Санаи 3 сентябри соли 2021  дар мақомоти Ваколатдор оид ба ҳуқуқи инсон дар Ҷумҳурии Тоҷикистон бо иштироки роҳбарият ва кормандони мақомот ба муносибати Рӯзи Истиқлолияти давлатии Ҷумҳурии Тоҷикистон  мизи мудаввар баргузор гардид.

    Чорабиниро Ваколатдор оид ба ҳуқуқи инсон дар Ҷумҳурии Тоҷикистон У.Бобозода оғоз намуда, ҳозиринро ба муносибати 30-солагии Истиқлолияти давлатии Ҷумҳурии Тоҷикистон шодбош гуфтанд.  Иброз гардид, ки  Истиқлолият волотарин ва пурарзиштарин дастоварди давлату миллати тоҷдори тоҷик буда‚ муҳимтарин воқеаи таърихии сарнавишти миллати тоҷик ба шумор меравад. Ин ҳодисаи фараҳбахш аввали моҳи сентябри соли 1991 ба вуқӯъ пайваст ва 9 сентябр расман Рӯзи Истиқлолияти Ҷумҳурии Тоҷикистон қабул гардид. Аз ҳамон вақт то имрӯз ин санаи муборак барои миллати тоҷик иди муқаддас маҳсуб мешавад. Ин неъмати бузург баробари ба даст овардан, нуру зиё, меҳру вафо, ободию озодӣ, ҳамфикрию ҳамзистӣ ва осоиштагиву абадиятро ба мардуми бузурги тоҷик ва Тоҷикистони азиз овардааст.

    Сипас аз рӯи барномаи мизи мудаввар баромади Ашуров Муқим – сардори Шуъбаи ҳифзи давлатии ҳуқуқҳои шаҳрвандӣ ва сиёсии Дастгоҳи Ваколатдор оид ба ҳуқуқи инсон дар Ҷумҳурии Тоҷикистон дар мавзўи “Истиқлолияти давлатӣ ва рушди ҳуқуқи инсон” баромад намуда, қайд намуд, ки ба шарофати Истиқлолият Тоҷикистон дар арсаи байналмилалӣ обрӯю нуфузи баланд пайдо намуд ва ҳамчун узви ҷомеаи ҷаҳонӣ пайваста кӯшиш менамояд, ки мавқеи фаъолро баҳри ҳифзи ҳуқуқи инсон дар сатҳи байналмилалӣ дошта бошад. Ба шарофати соҳибистиқлолӣ Ҷумҳурии Тоҷикистонро аксари давлатҳои ҷаҳон ба расмият шинохтанд ва айни ҳол бо зиёда аз 178 давлати дунё муносибатҳои дипломатӣ ва чандин созмонҳои бонуфузи байналмилалӣ ва минтақавӣ ҳамкории судмандро бароҳ мондааст. Ҳамчунин Тоҷикистон имконияти мустақилона муайян намудани сиёсати дохилӣ ва хориҷии худро пайдо намуд.

    Инчунин дар рафти мизи мудаввар дар васфи Тоҷикистон ва Истиқлолият аз ҷониби кормандони мақомот Сангов Т. ва Қурбонзода А. қироати шеърҳо сурат гирифт.

    Дар идомаи чорабинӣ, ҳамзамон фармонҳои Президенти Ҷумҳурии Тоҷикистон дар бораи додани рутбаҳои тахассусӣ ба кормандони мақомот - Раҷабзода Ҳ. ва Қодирӣ С. хонда шуд.

    Дар ҷамъбасти мизи мудаввар, инчунин  бо фармони Ваколатдор оид ба ҳуқуқи инсон  дар Ҷумҳурии Тоҷикистон У. Бобозода барои фаъолияти босамар дар амалисозии вазифаҳои мақомоти Ваколатдор оид ба ҳуқуқи инсон дар Ҷумҳурии Тоҷикистон дар соҳаи ҳуқуқу озодиҳои инсон ва шаҳрванд ва бахшида ба 30-солагии Истиқлолияти давлатии Ҷумҳурии Тоҷикистон ба кормандони мақомоти Ваколатдор оид ба ҳуқуқи инсон Ашуров М., Содиқов А., Раҷабов Ш., Қодирӣ С., Бобохонов С., Салихов З., Салоҳидинзода М., Машрабзода А., Мастоншоева Ф., бо “Ифтихорнома” ва Лоиқов Ш., Давлатов Ҳ., Ҳайдарова З., Мирзоев Ҳ., Махкамов М., Давлатов Н., Аюбов Х. ва Мунаваров Ҷ.  бо “Сипоснома”  сарфароз гардонида шуданд.

Хадамоти матбуотии ВҲИ