таҳдиди терроризм дарку фаҳмиши омилҳои таҳрикдиҳандаи он ва сабабҳои аслии ба терроризм мусоидаткунанда, ҳамчунин, ягонагии мавқеи ҷомеаи ҷаҳониро нисбат ба мафҳуми терроризм тақозо менамояд.

Ҳамзамон бо ин, ба ақидаи мо, таҳияи василаҳои нав ва муассири муборизаи муштарак бо терроризм, аз ҷумла бо истифода аз имкониятҳои технологии муосир ва ҳамкориву ҳамоҳангии мақомоти масъули таъмини амнияти кишварҳои узв аҳаммияти хосса дорад.

Дар баробари ин андешидани чораҳои қотеъонаи муштарак дар доираи ҳуқуқи байналмилалӣ ва худдорӣ намудан аз истифодаи меъёрҳои дугона ҳамчун омилҳои дигари муҳим арзёбӣ мегарданд.

Ҷониби Тоҷикистон мутмаин аст, ки вокуниш ба таҳдиди афзоишёбандаи терроризм бояд фарогир бошад ва дар ин самт Созмони Милали Муттаҳид нақши ҳамоҳангсози калидиро иҷро намояд.

Тоҷикистон дар сафи пеши мубориза бо таҳдиду хатарҳои амниятӣ қарор дорад ва дар муқовимат бо терроризму ифротгароӣ, тундгароӣ, ҷинояткории муташаккили фаромиллӣ, аз ҷумла муомилоти ғайриқонунии маводи мухаддир саҳми босазои худро гузоштааст ва ин равандро идома хоҳад дод.

Ба ин манзур мо бо шарикони худ ва созмонҳои байналмилалӣ, бахусус, ниҳодҳои дахлдори Созмони Милали Муттаҳид пайваста ҳамкорӣ дорем.

Зимнан мо иқдомҳои муштаракро роҳандозӣ намуда, пеш мебарем, ки аллакай, натиҷаҳои назаррас ба бор овардаанд.

Ҳоло дар кишвари мо ду Стратегияи миллӣ — яке оид ба мубориза бо терроризму ифротгароӣ ва дигаре мубориза бо гардиши ғайриқонунии маводи мухаддир дар марҳалаи ниҳоии татбиқи худ қарор доранд.

Оғози корҳои муштарак бо созмонҳои байналмилалӣ ва минтақавии шарик ҷиҳати таҳияи ин ду санад барои давраи оянда низ далели ин гуфтаҳост.

Ҳамзамон бо ин, мо риоя ва татбиқи муқаррароти санаду конвенсияҳои байналмилалии дар ин соҳаҳо қабулгардидаро зарур медонем.

Вобаста ба ин, Тоҷикистон бо сохторҳои марбутаи Созмони Милали Муттаҳид ва созмонҳои минтақавӣ, аз қабили Иттиҳоди Давлатҳои Мустақил, Созмони ҳамкории Шанхай, Созмони Аҳдномаи амнияти дастаҷамъӣ ҳамкории судманд дорад.

Дар ин самт мо, инчунин, дар сатҳи дуҷониба бо кишварҳои шарик робитаҳои ҳамкории самаранокро ба роҳ мондаем.

Комёбӣ дар амалҳои муштарак ҷиҳати пешгирӣ ва рафъи низоъҳо, ҷустуҷӯйи роҳҳои мусолиматомези баромадан аз буҳрону ихтилофҳо, пеш аз ҳама, ба истифодаи самараноки дипломатияи боздоранда ва фаъолияти миёнаравӣ вобастагӣ дорад.

Зимнан, тақвияти фаъолияти Созмон дар ин ҷода, аз ҷумла Маркази минтақавии он оид ба дипломатияи боздоранда барои Осиёи Марказӣ амри зарурӣ ба ҳисоб меравад.

Тоҷикистон, ки ҳамаи даҳшатҳои ҷанги шаҳрвандии таҳмилиро аз сар гузаронидааст, зарурати ҳифзи ҳамаҷонибаи сулҳро хуб дарк менамояд.

