Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 27-уми апрели соли ҷорӣ дар як қатор мақомоти давлатӣ, аз ҷумла Ваколатдор оид ба ҳуқуқи инсон тағйироти кадрӣ ба амал оварданд. Бо Фармони Президенти Ҷумҳурии Тоҷикистон муҳтарам Эмомалӣ Раҳмон ба мансаби муовини Ваколатдор оид ба ҳуқуқи инсон - Ваколатдор оид ба ҳуқуқи кӯдак дар Ҷумҳурии Тоҷикистон Бобоҷонзода Миҷгона Бобоҷон таъин гардида, ба Маҷлиси намояндагони Маҷлиси Олии Ҷумҳурии Тоҷикистон пешниҳод ирсол гардид.
Вакилони Маҷлиси намояндагони Маҷлиси Олии Ҷумҳурии Тоҷикистон дар ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати шашум, ки санаи 28-уми апрел баргузор гардид, ба пешниҳоди Президенти Ҷумҳурии Тоҷикистон «Оид ба додани ризоият дар бораи таъин намудани Бобоҷонзода Миҷгона Бобоҷон ба вазифаи муовини Ваколатдор оид ба ҳуқуқи инсон дар Ҷумҳурии Тоҷикистон - Ваколатдор оид ба ҳуқуқи кӯдак дар Ҷумҳурии Тоҷикистон» ризоият доданд. Пас аз он Бобоҷонзода Миҷгона Бобоҷон дар назди вакилони Маҷлиси намояндагон савганд ёд намуд.
Пас аз анҷоми расмиёти мазкур Зариф Ализода, Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ – Намояндаи ваколатдори Президенти Ҷумҳурии Тоҷикистон дар Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон Бобоҷонзода Миҷгонаро барои ҳайати кормандони мақомоти Ваколатдор оид ба ҳуқуқи инсон муаррифӣ намуданд.
Хадамаоти матуботии ВҲИ ҶТ
