Ташрифи кормандони Дастгоҳи Ваколатдор оид ба ҳуқуқи инсон ба ноҳияҳои Шаҳристон, Ҳамадонӣ ва Ванҷ.

Тибқи Барномаи амали мақомоти Ваколатдор оид ба ҳуқуқи инсон рӯзҳои 23-28 ноябри соли 2020 кормандони Шуъбаи ҳифзи давлатии ҳуқуқҳои иқтисодӣ иҷтимоӣ ва фарҳангии мақомоти мазкур дар ноҳияи Шаҳристони вилояти Суғд, ноҳияи Ҳамадонии вилояти Хатлон ва Ванҷи ВМКБ санҷиши дастрасии шахсони маъюб ба биноҳои инфрасохторӣ гузаронида, бо фаъолон ва намояндагони мақомоти давлатӣ ва ҷомеаи шаҳрвандии дар ҳудуди ноҳияҳои мазкур буда, вохўрӣ карда дар мавзӯҳои «Санадҳои миллӣ ва байналмилалӣ вобаста ба ҳуқуқи маъюбон» баромад намуданд.

Санҷиш нишон дод, ки дар ноҳияҳои Шаҳристон, Ҳамадонӣ ва Ванҷ аксарияти биноҳо ба талаботи Меъёру қоидаҳои шаҳрсозии Ҷумҳурии Тоҷикистон (35-01-2012) ҷавобгўй намебошанд.

Бинобар ин, аз ҷониби кормандони мақомоти Ваколатдор оид ба ҳуқуқи инсон ба шахсони масъул тавсияҳо пешниҳод намуданд, ки вобаста ба бартараф намудани монеагиҳо чораандешӣ намоянд.

Зимни вохўриҳо бо намояндагони мақомоти давлатӣ, фаъолон ва намояндагони ҷомеаи шаҳрвандии дар ҳудуди ноҳияҳои Шаҳристон, Ҳамадонӣ ва Ванҷ фаъолияткунанда ба масъалаҳои ба кор таъмин гардидан, имтиёзҳо, нафақа, ба таҳсил фаро гирифтани маъюбон диққати махсус дода шуд.

Иштирокчиён пешниҳод намуданд, ки чунин вохўриҳо дар масъалаҳои ҳуқуқӣ аз ҷониби кормандони мақомоти Ваколатдор оид ба ҳуқуқи инсон бисёр гузаронида шавад чунки, ин ба манфиати фаъолон ва кормандони мақомоти фаъолияткунанда дар ҳудуди ноҳияҳо мебошад.

 Хадамоти матбуотии ВҲИ

Маҷлиси Ҳукумати Ҷумҳурии Тоҷикистон

Имрӯз таҳти раёсати Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Раиси Ҳукумати Ҷумҳурии Тоҷикистон муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид.

Дар кори маҷлис нахуст оид ба ҷараёни иҷрои қарори Ҳукумати Ҷумҳурии Тоҷикистон аз 30 октябри соли 2010 “Дар бораи Барномаи миллии ташаккули тарзи ҳаёти солим дар Ҷумҳурии Тоҷикистон барои солҳои 2011-2020» ҳисоботи вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода шунида шуд.

Тавре таъкид гардид, дар давраи солҳои 2011-2020 дар доираи татбиқи Барномаи миллии ташаккули тарзи ҳаёти солим дар Ҷумҳурии Тоҷикистон бо дастгирию таваҷҷуҳи пайвастаи Пешвои миллат муҳтарам Эмомалӣ Раҳмон барои ташаккули тарзи ҳаёти солим дар байни аҳолӣ тадбирҳои зиёди муҳиму муасир анҷом дода шуда, дар соҳаи тандурустии мамлакат пешравиҳои назаррас ба вуқуъ пайваст. Сарвари давлат муҳтарам Эмомалӣ Раҳмон барои беҳтар кардани сатҳу сифати хизматрасониҳои тиббӣ ба аҳолии мамлакат, ки асоси воқеии ташаккули тарзи ҳаёти солим дар мамлакат ба ҳисоб меравад ба роҳбарияти вазорати тандурурстӣ ва ҳифзи иҷтимоии аҳолӣ дастуру супоришҳои қатъӣ доданд.

Вазорати тандурустӣ ва ҳифзи иҷтимоии аҳолии Ҷумҳурии Тоҷикистон якҷо бо вазорату идораҳои дахлдор ва мақомоти иҷроияи маҳаллии ҳокимияти давлатӣ вазифадор гардиданд, ки лоиҳаи Барномаи миллии ташаккули тарзи ҳаёти солим дар Ҷумҳурии Тоҷикистон барои солҳои 2021-2025-ро таҳия карда, ба Ҳукумати Ҷумҳурии Тоҷикистон пешниҳод намуда, ҷиҳати такмил додани механизми пешгирии бемориҳо ва таблиғи тарзи ҳаёти солим дар байни аҳолӣ дар асоси шарикӣ бо ҷомеа ва баланд бардоштани масъулияти аҳолӣ барои солимии худ ва атрофиён чораҳои дахлдорро роҳандозӣ намоянд.