Аз ин ҷост, ки Тоҷикистон аз фаъолияти сулҳофарии Созмони Милали Муттаҳид истиқбол менамояд ва ҳамеша кӯшиш ба харҷ медиҳад, ки дар ин раванд ба қадри имкон ҳиссагузор бошад.

Нерӯҳои полиси мо дар амалиётҳои сулҳофарии Созмон дар Дарфур ва Судони Ҷанубӣ, ҳамчунин, дар шаҳри Абейи Судон ширкат меварзанд.

Мо ният дорем, ки минбаъд низ дар ин арса бо ниҳодҳои дахлдори Созмони Милали Муттаҳид ҳамкорӣ дошта бошем.

Бо дарназардошти таҷрибаи дар роҳи мубориза алайҳи терроризм, ифротгароӣ, маводи мухаддир андӯхтаи кишвар ва бо мақсади муаррифии таҷрибаи сулҳи тоҷикон мо ният дорем номзадии Тоҷикистонро ба узвияти ғайридоимӣ дар Шӯрои Амнияти Созмон барои солҳои 2028-2029 пешбарӣ намоем.

Мо умедворем, ки ин иқдоми Тоҷикистон аз ҷониби кишварҳои узв хуб пазируфта шуда, онҳо аз номзадии мо пуштибонӣ хоҳанд кард.

Тоҷикистон бо Афғонистон қариб 1400 километр хатти сарҳад дорад.

Дар ин замина, мо ба вазъи низомиву сиёсӣ ва иҷтимоиву иқтисодии ин кишвари ҳамҷавор таваҷҷуҳи пайваста зоҳир менамоем.

Идома ёфтани вазъи нигаронкунанда дар он зарурати андешидани тадбирҳои иловагиро ҷиҳати ҳамоҳангсозии талошҳо дар мубориза алайҳи терроризм, истеҳсолу қочоқи маводи мухаддир ва аз ҷониби ҷомеаи ҷаҳонӣ ба Ҳукумат ва мардуми он расонидани кумаки саривақтиро тақозо менамояд.

Чӣ тавре мо борҳо таъкид намудаем, қазияи Афғонистон роҳи ҳалли низомӣ надорад ва Тоҷикистон аз равандҳои музокироти сулҳофарӣ ва ҳар иқдоме, ки ба ҳалли буҳрони сиёсӣ дар Афғонистон нигаронида шудааст, комилан ҷонибдорӣ менамояд.

Тақдири Афғонистон ва ояндаи онро бояд қабл аз ҳама худи мардуми он ба даст гирад ва мо мутмаинем, ки ба истиқрори вазъ дар Афғонистон метавон танҳо аз тариқи раванди сулҳофарие расид, ки аз ҷониби худи афғонҳо идора, назорат ва пеш бурда мешавад.

Кишвари мо имсол садорати нишасти “Қалби Осиё – Раванди Истамбул”-ро ба уҳда дорад ва тайи ин давра ҷиҳати баланд бардоштани самараи амалии ин ҳамоиш талош хоҳад кард.

Тоҷикистон то имрӯз дар татбиқи чандин лоиҳаҳои муштараки минтақавии марбут ба Афғонистон саҳми худро гузоштааст.

Сохтмони хатҳои интиқоли барқ ва бунёди шаш пули фаромарзӣ аз ҷумлаи онҳост.

Мо омодаи идомаи минбаъдаи ҳамкорӣ ҷиҳати ҷалби фаъоли Афғонистон ба раванди ҳамгироии минтақавӣ ва мусоидати иқтисодиву иҷтимоӣ ба он мебошем.

Идомаи татбиқи лоиҳаҳои пайвастани шоҳроҳҳои нақлиётии ду кишвар, сохтмони хаттҳои интиқоли барқ, бахусус, CASA-1000 дар якҷоягӣ бо дигар кишварҳои минтақа, таълиму тадриси касбии мутахассисону коршиносони афғон дар соҳаҳои гуногун, аз ҷумлаи самтҳое мебошанд, ки имрӯз мо онҳоро пайгирӣ менамоем.

