Рӯзи 8 декабри соли 2021 Ваколатдор оид ба ҳуқуқи инсон дар Ҷумҳурии Тоҷикистон дар якҷоягӣ бо Ташкилоти ҷамъиятии “Дафтари озодиҳои шаҳрвандӣ” дар Китобхонаи миллии Тоҷикистон бахшида ба Ҳафтаи ҳуқуқи инсон, ки ҳамасола дар арафаи Рӯзи ҳуқуқи инсон қайд карда мешавад, мизи мудаввар доир намуданд.

Дар мизи мудаввар намояндагон аз мақомоти прокуратура, суд, вазоратҳои мудофиа, адлия ва дохилӣ, Гвардияи миллӣ, Кумитаи ҳолатҳои фавқуллода ва мудофиаи гражданӣ ва ҷомеаи шаҳрвандӣ иштирок намуданд.

Маърӯзачиён тибқи Барнома дар мавзӯҳои «Ҳуқуқи инсон-арзиши муҳими ҷаҳони муосир», «Ҳуқуқҳои хизматчиёни ҳарбӣ ва натиҷаи мониторинги қисмҳои ҳарбӣ», «Ҳуқуқ ба дахлнопазирии шахсии хизматчиёни ҳарбӣ» «Фаъолияти Вазорати мудофиаи Ҷумҳурии Тоҷикистон дар самти таъмини ҳуқуқи хизматчиёни ҳарбӣ» ва «Назорати дақиқи иҷрои қонунҳо дар фаъолияти Сарпрокуратураи ҳарбии Ҷумҳурии Тоҷикистон» баромад намуданд.

Дар рафти мизи мудаввар бештар ба масъалаҳои ҳуқуқҳои сарбозон дар давраи хизмат ва аз байн бурдани муносибатҳои ғайриоиномавӣ мубоҳисаҳо сурат гирифта, ҷиҳати боз ҳам беҳтар намудани вазъи риояи ҳуқуқи хизматчиёни ҳарбӣ тавсияҳо пешниҳод карда шуданд.

Хадамоти матбуоти ВҲИ