МИЗИ МУДАВВАР ДОИР БА СТРАТЕГИЯИ МИЛЛИИ ҶУМҲУРИИ ТОҶИКИСТОН ДАР СОҲАИ ҲИФЗИ ҲУҚУҚИ ИНСОН: дурнамо ва амалисозии он
ДУШАНБЕ, 05.09.2023. /АМИТ «Ховар»/. Имрӯз дар шаҳри Душанбе бо ташаббуси Ваколатдор оид ба ҳуқуқи инсон дар мавзуи «Стратегияи миллии Ҷумҳурии Тоҷикистон дар соҳаи ҳифзи ҳуқуқи инсон барои давраи то соли 2038: дурнамо ва амалисозии он» ҳамоиши ҷумҳуриявӣ доир гардид, хабар медиҳад мухбири АМИТ «Ховар».
Дар ҳамоиш намояндагони мақомоти давлатӣ, корпусҳои дипломатии муқими Душанбе, созмонҳои байналмилалӣ ва сохторҳои ҷомеаи шаҳрвандӣ иштирок намуданд.
Ба гуфтаи Ваколатдор оид ба ҳуқуқи инсон дар Ҷумҳурии Тоҷикистон Умед Бобозода, имрӯзҳо эътироф, эҳтиром, ҳифз ва пешбурди ҳуқуқи инсон яке аз мақсадҳои асосии тағйиру дигаргуниҳо дар ҷомеа ба ҳисоб рафта, он ба тағйир додани нақшу ҷойгоҳи инсон, таъмини шароити арзандаи зиндагӣ, кафолати озодӣ ва дахлнопазирӣ, ҳифзи иҷтимоӣ ва иштироки фаъол дар идоракунии давлатӣ равона гардидааст. Ин раванд тӯли солҳои соҳибистиқлолӣ марҳила ба марҳила амалӣ мешавад. «Мазмуну моҳияти меъёрҳои конститусионии соҳаи ҳуқуқи инсон дар он ифода меёбад, ки ҳуқуқу озодиҳои инсон ба воситаи Конститутсия, санадҳои меъёрӣ-ҳуқуқии миллӣ ва санадҳои ҳуқуқии байналмилалие, ки Тоҷикистон онҳоро эътироф намудааст, ҳифз мегарданд. Дар Ҷумҳурии Тоҷикистон ҷиҳати ҳифзи ҳамаҷонибаи ҳуқуқи инсон дар ҳама самтҳо, инчунин ҷиҳати иҷрои уҳдадориҳои байналмилалӣ дар самти ҳуқуқи инсон пайваста тадбирҳои судманд амалӣ шуда, санадҳои муҳими стратегӣ қабул мегарданд»,-изҳор дошт Ваколатдор оид ба ҳуқуқи инсон дар Ҷумҳурии Тоҷикистон.
Таъкид гардид, ки Стратегияи миллии Ҷумҳурии Тоҷикистон дар соҳаи ҳифзи ҳуқуқи инсон барои давраи то соли 2038, ки дар асоси қарори Ҳукумати Ҷумҳурии Тоҷикистон аз 5 августи соли 2023 тасдиқ гардидааст, ҳамаи нақшаҳои миллии мавҷуда ва қабулшаванда оид ба иҷрои тавсияҳои ниҳодҳои СММ оид ба ҳуқуқи инсон ва ҳуҷҷатҳои дигарро дар самти ҳуқуқи инсон ҳамоҳанг намуда, механизм ва расмиёти иҷрои уҳдадориҳои байналмилалиро дар самти ҳуқуқи инсон такмил медиҳад ва воситаи самараноки амалӣ гардонидани сиёсати ягона дар соҳаи ҳифзи ҳуқуқу озодиҳои инсон тибқи Конститутсияи Ҷумҳурии Тоҷикистон ва уҳдадориҳои байналмилалии Ҷумҳурии Тоҷикистон ба шумор меравад.
Иттилоъ дода шуд, ки Тоҷикистон аз 2 марти соли 1992 узви комилҳуқуқи Созмони Милали Муттаҳид буда, барои рушди ҳамкорӣ бо ниҳодҳои оинномавӣ ва шартномавии СММ ва дигар сохторҳои иҷроияи он заминаи мустаҳкам гузоштааст. Дар идомаи таҳкими чунин ҳамкорӣ Тоҷикистон аз 9 санади универсалии соҳаи ҳуқуқи инсон 7-тои онро (2 Паймон ва 5 Конвенсия) тасдиқ намудааст.
«Дар айни замон давлати мо дар самти пешниҳоди гузоришҳои миллӣ қарздорӣ надорад. Мавриди тазаккур аст, ки аз моҳи майи соли 2022 гузориши даврии муттаҳидаи шашум ва ҳафтум оид ба амалисозии Конвенсия оид ба ҳуқуқҳои кӯдак ва гузориши миллӣ оид ба амалисозии Конвенсияи зидди шиканҷа пеш аз муҳлат ба кумитаҳои дахлдори СММ пешниҳод гардида, дар баррасӣ қарор доранд»,-баён дошт Умед Бобозода.
Дар ҳамоиш ҳадаф аз қабули Стратегияи миллиро ба муайян намудани вазифаҳои асосӣ ва самтҳои амалисозии сиёсати давлатии пешгирифтаи Тоҷикистон вобаста ба таъмини ҳуқуқу озодиҳои инсон, баланд бардоштани сатҳи зиндагӣ ҳамчун шарти муҳим ва зарурии муваффақияти халқ, рақобатпазирии давлат дар арсаи байналмилалӣ, рушди устувор ва шаклгирии имиҷу симои демократии он марбут донистанд.
Тазаккур дода шуд, ки нақшаи амали Стратегия барои ҳар сесола таҳия ва қабул мегардад ва дар он маҷмуи чорабиниҳо бо баёни муҳлати иҷро ва натиҷаҳои чашмдошт нишон дода мешаванд.
Тибқи замимаи 2 ба қарори Ҳукумати Ҷумҳурии Тоҷикистон Нақшаи амали Стратегияи мазкур барои солҳои 2023-2025 тасдиқ гардида, тибқи он вазорату идораҳои масъул вазифадор гардиданд, ки оид ба чорабиниҳое, ки аз Стратегия бармеоянд ва ба онҳо дахл доранд, тадбирҳо андешида, аз натиҷаи он ҳамасола то 10 феврал ба Ҳукумати Ҷумҳурии Тоҷикистон маълумот пешниҳод намоянд.
Бознашр аз АМИТ «Ховар»