Ҷаноби Раис!

То анҷоми Рӯзномаи-2030 ва Ҳадафҳои рушди устувори он 10 соли дигар боқӣ мондааст.

Дар ин самт ҷомеаи ҷаҳонӣ тайи панҷ соли охир ба пешравиҳои назаррас ноил гардидааст.

Ҳамзамон бо ин, нишондиҳандаҳои молиявию иқтисодии кишварҳо, дар баробари таъсири манфии оқибатҳои ҳамагирии КОВИД-19, сари вақт амалӣ гардонидани Ҳадафҳои рушди устуворро, хоссатан, барои кишварҳои рӯ ба тараққӣ, таҳти суол қарор медиҳанд.

Пайомадҳои он барои кишвари мо ҳам, ки яке аз ҷонибҳои фаъоли ҷомеаи ҷаҳонӣ дар татбиқи Рӯзномаи-2030 мебошад, бетаъсир намемонанд.

Хотиррасон менамоям, ки Тоҷикистон дар қатори аввалин кишварҳое буд, ки Стратегияи миллии рушди худро барои давраи то соли 2030 қабул карда, онро бо Рӯзномаи-2030 мутобиқ намуд.

Ҳамзамон бо ин, кишвари мо дар соли 2017 Ҳисоботи ихтиёрии миллии худро пешниҳод карда, дастовардҳояшро дар ҷодаи ноил шудан ба Ҳадафҳои рушди устувор муаррифӣ намуд.

Мо умедворем, ки Даҳсолаи амал барои татбиқи ҳадафҳои ҷаҳонӣ ба дарёфти роҳҳои ҳалли пойдори чунин мушкилоти мубрами ҷаҳонӣ, ба монанди тағйирёбии иқлим, фақр, нобаробарии гендерӣ ва маблағгузорӣ мусоидат хоҳад кард.

Зимнан, мушкилоти марбут ба тағйирёбии иқлимро, ки дар ин раванд ба кишварҳои гуногун, аз ҷумла Тоҷикистон монеаи ҷиддӣ эҷод менамоянд, бояд ба таври хосса зикр кард.

Тӯли 60 соли охир ҳарорати миёнаи солонаи ҳаво дар Тоҷикистон то як дараҷа баланд шудааст.

Вобаста ба ин, шумораи рӯзҳои боришоти шадид ва шиддатнокии падидаҳои табиии гидрометеорологӣ рӯ ба афзоиш ниҳода, сол ба сол зиёни худро мерасонад.

Тоҷикистон, ки 93 фоизи масоҳати онро кӯҳсор ташкил медиҳад, дар натиҷаи офатҳои табиии марбут ба об ҳамасола садҳо миллион доллар зарар мебинад.

Аксари вақт чунин офатҳои табиӣ сабаби марги одамон мешаванд.

Дар кишвари мо тӯли даҳсолаҳои охир коҳиши чашмраси масоҳати пиряхҳо, ки барои тамоми кишварҳои Осиёи Марказӣ муҳимманд, ба мушоҳида мерасад.

Аз 13 ҳазор пиряхе, ки дар кӯҳсори Тоҷикистон ҷойгир мебошад, то имрӯз як ҳазораш нобуд гардидааст.

Ва ин ҳама дар ҳолест, ки то 60 фоизи захираҳои оби Осиёи Марказӣ дар ҳудуди Тоҷикистон ташаккул меёбад.

Имсол бинобар боришоти кам дар фасли зимистон коҳиши назарраси захираҳои об дар дарёҳои минтақа ба қайд гирифта шуд, ки дар навбати худ боиси камобӣ дар мавсими обёрӣ ва хушксолии шадид гардид.

Чунин вазъият ба миқдор ва сифати захираҳои оби тоза, ҳамчунин, соҳаҳои марбут ба об, бахусус кишоварзӣ ва энергетика, таъсири манфӣ мерасонад.

Ба ин манзур кишварҳои минтақаи мо аз тағйирёбии даври гидрологӣ нигарон мебошанд.

