Имрӯз, дар мақомоти Ваколатдор оид ба ҳуқуқи инсон бо иштироки роҳбарият ва кормандони мақомот ба муносибати Рӯзи Ваҳдати миллӣ  мизи мудаввар баргузор гардид.

Чорабиниро муовини Ваколатдор оид ба ҳуқуқи инсон  — Ваколатдор оид ба ҳуқуқи кудак Бобоҷонзода М. оғоз намуда, ҳозиринро ба муносибати ин санаи муҳим ва дастоварди бузурги миллат шодбош гуфтанд.  Иброз гардид, ки  бо талошҳои бесобиқаи  Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 27-июни соли 1997 дар шаҳри Масква «Созишномаи умумии истиқрори сулҳ ва ризоияти миллӣ» ба имзо расид.  Дар иртибот ба ин муносибат ҳамасола санаи 27 - июн  дар кишвар Рӯзи Ваҳдати миллӣ  таҷлил карда мешавад.

Воқеанҳам, ваҳдати миллӣ барои миллати мо дастоварди ниҳоят пурарзиш, шарти асосии некуаҳволии халқамон ва таҳкурсии боэътимоди пешрафту ободии Ватан гашта, ҳамчун рамзи пирўзиву хушбахтї ба мардуми тоҷик неруву тавони нав бахшид. 

Дар мизи мудаввар Сангов Т. – сармутахассиси шуъбаи ташкилӣ, иттилоотӣ ва таҳлилии Дастгоҳи Ваколатдор оид баҳуқуқи инсон дар мавзӯи «Аҳамияти таърихӣ ва нақши ваҳдати миллӣ дар таъмини ҳуқуқу озодиҳои инсон ва шаҳрванд» маърӯза намуд. Дар маърӯза маълумот дода шуд, ки, дар таърихи муосири давлатдории миллии тоҷикон, падидаи ваҳдати миллӣ дар самти ба вуҷуд овардани шароити мусоид барои рушди устувори ҳокимияти давлатӣ инъикоси моҳияти демократии Ҷумҳурии Тоҷикистон ва кафолати конститутсионии эътироф, риоя ва ҳифз гардидани ҳуқуқу озодиҳои инсон ва шаҳрванд нақши муҳим бозидааст. 

Дар ҷамъбасти чорабинӣ муовини Ваколатдор оид ба ҳуқуқи инсон  — Ваколатдор оид ба ҳуқуқи кудак Бобоҷонзода М. бори дигар ҳозиринро ба муносибати ҷашни Ваҳдати миллӣ  шодбош гуфта, зикр сохт, ки арҷгузорӣ ба ин падидаи муҳим ва дастоварди беназир  вазифаи ҳар як шаҳрванди Ҷумҳурии Тоҷикистон мебошад. 

Хадамоти матбуотии ВҲИ ҶТ