Артиши Миллӣ сипари боэътимоди Ватан!

Мардуми шарафманди Тоҷикистон имсол бо ифтихор 31-умин солгарди таъсисёбии Қувваҳои Мусаллаҳи мамлакатро, ки зодаи даврони Истиқлолият аст, дар фазои сулҳу суботи сиёсӣ ва руҳияи ватандўстиву хештаншиносӣ ҷашн гирифтанд.

Аз таърихи на чандон дури Тоҷикистон бармеояд, ки пас аз пош хўрдани Иттиҳоди Шўравӣ кишварро вазъи печидаи ҳарбӣ-сиёсӣ ё худ муноқишаҳои дохилӣ фаро гирифта, таъсис додани Қувваҳои Мусаллаҳ ҳамчун амри зарурӣ эҳсос мегардид.

Сарфи назар аз вазъи номусоиди ҳарбиву сиёсӣ, иҷтимоӣ ва иқтисодии кишварро фарогирифта Сарфармондеҳи Олии Қувваҳои Мусаллаҳ Эмомалӣ Раҳмон бо руҳияи қавӣ ва бунёдсозанда ба масъалаи мустаҳкам намудани иқтидори мудофиавии кишвар таваҷҷуҳи махсус зоҳир намуда, ба сохтори ташкиливу воҳидӣ, таъминоти моддиву техникӣ пуррагардонии сафи артиш бо мутахассисони касбӣ иқдом намуд.

18 декабри соли 1992 аз ҷониби Раиси Шўрои Олии Ҷумҳурии Тоҷикистон Эмомалӣ Раҳмон қарор «Дар бораи таъсиси Қувваҳои Мусаллаҳи Ҷумҳурии Тоҷикистон» ба имзо расид. Нахустин паради ҳарбии Артиши миллӣ 23 феврали соли 1993 баргузор гардид, ки он рўз расман санаи таъсисёбии Қувваҳои Мусаллаҳи Ҷумҳурии Тоҷикистон эълон шуд.

Хушбахтона метавон иброз дошт, ки туфайли сарварии Президенти Ҷумҳурии Тоҷикистон-Сарфармондеҳи Олии Қувваҳои Мусаллаҳ Эмомалӣ Раҳмон Артиши Миллии Ҷумҳурии Тоҷикистон ба ҳамаи давраҳои мураккаби бунёди худ нуқта гузошта, ба марҳалаи мувофиқасозии сохтори худ - воқеъияти амнияти байналмилалӣ ва минтақавӣ расид. Дар ин давра саъю талош баҳри сайқал додани омодагии ҷангии ҷузъу томҳо, баланд бардоштани маҳорату малакаи касбӣ, риояи қонуният ва интизоми ҳарбӣ, ҳамзамон такмили донишу маҳорати ҳуқуқии афсарону хизматчиёни ҳарбӣ равона шуд.

Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ аз 28 декабри соли 2023 масъалаҳои пешбурди манфиатбори амнияту мудофиа, ҳифзи ҳуқуқу тартибот, низ дахл намуда, вазифаҳои мушаххасро ба миён гузоштанд.

Дар партави дастуру тавсияҳои Сарвари давлат ҳар шаҳрванд бояд ҳимояи марзу буми Ватан ва таъмини амнияти миллатро қарзи шаҳрвандӣ, масъулияти инсонӣ ва уҳдадории табиии худ донад. Ҳарчанд, ки дар ин ҷода мақомоти ҳифзи ҳуқуқ, амнияти миллӣ ва сохторҳои низомӣ махсус муваззаф буда, вазъи мураккабгаштаи ҷаҳони муосир дар назди онҳо шарту уҳдадориҳои ҷиддии касбиро гузоштааст.