Дар ин росто, аз Созмони Милали Муттаҳид ва дигар сохторҳои байналмилаливу минтақавӣ даъват ба амал оварда мешавад, ки ба экспедитсияи тадқиқоти пиряхҳо дар Осиёи Марказӣ ба Тоҷикистон мусоидат намоянд.

Тоҷикистон 99 фоизи қувваи барқи худро дар нерӯгоҳҳои барқи обӣ, яъне аз манбаъҳои таҷдидшавандаи энергияи “сабз” истеҳсол мекунад.

Аз ин лиҳоз, кишвари мо дар ҷаҳон камтарин ҳиссаи қиёсии олудаҳои дуоксиди карбонро дорад.

Дар ин робита мехостам пешниҳодҳои зеринро ҷиҳати дарёфти роҳҳои ҳалли мушкилоти марбут ба тағйирёбии иқлим, ки ман дар ҳамоишҳои байналмилалии дигар манзур карда будам, такроран ироа намоям:

1). Дастгирии истифодаи васеи манбаъҳои таҷдидшавандаи энергия, ки барои рушди иқтисоди “сабз” заминаи мусоид мегузорад.

2). Мусоидати ҳамаҷонибаи кишварҳои мададрасон ва сохторҳои байналмилаливу минтақавии молиявӣ ба татбиқи амалии стратегияву барномаҳои миллии мутобиқшавӣ ба тағйирёбии иқлим.

3). Пурзӯр кардани мониторинги манбаъҳои пайдоиши захираҳои об, бахусус, пиряхҳо.

4).Таҳким бахшидан ба ҳамкории байналмилалӣ дар масъалаҳои ҳифзи манбаъҳои обӣ ва ба ин мақсад мавриди амал қарор додани пешниҳоди мо дар бораи таъсис додани Бунёди байналмилалии ҳифзи пиряхҳо.

5). Аз ҷониби кишварҳои мутараққӣ ва созмонҳои байналмилалӣ ба кишварҳои рӯ ба тараққӣ ва камтараққӣ расонидани кумакҳои молиявӣ ва техникии ҳамаҷониба ҷиҳати мониторингу ҳифзи пиряхҳо ва дигар манбаъҳои захираҳои об.

Умед дорем, ки шарикони байналмилалии мо иқдомҳои баъдии ҷониби Тоҷикистонро дар ин самтҳо пуштибонӣ хоҳанд кард.

Ҷаноби Раис!

Имрӯзҳо дар Созмони Милали Муттаҳид Тоҷикистонро ҳамчун кишвари ташаббускор дар пешбарии масъалаҳои марбут ба захираҳои об мешиносанд.

Кишвари мо муаллифи аксари ташаббусу қатъномаҳои марбут ба оби Созмони Милали Муттаҳид, аз ҷумла “Даҳсолаи байналмилалии амал “Об барои рушди устувор” барои давраи то соли 2028” мебошад.

Бо дастгирии кишварҳои узви Созмон мо тавонистем дар тӯли даҳсолаҳои охир рӯзномаи оби ҷаҳониро дубора эҳё намоем ва тавсеа бахшем.

Дар соли 2018 Қатъномаи Тоҷикистон таҳти унвони “Арзёбии фарогири миёнамуҳлати Даҳсолаи байналмилалии амал “Об барои рушди устувор”, 2018-2028’ қабул гардид, ки рӯзномаи ҷаҳонии обро боз ҳам ғанӣ гардонид.

Дар Қатъномаи мазкур дар баробари дигар вазифаҳои муҳим гузаронидани Конфронси Созмони Милали Муттаҳид оид ба Арзёбии фарогири миёнамуҳлати татбиқи ҳадафҳои Даҳсолаи байналмилалии амал “Об барои рушди устувор” дар моҳи марти соли 2023 дар Ню-Йорк салоҳ дониста шудааст. Ин чорабинӣ аз нигоҳи дастгирии раванди татбиқи Даҳсола ва баргузории Форуми сатҳи баланди сиёсӣ оид ба рушди устувор иқдоми муҳим ба шумор меравад.