Лоиҳаҳои як қатор қонунҳо, аз ҷумла Оид ба лоиҳаи Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ”, Оид ба лоиҳаи Қонуни Ҷумҳурии Тоҷикистон «Дар бораи ворид намудани тағйирот ба Кодекси мурофиаи ҳуқуқвайронкунии маъмурии Ҷумҳурии Тоҷикистон», Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйиру иловаҳо ба Қонуни Ҷумҳурии Тоҷикистон “Дар бораи фаъолияти илмӣ ва сиёсати давлатӣ оид ба илму техника”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйироту иловаҳо ба Қонуни Ҷумҳурии Тоҷикистон “Дар бораи таълиму тарбияи томактабӣ”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйирот ба Қонуни Ҷумҳурии Тоҷикистон “Дар бораи таҳсилоти калонсолон”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйирот ба Қонуни Ҷумҳурии Тоҷикистон “Дар бораи таҳсилоти иловагӣ”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйироту иловаҳо ба Қонуни Ҷумҳурии Тоҷикистон “Дар бораи таҳсилоти миёнаи касбӣ”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйирот ба Қонуни Ҷумҳурии Тоҷикистон “Дар бораи таҳсилоти ибтидоии касбӣ”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйироту иловаҳо ба Қонуни Ҷумҳурии Тоҷикистон “Дар бораи таҳсилоти олии касбӣ ва таҳсилоти касбии баъд аз муассисаи олии таълимӣ”, Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйирот ба Қонуни Ҷумҳурии Тоҷикистон “Дар бораи экспертизаи илмӣ ва илмӣ-техникӣ” ва Дар бораи лоиҳаи Қонуни Ҷумҳурии Тоҷикистон “Оид ба ворид намудани тағйиру илова ба Кодекси тандурустии Ҷумҳурии Тоҷикистон” баъди муҳокимаи аъзои ҳукумати мамлакат барои баррасӣ ба Маҷлиси намояндагони Маҷлиси Олии Ҷумҳурии Тоҷикистон ирсол карда шуд.

Аъзои Ҳукумати Ҷумҳурии Тоҷикистон масъалаҳои вобаста ба лоиҳаи созишномаҳои сармоягузории Ҳукумати Ҷумҳурии Тоҷикистон бо шарикон, Стратегияи миллии Ҷумҳурии Тоҷикистон оид ба фаъолияти башардӯстонаи зидди минаҳо барои солҳои 2021-2030, Барномаи рушди забони давлатӣ барои солҳои 2020-2030 ва Нақшаи миёнамуҳлати муташаккилона кӯчонидани муҳоҷирони экологӣ барои солҳои 2021-2023-ро мавриди муҳокима қарор доданд.

Дар хотимаи маҷлиси Ҳукумати Ҷумҳурии Тоҷикистон Президенти кишвар муҳтарам Эмомалӣ Раҳмон ёдовар шуданд, ки бо Қарори Ситоди ҷумҳуриявӣ оид ба пурзӯр намудани чораҳои зиддиэпидемӣ барои пешгирӣ аз интиқолу паҳншавии бемории сироятии Ковид-19 вобаста ба хуруҷи мавҷи дуюми ин беморӣ дар баъзе кишварҳои ҷаҳон барои эмин нигоҳ доштани саломатии мардуми Тоҷикистон гузаронидани ҳама гуна чораҳои тантанавӣ, аз ҷумла ташкили арчаи солинавӣ, гузаронидани чорабиниҳои фарҳангиву оммавӣ, нишастҳои ҷашнӣ ва дигар чорабиниҳои оммавӣ ба муносибати Соли нави мелодии 2021 дар тамоми қаламрави кишвар манъ карда шудааст.

Бинобар ин, Президенти Ҷумҳурии Тоҷикистон муҳтарам Эмомалӣ Раҳмон ба Вазорати тандурустӣ ва ҳифзи иҷтимоии аҳолӣ, Вазорати корҳои дохилӣ ва роҳбарони вилоятҳо ва шаҳру ноҳияҳо бори дигар таъкид намуданд, ки масъалаи риояи ҳатмии қоидаҳои беҳдошти шахсиву ҷамъиятӣ, истифодаи ниқобҳои муҳофизатӣ, риояи қатъии фосилаи иҷтимоӣ, бо маводи безараргардонӣ таъмин намудани муассисаҳои таълимии ҳамаи зинаҳо, боғҳои фарҳангу фароғат, гулгашту хиёбонҳо ва дигар ҷойҳои ҷамъиятиро ба таври қатъӣ назорат намоянд.

Пешвои миллат, Раиси Ҳукумати Ҷумҳурии Тоҷикистон муҳтарам Эмомалӣ Раҳмон ҳамчунин ба аъзои ҳукумати мамлакат ҷиҳати иҷрои саривақтии қарору фармоишҳои ҳукумат, таъмини кори муназзами муассисаҳои тандурустӣ ва маорифу фарҳанг, таъминоти босифат ва саривақтии аҳолӣ бо барқу гармӣ, дар сатҳи баланд гузаронидани давраи тирамоҳу зимистони солҳои 2020-2021, захираи маводи ғизоӣ ва сӯзишворӣ, пеш аз ҳама дар муассисаҳои иҷтимоӣ, инчунин дар ҳолат хуби омодагӣ нигоҳ доштани роҳҳо ва тамоми иншооти энергетикӣ, ҷамъоварии беталафи ҳосили боқимонда, махсусан пахта ва дар маҷмуъ назорати қатъии фаъолияти соҳаҳои иқтисодиёту иҷтимоиёти мамлакат дастуру супоришҳои мушаххас доданд.

