Натиҷагирӣ аз фаъолияти мақомоти Ваколатдор оид ба ҳуқуқи инсон дар нуҳ моҳи соли 2022
Санаи 10 октябри соли 2022 дар мақомоти Ваколатдор оид ба ҳуқуқи инсон вобаста ба натиҷаҳои фаъолияти мақомот дар нуҳ моҳи соли 2022 маҷлиси ҷамъбастӣ баргузор гардид.
Дар маҷлис Ваколатдор оид ба ҳуқуқи инсон дар Ҷумҳурии Тоҷикистон Умед Бобозода, муовини Ваколатдор оид ба ҳуқуқи инсон – Ваколатдор оид ба ҳуқуқи кӯдак дар Ҷумҳурии Тоҷикистон М. Бобоҷонзода, роҳбари Дастгоҳи Ваколатдор оид ба ҳуқуқи инсон Раҷабзода Ҳ, роҳбарони воҳидҳои сохторӣ ва кормандони мақомоти Ваколатдор оид ба ҳуқуқи инсон иштирок намуданд.
Нахуст У. Бобозода - Ваколатдор оид ба ҳуқуқи инсон ҷаласаро ифтитоҳ бахшида вобаста ба натиҷаҳои фаъолияти мақомот дар нуҳ моҳи соли ҷорӣ суханронӣ намуданд. Қайд карда шуд, ки нишондиҳандаҳои фаъолияти мақомот дар муқоиса бо ҳамин давраи соли гузашта беҳтар гардида бошад ҳам, дар баъзе самтҳои фаъолият кор бояд ҷоннок карда шавад. Чунин раванд бояд идома дода шуда, дар самти амалисозии нақшаҳои дар мақомот амалишаванда чораандешӣ карда шавад.
Ҳамчунин аз рӯи барнома ҳисоботи роҳбарони воҳидҳои сохтории мақомот дар масъалаи қабул ва баррасии муроҷиатҳо, муросилоти аз дигар мақомот воридгардида, баррасии лоиҳаи санадҳои меъёрии ҳуқуқӣ, иштироки кормандон дар гурӯҳҳои корӣ, иштирок дар семинару конференсия ва мизҳои мудаввар, гузаронидани мониторингу санҷишҳо, баромад дар ВАО ва дигар масъалаҳо шунида шуд.
Дар интиҳои маҷлис фаъолияти воҳидҳои сохтории мақомот ва кормандони он мавриди таҳлил ва муҳокима қарор гирифта, аз ҷониби роҳбарият ҷиҳати тақвият додани корҳо, ислоҳи камбудиҳо ва иҷрои пурраи Барномаи амали мақомот барои соли 2022 дастурҳои мушаххас дода шуд.
Хадамоти матбуотии ВҲИ ҶТ