Хотиррасон бояд кард, ки Конфронси Созмон оид ба мавзӯи об охирин бор дар Мар де Платаи Аргентина соли 1977 барпо гардида буд.

Яъне баъд аз 46 сол Конфронси об дар Созмони Милали Муттаҳид дубора баргузор мегардад.

Бо итминони комил метавон гуфт, ки таваҷҷуҳ ба Даҳсолаи “Об барои рушди устувор” аз ҷониби кишварҳои узв, зерсохторҳои Созмон ва дигар созмонҳо торафт зиёд шуда истодааст ва баъзе аз онҳо, аллакай, омодагии худро барои мизбонии вохӯриҳои тадорукотии минтақавӣ иброз намуданд.

Мутаассифона, ҳамагирии КОВИД-19 нақшаҳои онҳоро халалдор кард ва аксари чорабиниҳои пешбинишуда ба таъхир афтодаанд.

Умед дорам, ки пас аз пирӯзӣ бар коронавируси нав кишварҳои манфиатдор, дар баробари Тоҷикистон, метавонанд чорабиниҳои банақшагирифтаи худро барпо намоянд.

Дар фарҷоми сухан, мехоҳам таваҷҷуҳи ҳамаи кишварҳои узви Созмони Милали Муттаҳидро ба лоиҳаи қатъномаи навбатии Тоҷикистон оид ба Конфронси Созмон ҷиҳати арзёбии фарогири миёнамуҳлати татбиқи Ҳадафҳои Даҳсолаи байналмилалии амал “Об барои рушди устувор, 2018-2028” ҷалб намоям.

Қарор аст, ки қатъномаи мазкур дар иҷлосияи кунунии Маҷмаи Умуми Созмон мавриди баррасӣ қарор гирад.

Аз ҳамагон даъват ба амал меоварам, ки ин иқдоми моро низ ба мисли қатъномаҳои гузашта пуштибонӣ намоянд.

Аз таваҷҷуҳатон сипосгузорам.

23.09.2020, шаҳри Душанбе

www.prezident.tj

 

Суханронӣ дар вохӯрии сатҳи баланди Маҷмаи Умумии СММ бахшида ба ҷашни 75-солагии таъсис ёфтани Созмони Милали Муттаҳид

Суханронии Пешвои миллат ба муносибати 75-солагии СММ

Муҳтарам ҷаноби Раис,
Муҳтарам ҷаноби Дабири кулл,
Хонумҳо ва ҷанобон!

Имсол мо 75-солагии таъсис ёфтани Созмони Милали Муттаҳидро ҷашн мегирем.

Дар тӯли ин солҳо Созмони Милали Муттаҳид ҳамчун сохтори бонуфуз ва беназири байналмилалӣ тавонист ба як платформаи муҳимму фарогири ҳалли мушкилоти мубрами ҷаҳонӣ табдил ёбад.

Фаъолияти ин Созмон вобаста ба тағйирёбии босуръати вазъ дар арсаи байналмилалӣ ва вусъат пайдо кардани чунин таҳдиду хатарҳои муосир, ба монанди терроризму ифротгароӣ, тағйирёбии иқлим ва ҳамагирии коронавируси нав КОВИД–19, бори дигар аз он шаҳодат медиҳанд, ки аксари кишварҳои дунё ба таҳким бахшидани муносибатҳои бисёрҷониба (мултилатерализм) ниёз дошта, дар ин ҷода Созмони Миллали Муттаҳидро ҳамчун шарики боэътимод мебинанд.

Соли ҷорӣ мо инчунин рӯйдоди дигари муҳимми таърихӣ — 75-солагии Ғалаба бар фашизмро, ки таъсисёбии Созмони Милали Муттаҳид ба он иртиботи бевосита дорад, ҷашн гирифтем.

Боиси ёдоварист, ки дар таъмини ин Ғалабаи бузург баробари шаҳрвандони дигар халқу миллатҳо фарзандони барӯманди Тоҷикистон низ нақши назаррас гузоштаанд.