27.11.2020 , шаҳри Душанбе

www.president.tj

Ташрифи корманди Дастгоҳи Ваколатдор оид ба ҳуқуқи инсон ба муассисаҳои ислоҳӣ

Рўзҳои 26 ва 27-уми ноябри соли 2020 Муовини Сардори шуъбаи ҳифзи давлатии ҳуқуқҳои шаҳрвандӣ ва сиёсии Дастгоҳи Ваколатдор оид ба ҳуқуқи инсон дар Ҷумҳурии Тоҷикистон — Нидоев Ҳусниддин дар арафаи Рўзи ҳуқуқи инсон ҷиҳати муайян намудани вазъи риояи ҳуқуқҳои маҳкумшудагон аз Муассисаҳои ислоҳии ЯС 3/4 ва Тавқифгоҳи тафтишотии ЯТ 9/1- Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ташриф овард.

Дар рафти ташриф шароити нигоҳдории маҳкумшудагон, аз ҷумла ҷойи хоб, ҳўҷраҳои мулоқот (кўтоҳмуддат ва дарозмуддат), ошхона, ҳаммом ва дигар ҷойҳо дидан намуд.

Шиносоӣ бо шароити нигоҳдошти маҳкумшудагон нишон дод, ки дар доираи имкониятҳои мавҷуда шароитҳои дахлдор  муҳайё карда шудааст.

Ҳангоми ташриф корманди мақомоти ВҲИ роҳбарият, ҳайати шахсӣ ва маҳкумшудагонро дар арафаи Рўзи ҳуқуқи инсон муборакбод намуда, ба саволҳои онҳо ҷавобҳои мушаххас дод.

Ваколатдор оид ба ҳуқуқи инсон тасмим гирифтааст, ки минбаъд низ аз муассисаҳои ислоҳӣ дидан намояд.

Хадамоти матбуотии ВҲИ

Семинар – машварат дар мавзўи “Роҳҳо ва механизмҳои пешгирии зўроварӣ дар оила”

Рўзи 26 ноябри соли 2020 дар шаҳри Душанбе семинар – машварат дар мавзўи “Роҳҳо ва механизмҳои пешгирии зўроварӣ дар оила” бо ташаббуси Раёсати кор бо занон ва оилаи мақомоти иҷроияи ҳокимияти давлатии шаҳри Душанбе дар доираи амалишавии Барномаи давлатӣ оид ба пешгирии зўроварӣ дар оила дар Ҷумҳурии Тоҷикистон барои солҳои 2014-2023”, баргузор гардид.

Дар семинар – машварати мазкур мудирони бахшҳои сабти асноди ҳолати шаҳрвандии ноҳияҳои Сино, Шоҳмансур, И. Сомонӣ ва Фирдавсии шаҳри Душанбе, нозирони минтақавӣ оид ба пешгирии зўроварӣ дар оилаи ШВКД дар ноҳияҳои Сино, Шоҳмансур ва Фирдавсии шаҳри Душанбе ва мудирони бахши кор бо занон ва оилаи мақомоти иҷроияи ҳокимияти давлатии ноҳияҳои Сино, Шоҳмансур, И. Сомонӣ ва Фирдавсии шаҳри Душанбе иштирок намуданд.

Дар чорабинӣ Раҷабов Ш. – сардори шуъбаи ҳифзи давлатии ҳуқуқҳои иқтисодӣ,иҷтимоӣ ва фарҳангии Дастгоҳи Ваколатдор оид баҳуқуқи инсон дар мавзўи “Нақши мақомоти Ваколатдор оид ба ҳуқуқи инсон дар Ҷумҳурии Тоҷикистон вобаста ба пешгирии зўроварӣ дар оила” баромад намуд. Ҳамзамон руҳшинос Кенҷаева Зарина Хайруллоевна дар мавзӯи “Роҳҳо ва намудҳои расонидани ёрии равонӣ ба ҷабрдидагони зўроварӣ дар оила” маълумот дод.

Дар рафти семинар баромадкунандагон ба саволҳо иштирокчиёни семинар – машварат ҷавобҳои мушаххас доданд.

Дар охир сардори Раёсати кор бо занон ва оилаи мақомоти иҷроияи ҳокимияти давлатии шаҳри Душанбе З. Зуҳурова барои иштироки намояндаи Ваколатдор оид ба ҳуқуқи инсон дар Ҷумҳурии Тоҷикистон изҳори миннатдорӣ намуда, иброз дошт, ки минбаъд низ чунин ҳамкориҳои байни Раёсати кор бо занон ва оилаи мақомоти иҷроияи ҳокимияти давлатии шаҳри Душанбе ва Ваколатдор оид ба ҳуқуқи инсон судманд буда, баҳри идома дода он чораҷуӣ карда мешавад.

