Семинари омӯзишӣ барои муҳоҷирони меҳнатӣ дар шаҳри Бохтар
Бо мақсади баланд бардоштани маърифати ҳуқуқии муҳоҷирони меҳнатӣ ва иҷрои «Стратегияи танзими равандҳои муҳоҷират дар Ҷумҳурии Тоҷикистон барои давраҳои то соли 2040» дар шаҳри Бохтари вилояти Хатлон бо иштироки кормандони ташкилоту идораҳои дахлори шаҳри Бохтар ва шаҳрвандону муҳоҷирони меҳнатӣ семинари омӯзишӣ баргузор гардид.
Чорабинии мазкур аз ҷониби Вазорати меҳнат, муҳоҷират ва шуғли аҳолии Ҷумҳурии Тоҷикистон дар ҳамкорӣ бо мақомоти Ваколатдор оид ба ҳуқуқи инсон дар Ҷумҳурии Тоҷикистон гузаронида шуд.
Дар семинари омӯзишӣ намояндаи Вазорати меҳнат, муҳоҷират ва шуғли аҳолии Ҷумҳурии Тоҷикистон, Роҳбари намояндагии Ваколатдор оид ба ҳуқуқи инсон дар вилояти Хатлон, Сардори Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Хатлон баромад намуда, оид ба ҳуқуқу озодиҳои муҳоҷирон ва талаботи меҳнатии муҳоҷирон дар давлатҳои ҳориҷа суханронӣ намуданд.
Баъдан аз ҷониби иштирокчиёни семинар саволу ҷавобҳо доир карда шуд ва онҳо ба саволҳои худ аз ҷониби мутахассисони соҳа ҷавобҳои муфассал ва қонеъкунанда гирифтанд.