Дар шароити имрӯзаи ҷаҳонӣ, бахусус дар пасманзари афзоиши таҳдиду хатарҳои глобалӣ сабақҳои талхи Ҷанги дуюми ҷаҳонӣ ҳар яки моро ҳушдор медиҳанд, ки барои ҳифзи сулҳи пойдор, суботу оромӣ ва зиндагии осудаи инсоният ҳамеша омода ва муттаҳид бошем.

Ҳамкорони гиромӣ,

Ҷашни 75-солагии Созмони Милали Муттаҳид ба марҳилае рост меояд, ки ҷаҳонро таҳдиду хатарҳои бесобиқа фаро гирифтаанд.

Имрӯзҳо аксарият аҳолии олам бар он ақидааст, ки танҳо тариқи муколама ва ҳамкории глобалӣ инсоният метавонад, дар пайдо кардани роҳҳои рафъи хатарҳои муосир, муваффақ бошад.

Тоҷикистон низ дар муколамаи ҷаҳоние, ки аз ҷониби Созмони Милали Муттаҳид пешниҳод шудааст, ширкати фаъол дорад.

Мо ният дорем саъю талошҳоямонро ҷиҳати татбиқи ташаббусҳои созандаи хеш дар масоили марбут ба захираҳои об ва тағйирёбии иқлим муштарак бо дигар кишварҳо тақвият бахшем.

Кишвари мо дар баробари ҳаллу фасли мушкилоти зикргардида ҳамдилии беш аз пешро барои ҳарчӣ зудтар ба эътидол овардани вазъ дар соҳаи тандурустӣ ва иқтисоди ҷаҳонӣ аз ҷумлаи авлавиятҳои муҳимтарин медонад.

Бори дигар таъкид месозам, ки хатару таҳдидҳои имрӯза вокунишҳои бетаъхири ҷомеаи ҷаҳониро бар пояи ягонагӣ, ҳамдилӣ ва ҳамкориҳои бисёрҷонибаи судманд тақозо менамояд.

Аз таваҷҷуҳатон сипосгузорам!

21.09.2020, шаҳри Душанбе

www.prezident.tj

Чорабинияҳои омӯзишӣ дар ШВКД — и ноҳияи Шуғнон ва Тавқифгоҳи тафтишотии шаҳри Хоруғи ВМКБ

20200915_093230Рӯзҳои 15 ва 17 сентябри соли 2020 кормандони Дастгоҳи Ваколатдор оид ба ҳуқуқи инсон дар ҶТ дар ШВКД – и ноҳияи Шуғнон ва Тавқифгоҳи тафтишотии шаҳри Хоруғи ВМКБ дар мавзӯҳои «Пешгирии терроризм ва ифротгароӣ дар байни ҷавонон», «Пешгирии шиканҷа» ва «Ҳуқуқҳои дастгиршудагон ва маҳкумшудагон» семинари омӯзишӣ гузарониданд.

Дар семинарҳои мазкур Дилшодов Ғолиб — муовини Сардор оид ба хизмат дар ШВКД — и ноҳияи Шуғнон, Мирзоев Руслан — Сардори Тавқифгоҳи тафтишотии шаҳри Хоруғи ВМКБ, Ҳусниддин Нидоев — муовини Сардори шуъбаи ҳифзи давлатии ҳуқуқҳои сиёсӣ ва шаҳрвандӣ ва Абдуҳалим Низомов — муовини Сардори шуъбаи ҳифзи давлатии ҳуқуқҳои кӯдаки Дастгоҳи Ваколатдор оид ба ҳуқуқи инсон дар Ҷумҳурии Тоҷикистон дар мавзӯъҳои пешгирии шиканҷа, масъалахои ҷаҳони муосир ва таҳдиди радикализм ва экстремизм дар байни ҷавонон, ва ҳуқукҳои асосии дасгиршудагон ва маҳкумшудагон баромад намуданд.

Дар рафти саволу ҷавоб бештар ба масъалаҳои пешгирии шиканҷа, ҳуқуқҳои дастгиршудагон, аз байн бурдани муносибатҳои ғайриоиномавӣ суҳбатҳо гузаронида шуда, масъалаҳои мазкур ҳамаҷониба мавриди муҳокима қарор дода шуданд.