Хадамоти матбуотии ВҲИ

Мизи мудаввар бахшида ба Рӯзи Парчами давлатии Ҷумҳурии Тоҷикистон

Имрӯз, дар мақомоти Ваколатдор оид ба ҳуқуқи инсон бо иштироки роҳбарият ва кормандони мақомот ба муносибати Рӯзи Парчами давлатии Ҷумҳурии Тоҷикистон мизи мудаввар баргузор гардид.

Чорабиниро муовини Ваколатдор оид ба ҳуқуқи инсон  — Ваколатдор оид ба ҳуқуқи кудак Ҳабибуллозода Р. оғоз намуда, ҳозиринро ба муносибати ин санаи муҳими давлатдории навин шодбош гуфтанд.  Иброз гардид, ки бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2009 аз ҷониби парламенти кишвар ба Қонуни Ҷумҳурии Тоҷикистон «Дар бораи рӯзҳои ид» тағйирот ворид карда шуд.  Дар иртибот ба ин сана 24 ноябр ҳамасола дар кишвар Рӯзи Парчами давлатӣ таҷлил карда мешавад.

Мақсад аз расмӣ намудани таҷлили чунин як ҷашнвораи давлатиро метавон нишонаи эҳтиром гузоштан ба Парчами миллӣ, ҳамчун муқаддасот ва рамзи соҳибистиқлолии кишвар унвон кард.

Арҷ гузоштан ба Парчам ин нишонаи эҳтиром доштан ба халқи Тоҷикистон, давлату давлатдорӣ, фарҳангу маънавиёт, ватандорию ватандӯстӣ буда, нақши Парчам дар ҳаёти ҳар як давлат бузург буда, он ифодагари мустақилият ва соҳибихтиёрии давлат мебошад.

Дар мизи мудаввар Сангов Т. – сармутахассиси шуъбаи ташкилӣ, иттилоотӣ ва таҳлилии Дастгоҳи Ваколатдор оид баҳуқуқи инсон дар мавзӯи «Парчам — рамзи истиќлолияти давлатӣ ва ифтихори миллӣ» маърӯза намуд. Дар маърӯза аз таърихи парчаму парчамдории тоҷикон, санадҳои меъёрӣ-ҳуқуқӣ оид ба Парчами давлатии Тоҷикистон ва ҷавобгарӣ барои беэҳтиромӣ нисбати Парчам маълумот дода шуд.

Дар ҷамъбасти чорабинӣ муовини Ваколатдор оид ба ҳуқуқи инсон  — Ваколатдор оид ба ҳуқуқи кудак Ҳабибуллозода Р. бори дигар ҳозиринро ба муносибати ҷашни Парчами давлатии Ҷумҳурии Тоҷикистон шодбош гуфта, зикр сохт, ки эҳтироми волои Парчам  ин вазифаи ҳар як шаҳрванди Ҷумҳурии Тоҷикистон мебошад.

Хадамоти матбуотии ВҲИ ҶТ

Парчам- рамзи истиқлолияти давлатӣ ва ифтихори миллӣ аст.

Дар асоси муқаррароти моддаи 3-и Конститутсияи   Ҷумҳурии Тоҷикистон Парчам дар баробари Нишон ва Суруди миллӣ яке рамзҳои давлатӣ ва нишонаи соҳибихтиёрии он башумор меравад,

Аз ҷониби Роҳбари давлат муҳтарам Эмомалӣ Раҳмон ба Маҷлиси намояндагони Маҷлиси Олии Ҷумҳурии Тоҷикистон лоиҳаи Қонуни Ҷумҳурии Тоҷикистон дар бораи ворид намудани илова ба Қонуни Ҷумҳурии Тоҷикистон“ Дарбораи рӯзҳои ид” пешниҳод карда шуд, ки дар натиҷа дар асоси иловаи зарурии ба қонуни фавқуззикр дохил карда шуда 24 –уми ноябр Рӯзи Парчами давлатии Ҷумҳурии Тоҷикистон муқаррар гардид.

Мақсад аз расмӣ намудани таҷлили чунин як ҷашнвораи давлатиро метавон нишонаи эҳтиром гузоштан ба Парчами миллӣ, ҳамчун муқаддасот ва рамзи соҳибистиқлолии кишвар унвон кард

Бояд тазакур дод, ки парчам ҳамчун рамзи давлатдорӣ ҳанўз, дар давраҳои бостонии таърихи инсоният роиҷ гардида буд. Парчам бахусус дар ҳаёти мардуми Ориёитабор ҷойгоҳи хоса дошта таърихи пайдоиши он ба замонҳои хеле қадим мерасад.Бостонитарин маводе, ки дар бораи истифодаи дирафш дар ҷомеаи орииёиҳо маълумот медиҳад, — «Авесто» (фаргарди аввали «Видевдод») мебошад.

Мусаллам аст, ки тоҷикон дар раванди таърихи тулонии инкишофи худ соҳиби парчамҳои гуногун буданд. Бо ташкил ёфтани давлати Иттиҳоди Шуравӣ миллати тоҷик, пас аз ҳозор сол соҳиби давлат – ҷумҳурии мухтори шуравӣ, баъдтар ҷумҳурии мустақили шуравии ҳамноми миллат, дар ҳудудӣ ин иттиҳод гардид. Дар ин давраҳо   парчамҳои Тоҷикистон, ки монанд ба парчами ИҶШС   эъҷод мегашт, бо тақозои талабот ва сиёсати вақт таѓйир дода мешуд.