Бояд қайд кард, ки тақвият бахшидани сатҳи ҳифзи иҷтимоии хизматчиёни ҳарбӣ пайваста дар мадди назари давлат ва Ҳукумати Тоҷикистон қарор дорад. Бо мақсади тақвият бахшидани сатҳи ҳифзи иҷтимоии хизматчиёни ҳарбӣ аз 1-уми январи соли 2024 музди меҳнати амалкунандаи онҳо дар қатори кормандони мақомоти ҳифзи ҳуқуқ 40 фоиз зиёд карда шуд.

         Маврид ба зикр аст, ки фаъолияти хизматчиёни ҳарбӣ бо мушкилиҳо ва маҳдудиятҳои барои ҳалли вазифаҳои ҳарбӣ зарур алоқаманданд. Ин маҳдудиятҳо бинобар ҳалли вазифаҳои хизматӣ зарур мебошанд ва онҳо бояд бо талаботҳои хизмати ҳарбӣ вобаста буда, ба санадҳои ҳуқуқии  байналмилалӣ, қонунгузории миллӣ ҷавобгў бошанд.

Мусаллам аст, ки дастрасии Ваколатдор оид ба ҳуқуқи инсон дар ҳаёти сохторҳои ҳарбӣ барои таъмини масъулият, шаффофият ва идоракунии босамари сохторҳои ҳарбӣ, пешгирии ҷиноятҳо, ҳифзи ҳуқуқҳои хизматчиёни ҳарбӣ мусоидат менамояд.

Яке аз самтҳои афзалиятноки мақомоти Ваколатдор оид ба ҳуқуқи инсон ин мусоидат ба ҳимояи ҳуқуқу озодиҳои хизматчиёни ҳарбӣ мебошад, дар ин робита мақомот дар доираи ваколатҳои худ дар самти мусоидат ба риоя ва ҳифзи ҳуқуқи хизматчиёни ҳарбӣ амал намуда, ба қисму сохторҳои ҳарбии мамлакат ташриф меорад ва ин ташрифҳо метавонанд дар асоси муроҷиатҳои шахсони воқеӣ ва ҳуқуқӣ ва бо ташаббуси худи Ваколатдор сурат гиранд. Зимнан, Ваколатдор оид ба ҳуқуқи инсон барои қабули бетаъхири роҳбарият ва шахсони мансабдори қисмҳои ҳарбӣ ва роҳбарони низомҳои ҳарбии дар ҳудуди ҷумҳурӣ қарордошта ҳуқуқ дорад.

Гурўҳи мониторингии назди Ваколатдор оид ба ҳуқуқи соли 2023 вобаста ба вазъи риояи ҳуқуқи хизматчиёни ҳарбӣ якчанд қисмҳои ҳарбии Вазорати мудофиаи Ҷумҳурии Тоҷикистон, аз ҷумла Қисмҳои ҳарбии 01123, 23441^“б”,, 87740^“а”, 07256, 04080 ва 05170 -и Вазорати мудофиаи Ҷумҳурии Тоҷикистон дар шаҳру ноҳияҳои Хоруғ ва Ванҷи ВМКБ, Бохтар ва А. Ҷомии в. Хатлон, Конибодом ва Панҷакенти в. Суғд мониторинг гузаронид.

Ҳамчунин, дар қисмҳои ҳарбии мазкур барои афсарон ва сарбозон мизҳои мудаввар дар мавзўи “Пешгирии экстремизм ва терроризм” “Пешгирии шиканҷа ва дигар муносибатҳои бераҳмона”, "Ҳуқуқҳои хизматчиёни ҳарбӣ” ва “Муносибатҳои ғайриоиномавӣ дар қисмҳои ҳарбӣ” доир намуданд, ки дар онҳо зиёда аз 600 нафар иштирок доштанд.

Хулоса Қувваҳои Мусаллаҳи Ҷумҳурии Тоҷикистон дар тўли 31 сол ба як сохтори муташаккил ва боэътимод табдил ёфта, бо шарофати талошҳои он ҳифзи сулҳ ва таҳкими давлатдорӣ таъмин карда мешавад.

Муовини сардори ШҲДҲШС                       

 Нидоев Ҳ.