Инчунин тибқи Барномаи амали Ваколатдор оид ба ҳуқуқи инсон дар ҶТ рӯзҳои 15 ва 17 сентябри соли 2020 аз ҷониби кормандони Дастгоҳи ВҲИ ҷиҳати муайян намудани вазъи риояи ҳуқуқҳои дастгиршудагон ва маҳкумшудагон дар Тавқифгоҳи нигоҳдошти муваққатии ШВКД дар ноҳияи Шуғнон ва Тавқифгоҳи тафтишотии шаҳри Хоруғи ВМКБ мониторинг гузаронида шуд.

Хадамоти матбуотии ВҲИ ҶТ

Натиҷагирӣ аз озмуни беҳтарин қироаткунандаи шеър дар мақомоти Ваколатдор оид ба ҳуқуқи инсон

IMG_3620Дар мақомоти Ваколатдор оид ба ҳуқуқи инсон дар Ҷумҳурии Тоҷикистон озмуни беҳтарин қироати шеър дар мавзӯъҳои “Тоҷикистон”, “Истиқлолият”, “Ватан” ва “Модар” баргузор ва натиҷагирӣ гардид, ки дар он ҳайати кормандони Дастгоҳи марказии мақомот фаъолона иштирок намуданд.

Озмуни мазкур бо мақсади баланд бардоштани завқи шеърдонӣ, шеърхонӣ, тақвияти нерӯи зеҳнӣ, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ пешбинӣ гардида буд.

Натиҷаҳои озмун бо иштироки роҳбарияти мақомот ва ҷалби мутахассиси соҳа – дотсенти факултаи филологияи Донишгоҳи миллии Тоҷикистон, номзади илмҳои филология Қ.Нурқаев ҷамъбаст гардид. Зимни ҷамъбаст, А.Машрабзода, мутахассиси пешбари Шӯъбаи ҳифзи давлатии ҳуқуқҳои кӯдак сазовори ҷойи якум, А.Қурбонов, котиб-коргузори қабулгоҳи Ваколатдор оид ба ҳуқуқи инсон сазовори ҷойи дуюм ва Г.Абдуллоева, котиб-коргузори қабулгоҳи муовини Ваколатдор оид ба ҳуқуқи инсон-Ваколатдор оид ба ҳуқуқи кӯдак сазовори ҷойи сеюм гардиданд.

Доварон озмунро натиҷагирӣ намуда, ба омодагӣ ва иштироки кормандони мақомот баҳои баланд доданд. Ҳамчунин дар анҷоми чорабинӣ ба ғолибони озмун аз ҷониби ҳайати доварон “Ифтихоронома” ва туҳфаҳои пулӣ тақдим карда шуд.

Лозим ба ёдоварист, ки дар мақомоти Ваколатдор оид ба ҳуқуқи инсон ба масъалаҳои ташкил ва баргузории чорабиниҳои фарҳангӣ низ диққати махсус дода шуда, барои ин тамоми шароитҳо фароҳам оварда шудааст. Дар мақомот, китобхона амал мекунад, ки дорои адабиёти соҳавӣ ва бедеӣ мебошад.

Ташкил ва баргузории чунин озмунҳо дар дили ҳар фарди мамлакат меҳру муҳаббатро нисбат ба муқаддасоти кишварамон афзун мегардонад.

Хадамоти матбуотии ВҲИ

ТАЪЗИЯ

Роҳбарият ва ҳайати кормандони мақомоти Ваколатдор оид ба ҳуқуқи инсон дар Ҷумҳурии Тоҷикистон ба Сафаралӣ Ҳакимиён — Роҳбари Дастгоҳи Ваколатдор оид ба ҳуқуқи инсон дар Ҷумҳурии Тоҷикистон, бинобар вафоти модараш изҳори ҳамдардӣ намуда, ба ӯ ва аҳли оилааш аз даргоҳи Илоҳӣ сабри ҷамил хоҳонанд.