Мавврид ба зикр аст, ки ба узвияти СММ пазируфта шудани Ҷумҳурии Тоҷикистон дар ҳоле сурат гирифта аст, ки парчами нави Ҷумҳурии Тоҷикистон таҳия ва тасдиқи худро наёфта буд. Бинобар ин 2-юми мартисоли 1992 ҳангои маросими ба узвияти СММ шомил гардидан барои Тоҷикистон (инчунин Қазоқистон, Қирғизистон ва Туркманистон низ, ки дар чун6ин вазъ қарор доштанд), ки парчами навро напазируфта буд,  парчами ҶШС Тоҷикистон   бардошта шуд.

Албатта, пазируфтани парчам заминаи ба худ хос дорад. Барои қабули  парчами кунунӣ мудати чанд моҳ озмун эълон карда шуд, ки он ба таври пӯшида ҷараён ёфта, дар озмун зиёда аз 200 лоиҳа пешкаш карда шуд.  Ҳар як лоиҳаро комиссияи махсус мавриди омӯзиш ва хулосабарорӣ қарор дод.

Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтараим Эмомалӣ Раҳмон рангҳои парчами миллиро «ифодагари роҳи таърихии халқи Тоҷикистон ва баёнгари арзишҳои фарҳанги миллӣ ва сиёсӣ» дониста, гуфтаанд: “Ранги сурх – рамзи муборизаву ҷоннисории халқ барои озодӣ ва истиқлол, ранги сафед – нишони бахту саодат, умеду орзу ва ранги сабз – нишонаи сарсабзиву шукуфоӣ, сарбаландиву хуррамӣ ва абадият мебошад. Дар байни парчам тасвири тоҷ ва ҳафт ахтар ҷой гирифтааст, ки он ишора ба решаҳои таърихии давлатдории Тоҷикистони соҳибистиқлол мебошад”.

 Ба ҳамагон маълум аст, ки ҷанги шаҳрвандии таҳмилии дар марҳилаи аввали давлатдории муосир миллии тоҷикон ба вуқӯъ омада таҳия ва қабули рамзҳои нави давлатиро ба таъхир андохт. Билохира  санаи 24-уми ноябри соли 1992 дар Қасри арбоб дар Иҷлосияи таърихию тақдирсози XVI Шӯрои Олии Ҷумҳурии Тоҷикистон Нишон ва Парчами нави давлатӣ пазируфта шуд. Ҳамзамон дар ҳамон Иҷлосия «Қарор оид ба Парчами Ҷумҳурии Тоҷикистон» ва «Қарор оид ба Нишони Ҷумҳурии Тоҷикистон» қабул гардид, ки дар вобастагӣ ба он ба моддаҳои 169 ва 170 –и Конститутсияи ҳамонвақтаи Ҷумҳурии Тоҷикистон тағйирот ворид карда шуд.

Бо Қарори Маҷлиси Олии Ҷумҳурии Тоҷикистон (№ 892), 11-уми декабри соли 1999  Низомнома дар бораи Парчами давлатии Ҷумҳурии Тоҷикистон тасдиқ гардид. Тибқи муқаррароти  банди аввали он Парчами давлатии Ҷумҳурии Тоҷикистон рамзи истиқлолияти давлатии Ҷумҳурии Тоҷикистон шинохта шуда аст

Низомномаи мазкур шаклу андоза, тартиби омодасозӣ, ҷойҳои ҷойгирнамоӣ, истифоданамоӣ ва дигар ҳолатҳои марбут ба Парчами давлатии Ҷумҳурии Тоҷикистонро муайян намудааст. Аз ҷумла, дар асоси банди 9-и Низомномаи дахлдор ашхосе, ки ба таҳқири Парчами давлатии Ҷумҳурии Тоҷикистон гунаҳкоранд мутобиқи Қонуни Ҷумҳурии Тоҷикистон ҷавобгар мебошанд.

Гузашта аз ин, вазъи ҳуқуқӣ, тартиби омодасозӣ, андоза ва истифодаи расмии Парчами Ҷумҳурии Тоҷикистонро Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон», (таҳти №254) аз 12-уми майи 2007 ба танзим дароварда аст. Қонуни дахлдор Парчамро дар радифи Нишон ва Суруди Миллӣ яке аз рамзҳои давлатии Ҷумҳурии Тоҷикистон ҳисобида аст. Дар ҳамин иртибот қонуни мазкур моҳият ва тартиби истифодаи расмии Парчамро, дар баробари Нишон ва Суруди Миллӣ муқаррар намудааст. Муқаррароти қонуни дахлдор эҳтироми волои Парчамро ифтихори миллии ҳар як шаҳрванд муайян намуда, дар ҳама ҳолат ба рамзҳои давлатӣ муносибати мусбат намуданро талаб менамояд.

