«Ҳуқуқ ва озодиҳои инсон – арзиши олӣ»
Мувофиқи нақшаи чорабиниҳои Намояндагии Ваколатдор оид ба ҳуқуқи инсон дар вилояти Суғд бахшида ба «Њафтаи ҳуқуқи инсон» дар МТҒ «Пӯлотов» воқеъ дар шаҳри Хуҷанд мизи мудаввар дар мавзӯи «Ҳуқуқ ва озодиҳои инсон – арзиши олӣ» баргузор гардид.
Чорабинии мазкур бо ҳамоҳангсозии Шӯъбаи маорифи шаҳр ва ширкати бевоситаи Роҳбари Намояндагии Ваколатдор оид ба ҳуқуқи инсон дар вилояти Суғд – Ҳабибахон Ҳамидова, мутахассиси пешбари Намояндагӣ – Мамадҷонова Мастона, муовини Раиси намояндагии Иттифоқи ҷавонон дар шаҳри Хуҷанд – Ашӯрзода Алишер Негматиён, маъмурияти МТҒ «Пулотов» дар симои директор – Мӯминова Парвина Мирзоҳамдамовна ва кулли омӯзгорон ва толибилмони фаъол баргузор гардид.
Роҳбари Намояндагии Ваколатдор оид ба ҳуқуқҳои инсон дар вилояти Суғд - Ҳ.Ҳамидова дар мавзӯи «Нақши Ваколатдор оид ба ҳуқуқи инсон дар ҳифзи ҳуқуқ ва озодиҳои инсон ва шаҳрванд» баромад намуда, қайд намуд, ки ҷиҳати ҳифз ва пешбурди ҳуқуқҳои инсон ва шаҳрванд мақомоти Ваколатдор оид ба ҳуқуқи инсон дар Ҷумҳурии Тоҷикистон ҳамкориҳои судмандро бо мақомоти давлатӣ, ҷомеаи шаҳрвандӣ ва созмонҳои байналмилалӣ роҳандозӣ намуда, дар ин раванд як қатор корҳоро ба анҷом расонид. Аз ҷумла, ташкил ва гузаронидани машваратҳои ҳуқуқии сайёр дар шаҳри Бӯстон, ноҳияҳои Мастчоҳ, Ашт ва Ҷ. Расулов, ки санаҳои 25 – 28 майи соли равон, ки бо ширкати бевоситаи Ваколатдор оид ба ҳуқуқҳои инсон дар Ҷумҳурии Тоҷикистон – Умед Бобозода баргузор гардиданд. Инчунин, машваратҳои сайер аз ҷониби Ваколатдор оид ба ҳуқуқҳои кӯдак - Бобоҷонзода Миҷгон ба ноҳияҳои Шаҳристон ва шаҳри Гулистон ташкил ва гузаронида шуданд.
Сипас, мувофиқи барномаи таҳияшуда сухан ба муовини Раиси Намояндагии Иттифоқи ҷавонон дар шаҳри Хуҷанд – Ашӯрзода Алишер Негматиён дода шуд, ки дар мавзӯи «Зарурияти баланд бардоштани маърифати ҳуқуқии ҷавонон барои пешгирии шомилшавӣ ба гурӯҳҳои радикалистиву эксремистӣ» баромад намуданд.
Сухани ҷамъбастӣ ба директори МТҒ «Пулотов» - Мӯминова Парвина Мирзоҳамдамовна дода шуд, ки иштирокчиёни мизи мудавварро барои саволу ҷавоби озод даъват намуд ва дар ҳамин нуқта мизи мудаварро пӯшида эълон намуданд.
Хадамоти матбуотии ВҲИ
