Дар шаҳри Рими Италия вохӯриву мулоқотҳои судманди Ваколатдор оид ба ҳуқуқи инсон дар Ҷумҳурии Тоҷикистон бо сохторҳои давлатии Ҷумҳурии Италия анҷом дода шуданд

Ҷиҳати иҷрои самарабахши ташаббусҳои созандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти ҳимояи ҳамаҷонибаи ҳуқуқҳои соҳибкорону сармоягузорон, инчунин истифодабарандагони хизматрасониҳои молиявӣ ҳайати расмии Тоҷикистон бо роҳбарии Умед Бобозода –  Ваколатдор оид ба ҳуқуқи инсон дар Ҷумҳурии Тоҷикистон аз 10 то 15 марти соли 2025 дар Ҷумҳурии Италия қарор дорад. Ваколатдор оид ба ҳуқуқи инсонро дар ин сафари корӣ кормандони Дастгоҳи иҷроияи Президенти Ҷумҳурии Тоҷикистон, Суди Олии Ҷумҳурии Тоҷикистон ва мақомоти Ваколатдор оид ба ҳуқуқи инсон ҳамроҳӣ намуданд.

Ҳадаф аз сафари кории мазкур табодули таҷриба дар соҳаи ҳуқуқу озодиҳои инсон ва омӯзиши таҷрибаи мақомоти дахлдори Ҷумҳурии Италия дар самти ҳифзи ҳуқуқҳои соҳибкорону сармоягузорон, инчунин истифодабарандагони мебошад.

Зимни сафари мазкур Ваколатдор оид ба ҳуқуқи инсон дар Ҷумҳурии Тоҷикистон яқ қатор вохӯрию мулоқотҳои судманд бо мақомоту идораҳои дахлдори Италия, аз ҷумла бо Омбудсмен оид ба ҳуқуқи инсон, Омбудсмени молиявӣ ва бонкӣ, Суди Олӣ, Вазорати адлия, Мактаби олии бозомӯзии судяҳо, Суди шаҳри Рим, Донишгоҳи давлатии Флоренсия, Суди шаҳри Флоренсия, Маркази ҳалли алтернативии баҳсҳои тиҷоратӣ ва дигар сохторҳои марбута анҷом дод.

Дар ҷараёни вохӯриҳо масъалаҳои вобаста ба ҷанбаҳои гуногуни ҳуқуқу озодиҳои инсон, аз ҷумла иҷрои уҳдадориҳои байналмилалии Ҷумҳурии Тоҷикистон ва Ҷумҳурии Италия дар соҳаи ҳуқуқи инсон, мутобиқати пурраи ниҳодҳои миллӣ оид ба ҳуқуқи инсон ба талаботи Принсипҳои Париж, аз ҷониби судҳо баррасӣ намудани парвандаҳои иқтисодӣ, роҳҳои омодасозии магистрҳои соҳаи ҳуқуқи инсон, таҷрибаи татбиқи модели итолиёвии механизми миёнаҷигарӣ дар самти тиҷорат ва савдо, инчунин омодасозии медиаторҳо ва дигар масъалаҳо мавриди баррасии ҷонибҳо қарор дода шуданд.

Тасмим гирифта шуд, ки ҷонибҳо ҷиҳати тақвияти фаъолият дар самтҳои болозикр минбаъд низ ҳамкориҳоро густариш медиҳанд.

Ёдовар мешавем, ки бо Фармони Президенти Ҷумҳурии Тоҷикистон аз 22 октябри соли 2022, №469 мансаби муовини Ваколатдор оид ба ҳуқуқи инсон – Ваколатдор оид ба ҳуқуқи истифодабарандагони хизматрасониҳои молиявӣ ва ҳуқуқи соҳибкорон дар Ҷумҳурии Тоҷикистон таъсис дода шудааст.