Дар асоси моддаи 11- и Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон», риояи талаботи  Қонуни мазкур ба зиммаи роҳбарони мақомотҳои давлатии Ҷумҳурии Тоҷикистон гузошта шуда, шахсони воқеӣ ва ҳуқуқӣ барои вайрон кардани талаботи он ва таҳқири рамзҳои давлатии Ҷумҳурии Тоҷикистон мувофиқи қонунгузории Ҷумҳурии Тоҷикистон ба ҷавобгарӣ кашида мешаванд.

 Сармутаххасиси Шуъбаи ташкилӣ иттилоотӣ ва таҳлилии Дастгоҳи ВҲИ Сангов Тоҷиддин

Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати Рӯзи Парчами давлатӣ

 Ҳамватанони азиз!

Парчам яке аз рамзҳои асосиву муқаддаси давлатдории миллӣ ба ҳисоб рафта, мардуми шарифи Тоҷикистон ҳар сол санаи қабули онро бо ҳисси ифтихор аз Ватани муқаддаси худ ва давлати соҳибистиқлоли хеш таҷлил менамоянд.

Ба ифтихори ин санаи таърихӣ кулли ҳамватанони азизамонро табрик гуфта, орзумандам, ки парчами давлати соҳибистиқлоламон дар фазои Тоҷикистони маҳбубамон то абад парафшон бошад.

Мусаллам аст, ки ҳар як давлати соҳибистиқлолу озод ба ҷомеаи ҷаҳон, аз ҷумла Созмони Милали Муттаҳид маҳз бо парчами худ пазируфта мешавад ва эътироф мегардад.

Яъне Парчами давлатӣ  муаррифгари тоҷикон дар арсаи байналмилалӣ ва мояи ифтихори мо ҳамчун узви комилҳуқуқи ҷомеаи ҷаҳон мебошад.

Парчами давлати соҳибихтиёри мо  нишонаи таъриху фарҳанги бостониву пурғановати миллати тоҷик буда, ҳар як фарди ҷомеаро вазифадор менамояд, ки нисбат ба ин рамзи муқаддаси миллӣ эҳтиром ва арҷ гузорад.

Воқеан, Парчами давлатӣ омили муайянкунандаи ҳувияти миллӣ ва тақвият пайдо кардани ҳисси милливу ифтихори ватандорӣ дар шуури ҳар як фарди бонангу номуси ҷомеа мебошад.

Парчам рисолат ва нерӯи муттаҳидкунанда дорад, зеро он дарбаргиранда ва таҷассуми арзишҳои сиёсиву фарҳангӣ ва ғояву ҳадафҳои миллӣ мебошад.

Таърих гувоҳ аст, ки ин рамзи миллӣ ба сифати омили нангу номуси ватандорӣ мардуми моро борҳо муттаҳид кардааст ва аз вартаи ҳалокат раҳо бахшидааст.

Мо баъди ба даст овардани истиқлоли давлатӣ дар давраи ниҳоят вазнину ҳассоси ҳаёти халқамон бо истифода аз таҷрибаи ниёгони шарафмандамон парчами давлати худро интихоб ва қабул кардем, ки он мардуми моро ба иттиҳоду сарҷамъӣ, сулҳу оромӣ ва ваҳдати миллӣ сафарбар намуд.

Имрӯз барои миллати соҳибтамаддуни тоҷик парчам сарчашмаи нерӯву тавонмандӣ дар роҳи созандагиву бунёдкорӣ ва сармояи ғуруру ифтихори миллӣ мебошад.

Яъне Парчами давлатӣ сокинони кишвари моро дар майдони ободониву созандагии Ватан муттаҳид намуда, ҳисси миллӣ, ифтихори ватандорӣ ва худшиносиву худогоҳии онҳоро тавсеаву тақвият мебахшад.

Маҳз бо парафшонии ин рамзи муқаддас мо ҳоло пояҳои давлати соҳибистиқлоламонро таҳким бахшида, барои ба як мулки ободу пешрафта табдил додани Тоҷикистони маҳбубамон саъю талош карда  истодаем.

Қобили зикр аст, ки солҳои охир бунёди майдони Парчами давлатӣ ва парафшон намудани ин рамзи муқаддас дар маркази вилоятҳо ва шаҳру ноҳияҳои кишвар идома дорад.

Парчами давлатӣ, хусусан, барои ҷавонони Тоҷикистони азиз омили сарфарозӣ буда, онҳо дар ҳама ҷабҳаҳо зери ин рамзи давлатӣ муттаҳид мешаванд ва иқдомоти шоистаи ватандӯстонаро, аз ҷумла дар ҳимояи Ватани маҳбуб ва дифои ҳар ваҷаб хоки муқаддаси он бо ҳушёриву зиракӣ амалӣ менамоянд.

Ҷавонону варзишгарони тоҷик, ки насли ояндасоз ва номбардорони  миллат мебошанд, бо дастовардҳои худ парчами Тоҷикистонро дар дуртарин гӯшаҳои дунё парафшон месозанд.

Ҷойи сарфарозист, ки имрӯз Парчами давлатии Тоҷикистон дар саросари олам партавфишонӣ карда, нишона аз мардуми сулҳхоҳу тамаддунсоз ва кишвари дар ҳалли масоили глобалӣ муваффақи мо мебошад.

Қарзи фарзандӣ ва вазифаи шаҳрвандии ҳар яки мост, ки ба Парчами давлатӣ — ин рамзи истиқлолу озодӣ, иттиҳоду сарҷамъӣ, ватандориву ватанпарастӣ ва ҳувияти миллӣ арҷ гузорем.

Дар ин самт зарур аст, ки илова ба вазорату идораҳо ва ташкилоту муассисаҳо, парчам ҳамчун нишони сарисинагӣ аз ҷониби сокинони мамлакат, инчунин, дар манзилҳои истиқоматӣ ба сифати рамзи ифтихору ватандӯстӣ васеъ истифода гардад.

Бигзор, Парчами давлатии кишвари мо, ки далели  пойдор будани сулҳу субот, соҳибихтиёрӣ ва пешрафту шукуфоии давлату миллатамон аст,  бар фарози Тоҷикистон ва мардуми шарифи он то абад парафшон бошад!

Рӯзи Парчами давлатии Ҷумҳурии Тоҷикистон муборак бошад, ҳамватанони азиз!

www.president.tj

 

Мизи мудаввар бахшида ба Рӯзи Президенти Ҷумҳурии Тоҷикистон дар мақомоти Ваколатдор оид ба ҳуқуқи инсон дар Ҷумҳурии Тоҷикистон

Имрӯз дар мақомоти Ваколатдор оид ба ҳуқуқи инсон бахшида ба Рӯзи Президенти Ҷумҳурии Тоҷикистон дар мавзӯи «Президенти Ҷумҳурии Тоҷикистон ҳомии ҳуқуқу озодиҳои инсон ва шаҳрванд» мизи мудаввар баргузор гардид.

Нахуст Умед Бобозода Ваколатдор оид ба ҳуқуқи инсон чорабиниро бо сухани ифтитоҳӣ оғоз намуда, ҳозиринро ба муносибати Рӯзи Президенти Ҷумҳурии Тоҷикистон табрику таҳният намуданд. Зикр гардид, ки Рӯзи Президенти Ҷумҳурии Тоҷикистон дар асоси Қонуни Ҷумҳурии Тоҷикистон «Дар бораи рӯзҳои ид»  ҳамасола 16 ноябр ҷашн гирифта мешавад. Нақши Президент ҳамчун Сарвари давлат дар рушду нумуи кишвари соҳибистиқлоламон аҳамияти хоса дорад. Маҳз бо заҳмату талошҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мо тавонистем, ки волоияти қонунро дар кишвар таъмин намуда, эътироф, риоя, ҳифз ва амалишавии ҳуқуқу озодиҳои инсонро таъмин намоем.

Сардори шуъбаи ташкилӣ, иттилоотӣ ва таҳлилии Дастгоҳи Ваколатдор оид ба ҳуқуқи инсон – Қодирӣ С. бахшида ба Рӯзи Президенти Ҷумҳурии Тоҷикистон маърӯза намуд.

Зимни маърӯзаҳо аз таърихи пайдоиши мансаби президент, пайдоиши он дар Ҷумҳуриии Тоҷикистон, нақши президент дар пешрафти давлат ва хизматҳои шоёни Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёддоварӣ карда шуд.

Сипас иштирокчиёни мизи мудаввар оид ба мазмун ва муҳтавои маърӯзаҳо фикру мулоҳизаҳои худро баён намуданд.

Дар охир У.Бобозода бори дигар ҳозиринро бо ин санаи муҳим табрик ва таҳният гуфта, барои боз ҳам содиқона дар амал татбиқ намудани сиёсати хирадмандонаи Президенти мамалакат даъват ба амал оварданд ва  ба Президенти Ҷумҳурии Тоҷикистон муҳтарам Эмомалӣ Раҳмон тансиҳатӣ, умри дароз ва амалӣ гардидани мақсадҳои некашонро таманно намуданд.

 Хадамоти матбуотии  ВҲИ ҶТ

Даври дувоздаҳуми Муколамаи ҳуқуқи инсон байни Ҷумҳурии Тоҷикистон ва Иттиҳоди Аврупо

11 ноябри 2020 даври дувоздаҳуми Муколамаи ҳуқуқи инсон байни Ҷумҳурии Тоҷикистон ва Иттиҳоди Аврупо доир гардид.

Дар нишасти мазкур ҳайати Ҷумҳурии Тоҷикистонро сардори Раёсати кафолатҳои ҳуқуқи инсони Дастгоҳи иҷроияи Президенти Ҷумҳурии Тоҷикистон Абдуҷаббор Сатторзода ва ҳайати Иттиҳоди Аврупоро сардори Шуъбаи кишварҳои Осиёи Марказии Хадамоти аврупоии корҳои хориҷии Иттиҳоди Аврупо Борис Ярошевич роҳбарӣ намуданд. Дар чорабинӣ ҳамчунин Роҳбари Намояндагии Иттиҳоди Аврупо дар Тоҷикистон Мэрилин Йосефсон, Сафири Фаронса дар Тоҷикистон Мишел Тарран ва Сафири Олмон дар Тоҷикистон Андреас Протманн иштирок намуданд.

Рӯзномаи ҷаласа мавзӯъҳои зеринро дар бар мегирифт: вазъи ҳуқуқи инсон дар Ҷумҳурии Тоҷикистон ва Иттиҳоди Аврупо пас аз муколамаи охирин ва дар давраи ҳамагирии COVID-19, озодии баён, аз ҷумла озодии ВАО, озодии иттиҳодияҳо ва иштироки онҳо дар ҳаёти сиёсӣ, гирдиҳамоиҳои осоишта ва озодии эътиқод, озодии дин ва виҷдон, ҳуқуқи занон, аз ҷумла зӯроварӣ нисбати занон, шиканҷа, бадрафторӣ ва шароити нигоҳдорӣ дар маҳбасҳо. Ҳамчунин ҳамкорӣ дар чаҳорчӯби абзорҳои бисёрҷониба, Барномаи умумии имтиёзҳои Иттиҳоди Аврупо (GSP+) ва лоиҳаҳои дигари дуҷониба мавриди баррасӣ қарор гирифтанд.

Муколама дар фазои ҳусни тафоҳум ва эътимод сурат гирифт.

www.mfa.tj

Вохӯрии Ваколатдор оид ба ҳуқуқи инсон дар Ҷумҳурии Тоҷикистон – Бобозода Умед бо Роҳбари Намояндагии Комиссари Олии СММ оид ба кор бо гурезаҳо (UNHCR), ҷаноби Мулугета Зевди

Санаи 10 ноябри соли 2020 тибқи дастури Роҳбари Дастгоҳи иҷроияи Президенти Ҷумҳурии Тоҷикистон, Ваколатдор оид ба ҳуқуқи инсон дар Ҷумҳурии Тоҷикистон, Умед Бобозода бо Роҳбари Намояндагии Комиссари Олии Созмони Милали Муттаҳид оид ба кор бо гурезаҳо (UNHCR), ҷаноби Мулугета Зевди мулоқот доир намуданд. Дар вохӯрӣ ҳамчунин сардори шуъбаи ҳифзи давлатии ҳуқуқҳои шаҳрвандӣ ва сиёсӣ Ашуров М. ва ёрдамчии Ваколатдор оид ба ҳуқуқи инсон Салихов З. иштирок доштанд.

Зимни мулоқот, Умед Бобозода нахуст ташрифи ҷаноби Мулугета Зевдиро ба мақомоти Ваколатдор оид ба ҳуқуқи инсон хайра мақдам гуфта, доир ба самтҳои афзалиятноки фаъолияти мақомоти Ваколатдор оид ба ҳуқуқи инсон маълумоти муфассал дод ва қайд намуд, ки Ҷумҳурии Тоҷикистон ҳамчун узви комилҳуқуқи СММ ва дигар созмонҳои байналмилалӣ ҷиҳати иҷрои уҳдадориҳои байналмилалии худ дар самти риоя ва ҳифзи ҳуқуқи инсон пайваста талош меварзад ва дар ин робита саҳми мақомоти Ваколатдор оид ба ҳуқуқи инсон дар Ҷумҳурии Тоҷикистон низ назаррас мебошад.

Ҳамзамон Ваколатдор оид ба ҳуқуқи инсон У. Бобозода иброз доштанд, ки мақомоти Ваколатдор оид ба ҳуқуқи инсон дар Ҷумҳурии Тоҷикистон баъд аз ташкил шуданаш, дар самти ҳимоя ва таъмини эҳтирому риояи ҳуқуқи инсон дар маҷмуъ, хусусан дар самти таъмини ҳимояи ҳуқуқу озодиҳои гурезаҳо ва шахсони бешаҳрванд (апатридҳо), ки яке аз табақаҳои осебпазирро ташкил медиҳанд, аҳамияти махсус медиҳад.

Аз ҷониби Мулугета Зевди ҷиҳати қабули гарм барои мулоқот ба Ваколатдор оид ба ҳуқуқи инсон низ арзи сипос карда шуд.

Зимни мулоқот ҷаноби Мулугета Зевди пайваста талош ва саҳм гузоштани Ҷумҳурии Тоҷикистонро дар иҷрои уҳдадориҳои байналмилалии худ дар самти риоя ва ҳифзи ҳуқуқи инсон, хусусан ҳимояи ҳуқуқу озодиҳои гурезаҳо, шахсони паноҳҷӯянда ва шахсони бешаҳрванд дар сатҳи назаррас арзёбӣ карда, изҳор намуд, ки иқдоми мазкур барои пешрафту рушди ҳамаҷонибаи Ҷумҳурии Тоҷикистон муҳим аст.

Дар охири мулоқот Роҳбари Намояндагии Комиссари Олии Созмони Милали Муттаҳид оид ба кор бо гурезаҳо (UNHCR), ҷаноби Мулугета Зевди аз Умед Бобозода, Ваколатдор оид ба ҳуқуқи инсон дар Ҷумҳурии Тоҷикистон ҷиҳати пазироии самимӣ ва идома додани ҳамкориҳои мутақобилаи судманд баҳри риоя ва ҳифзи ҳуқуқу озодиҳои инсон, махсусан гурезаҳо, шахсони паноҳҷӯянда ва шахсони бешаҳрванд дар Тоҷикистон ва тақвият додани ҳамкориҳои тарафайн изҳори миннатдорӣ намуд.

Хадамоти матбуотии ВҲИ ҶТ